|
Memoria euganea
L'anatomìa umana de la Bassa
 |
| Ogni òrgano interno o visto de fora gavéa el so nome... |
In te la Bassa Padovana se se parla de i òrgani interni e anca quei a vista de fora. Scumissiando da la testa, tanti modi de dire no ocore gnanca tradurli, ma serti de sicuro ghe vole na spiegassion.
In testa a ghemo i caveji, e la coéga soto i caveji, la copa (el serveleto) el sòno (le tenpie), le sege (le ciglia), le massèe, rece, la sbèssola, (mento) la gorja (el soto gola), le snarise, i stèfani (i denti), i làvari, le spale, i gonbi (gomiti), i déi, i brassi, le tete, el begnìgolo (ombelico), le culate, le borse (lo scroto), i zenoci, i sgarétoi e le caice (caviglie), el déo grosso (l'alluce) e tanti altri particolari che no ga inportansa.
I òrgani interni invesse i xe on poco pi conplicà.
Le balote de i oci, el palà, el gargato (esofago), i màntesi (i polmoni), el batente (el core), el pantasso (el stómego), la ziele (bile), le buele, i rognoni, el buelo gentile (el colon), le grespe (le rughe).
Tute maniere de ciamare i nostri òrgani corporali, e quando uno el se sentiva poco ben, se saeva de sicuro da cossa el jera causà, e ghe jera anca el rimedio par curarse, (ma de sicuro serte volte no se podéa dare spiegassion) ma par 'ndare da i dotori no se ghe ne parlava gnanca, i dotori i jera par i siori, ma anca par lori co i tenpi che coreva no se catava rimedi.
E se uno el se destruseva pianpianin se diseva ch'el jera in man del Signore (e alora benedission, aqua santa e rosari).
Ma anca co le credense popolari se diséa ch'el jera instrigà. E se 'ndava a vardare in dentro ai stramassi de pena (piume) e co la fantasìa de i tenpi se catava de 'e pene ingropà, o a forma de crose, e se faséa presto a colegare le superstission pi stranbe, se brusava sùito el piumin, se scumissiava a sercare le cause, da chi che'el podéa èssare stà instrigà, e vegneva fora de tuto.
Ma a chei tenpi quando l'anafalbetismo el jera al màssimo, in te i paesi pìcoli che saeva lèsare e scrìvare ghe jera solo el prete, el speziale e calche altro ch'el gheva atività polìtica, come el podestà e i avocati, i tipògrafi (ca no capisso par chi che i scrivesse visto la poca gente che leseva).
De sicuro i tenpi i jera magri par la gran parte de la gente, e de conseguensa fassilmente "tolti de berta", spece par chi lavorava soto paron in canpagna, che durante l'ano i 'ndaséa in prestio dal paron de biave che dopo le vegnéa contegià a fine ano; no tuti credo che i fusse malvagi ma ghe ne jera che i se ne profitava de 'a ignoransa de tanta pòara gente.
Partendo da l'anatomìa de la Bassa semo 'ndà on poco fora caresà, ma in fine la se racorda col modo de dire de na volta, sti nomi stranbi de i òrgani del nostro corpo, che 'desso co la manìa de insegnare ai putèi de parlare el talian no se usa pi el nostro bel modo de dire, le nostre vere maniere portà vanti da i tenpi, che forse le morirà co noantri pochi veci ca semo restà: questo ne porta on poca de tristessa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Riva setenbre: tuti a scola!
Se vèrze le scole... se vèrze el rubineto de i problemi.
Ogni giorno ghe ne nasse de novi, de stranbi... e de pericolosi
de Mario Klein
Storia vèneta
La batalia par el Pasubio
Un libro 'pena vignù fora, par mezo de l'editore Itinera Progetti, fa pi ciaro su na vicenda stòrica che se credeva straconossùa
de Giordano Dellai
|
