Da Maran Lagunare (UD)

... me pareva de esse tornò fiol

I telèr del nono co i grasiùi.

'Pena che la Luisa la me ga contò che so fio Nicolò e i so amighi ziogando a fà i pescaùri i veva ciapò un bisato drento la nassa, vidìnduli co 'l pensièr me pareva de esse tornò fiol. Eh sì, parché anca mi zioghèvo come luri. In quela volta no gera gnancora fate le case, là, oltra el ponte de le saline, e pa' la banda del canal, caminando verso San Vio, vardando pa' le velme se vedeva senpre un stràe de siivuliti. Tante volte vevo sercò de ciapali, ma luri, 'pena che i me sintiva i spariva in canal. Cò i torneva sora aqua dopo un poco, movendo le teste, pareva come che i volissi ciote in ziro. 'Na note che la vevo passada svejo a studià el truco come ciapali, vignùo inamente el nono Jnci de come ch'el feva i grasiùi sul telèr l'inverno, sercando de copià elo gerevo rivò a inbatìghene tre picinini. Me manca un cogòl, vevo pensò, pusò co i cùmi sul barcòn de la cusina, intanto che stevo vardando fora. De oltra la strada, vedo sora la cavariada le nasse de go de me barba Toni Grosso a sugà: ghe ne xe tante, forsi gnanca no 'l se 'n'acorsi se ghe ne robo una, vevo pensò dopo ciolta. In càneva vevo trovò un tòco de rete scartada de me pare, misurada e tajada in do tòchi, inpignìo la lengueta de fil go cusìo i do tòchi in banda e dopo finìo la nassa la gera deventada un cogoleto. A scola, duto ciapò, no vedevo l'ora che fussi sunada la canpanela pa' scanpà a casa. Dopo magnò, veva voja la nona Giacomina tignime, de dime che prima vevo de fà i cònpiti. Caminando verso San Vio, i grasiùi longondà i veva tacò pesame, sol dopo scapolada la ciàvega de Lussiàn e passò la casa de Giovani Minuti me gera tornò el corajo; parché gero rivò. Gerevo discalso, la bora e la corente oro l'aqua la veva cunbinò come 'na sacheta, pusada la roba vevo fato sbrissolà i pie in tel fango fìn oro l'aqua. Smolò un grasiòl, ficò el primo pal derente i tapi, vevo ficò qui altri slongando el grasiòl verso el canal. Dopo, metùo par zoso el secondo e distirò el cogòl, co 'l terso grasiòl son tornò verso tera fando un tòco de ansin. Finìa la seraja, sensa ciapà fiò me gero metùo pacagnà indrumàn. I siìvuli, pasemài, corendo de qua e de là i me pochèva le ganbe, no vedevo l'ora de alsà el cogòl. Gero restò mal cò drento ghe ne vevo trovài sol 'na diesisina e un passarinel. Xe el cogòl massa pìcolo, vevo pensò.
"Bruno, parché no te vien a insegnaghe ai fiòi come che se pesca" me disi la Luisa gavàndome de i me pensieri.
"Sì e magari te ga anca la màchina fotogràfica de inprestame."
"Serto che la go e la xe pronta de fa le fotografìe se te vol. Parché?"
"Gnente, podarse che la me ucuri dopo, se me salta de scrive qualcossa."
"Se te vien dopo le quatro che i fiòi i finissi de fà i cònpiti te li truvi senpre a casa" me disi Luisa. Do zurni dopo gero là de ela, e: "Bruno, go magnò sa' el bisato che ga ciapò i fiòi" la me conta 'pena che la me vidi. "Te sa' che sindòso che 'l gera. Almoto, ronpéndose, l'afièl el veva pacagnò duta la pansa".
"E co', no te lo vivi curò prima de cusinalo?"
"Vevo netò el slìmio ma me gero dismentegada de gavaghe i buèi. I fiòi i ga dito che 'l so tòco el gera speciale, però la mia parte la gereva sindòsa de murì".

Dopo un giosso vedo vignì fora na barchetta con sinque fiòi...

Ciolta de man la màchina fotogràfica che la me veva sporto, go brontolò sotovìa: "Fia de pescaùri e no la sa gnanca che prima de cusinà el pesse bisogna gavaghe i buèi? Sindòso, brava te xe stàda a magnalo, altro che sindòso!"
La vila a schiera de la Luisa e de so marìo Adriano Zentilin la finissi giusto là che scumissia la zona palustre, un giogo che 'l someja un tòco de paradiso, 'ndove ani indrìo gera duta vale. Bonificada pa' fa case, in quel posto xe restò ancora qualchi canaleto, barene colme de strame e de cana palustre. Un canpeto de calcio co le porte pìcole pa' confin, riparò co la rete posta che la bala no la casca in aqua. Nicolò e i so amighi in quel mentre i gera drio tiraghe calci a 'na bala fiapa, la Luisa: "Eiih, fiòi, metè via la bala e montè in barca che 'l Bruno el vol fave 'na fotografìa."
'Pena sintùa so mare, Nicolò e quìi altri fiòi i se miti core verso l'àlsere e dopo un poco i sparissi in meso un grumo de sterpi. 'Ndò vissin, me ga tochèsto spòrzeme pa' vede 'ndove che i se gera scunti. Dopo un giosso vedo vignì fora 'na barcheta con sinque fiòi a bordo, duti pulcini de la Maranese Calcio. Vedendo la barcheta cussì picinina gero preocupò, dopo, vignùo inamente che anca nantre a sie sete ani corèvomo pa' le batele e za nuèvomo, me gero calmò; in confronto de natre i gera più grandi. Intanto che 'l Nicolò a prova el feva de moto pa' 'ndove 'ndà, pestài quatro gransi e missi drento le nassa, Nicolas Corso el ghe la sporzi al Mauro Dal Forno che, pusò oro banda la ciò posta distirala sul fango. "Gìrala gìrala, no sta' ficala cussì; pùsala co 'l muso pa' l'altra banda" sinto che siga l'Alex Masài, che forsi in quel mentre el se gera ricordò de come che la stèva quel zorno che i veva ciapò el bisato. "Ma nò, provè metela contraria sta volta" urla el Giacomo Zentilin l'Alex che 'l gera restò in tera parché no 'l steva in barca. A un serto punto a bordo no se capiva più gnente. I fiòi i continueva parà, 'ndàndo indrìo e 'vanti co la barcheta urlando, duti che i casseva ùrdini, duti che i voleva comandà, che i voleva fasse vede come che i gera bravi...
I scumissia ben, vevo pensò intanto che schissèvo el déo pa' fa 'sta fotografìa.

[torna sopra]