|
El raconto del mese (in visentin)
LA SAGRA
 |
| A qualche sagra ghe xe anca ancò un organeto: el xe quelo de Antonio Bisemi, cantastorie e ùltimo Torototela. |
La "SAGRA" jera la festa pi inportante del paese. La se faséa el giorno de la Sunta, el quindese de Agosto. Se jera sicuri che el tenpo sarìa stà belo e la gente podéa spassàrsela prima de consumarse su i canpi col sorgo e la ua.
I gavéa pensà anca de farghe par tri dì vanti la fiera. Le strade del paese se inpienava de bancarèi, pìcoli e grandi, tenduni de tante misure e de tanti coluri. Chi la so marcansìa la metéa in mostra ciapàndose pi spassio ch'el podéa in piassa o so na crosara. Na fraca de done co la sporta de paja e òmini co la bagolina soto el brasso i faséa gran discussion e gran ciacolade.
Se vendéa de tuto, da le manze ai guciari de legno de le furlane. Par i s-ciapi de tusi ghe jera tanti bancarèi de furissi, de pandòi, spumilie e sagra, de amarene e gelati, de caròbole e stracaganasse, nose e nosele. Muci de angurie ghe ne jera a ogni canton. Par convìnsere a conprarle, in sima al mucio ghe ne jera una tajà a metà, grossa e dal colore rosso vivo.
So 'l canpo sportivo se gavéa postà le giostre: barache par i tiri a segno co tose morote e tute piturà che te invitava. Giostre co i cavaliti par i tusiti, calcinculo ciapà de corsa da tusi e tose che sigava spinséndose par aria e na giostra de timonele e cavài de legno che paréa vèri, fata nar torno par ore e ore da on musso co la testa infilà so on sacheto de fen e col culo spelà da le bastonà ch'el ciapava dal giostraro. Me faséa tanto pecà chela bestia, che tiravo me popà par la mànega par nar vanti e no védarla.
Strinpelava tra la gente l'organeto, anca quelo tirà da on musso pèle e ossi. La parona, spavalda e vestìa da sìngana co i so quatro mocioseti torno, obligava tuti a tore el pianeta de la fortuna: on folieto colorato co le prevision amorose e na sinquina del loto. I so tusiti te sidiava par la limòsina. Na fraca de bocie ghe stava da torno parché sora l'organeto, na simieta col culo querto da on par de mudandine rosse, la sventolava par aria na coa lunga che la finìa co on risso. La simia scaolava i bajiji e le nosele che ghe butava i tusi, ciapàndole al volo. Ma la jera furba: se i ghe tirava robe che no ghe 'ndava, come carte de caramele co on sasseto rento, la ghe le tirava drio e i tusi lo faséa a posta. Dopo le "funsion" la gente se calcava par le strade. Parenti e conossenti de i paesi vissini se saludava de alta siera. I òmini i discutéa de la stajon e parfin i ghe ne aprofitava par contratare na manza o el porselo che i tegnéa so 'l staloto.
So la corte de na ostarìa, fornìa de tante bandierine de carta, òmini e done balava tanghi e masurche al sono de na fisarmònica. El balo jera proibìo da i preti come el fusse on pecato mortale ma el dì de la sagra balava anca i capati e le done de la confratèrnita.
In meso a na calca che ridéa a crepapele i faséa gran zughi: la corsa de i sachi, rónpere le pegnate e la cucagna. Quei incapucià che smenava el palo par aria i finìa senpre co i gnochi so la suca e le pegnate ghe roversava 'dosso aqua, segaure e quele co la sénare, quatro palanche.
El cùlmine de la festa jera la cucagna. A ciaparla ogni ano tri tusi de i "Onti", la fameja de i boari del conte. Pi sporchi no i podéa èssere; parfin col calìsene i se onseva la facia. El palo de la cucagna gavéa tri déi de grasso e 'l sercio in sima on salado e on polastrelo. I tri tosati, sfigurà e vestìi de sbrìndoli, i ghe ne faséa straje: i se ranpegava so la testa uno de l'altro e, sicome no i riussìa che sbrissiar zo, i se ramenava so la sénare par sugarse el grasso. On spago, a comando, sbassava el sercio par aria. Ma 'pena i tusi slungava le man, quelo coréa de novo in sù e luri sfinìi zo nantra volta par tera. Par tuta la gente na vera baldoria.
Al dì de ancò a la sagra de la Sunta par le strade del paese no ghe xe quasi nissun, salvo qualche vecioto. La gente xe al mare dove so la sabia sporca e de bojo i se inmucia tanto da pestarse sù, magnando roba che costa on ocio de la testa, bona da gnente e bevendo aqua inquinà.
Qualchedun lora el ga vudo la bela idea de fare la festa de note. Soto on gran tendon la gente se sfama co na feta de polenta onta e na luànega, bevendo vin che sa da strope e no badando i quatro sanbèi che, sora on palco, i sona i bandoti e la fisarmònica. Là soto, la calca de la gente someja de pi a na cagnara che a na festa paesana.
Ma, se sa, al dì de ancò pa farse sentire vivi altro no ghe xe che far cagnara, e non solo a le sagre.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Riva setenbre: tuti a scola!
Se vèrze le scole... se vèrze el rubineto de i problemi.
Ogni giorno ghe ne nasse de novi, de stranbi... e de pericolosi
de Mario Klein
Storia vèneta
La batalia par el Pasubio
Un libro 'pena vignù fora, par mezo de l'editore Itinera Progetti, fa pi ciaro su na vicenda stòrica che se credeva straconossùa
de Giordano Dellai
|
