|
Storia vèneta
La batalia par el Pasubio
Un libro 'pena vignù fora, par mezo de l'editore Itinera Progetti, fa pi ciaro su na vicenda stòrica che se credeva straconossùa
 |
| Resti de caminamenti e trincèe de la Grande Guera sul Pasubio. |
Chi pensava che sul Pasubio e la so batalia fosse sta scrito propio tuto, no ga fato i conti co "La battaglia per il Pasubio", un volume de sirca 350 pàgine, scrito da Paolo Pozzato, Ruggero Dal Molin e Paolo Volpato, presente 'nte le librerìe al presso de 19,90 euro e èdito da la Itinera Progetti, che no xe la prima volta che la se mete de inpegno par publicare libri su la prima guera mondiale.
El nome de i curadori anca da solo xe na garansìa de la validità de l'operassion culturale. El bassanese Paolo Pozzato, docente de storia e filosofìa al licèo clàssico "Brocchi" de la so sità, ga fato vigner fora diverse publicassion su la Grande Guerra: da ricordare el testo su Emilio Lussu e la Brigata Sassari o anca el pi ressente laoro de tradussion e cura de pareci interessanti esenpi de memorialìstica austrìaca, cofà i diari de i generali Pengov, Krauss e Horsetzky. Ruggero Dal Molin, anca lu bassanese, xe un artigian conossùo par el so enorme archivio fotogràfico sia de parte 'taliana che de parte austrìaca. Infine Paolo Volpato, nato a Roma dove che l'àbita, xe un dipendente de la Càmara de i Deputati, xe socio de la Società Stòrica par la Guera Bianca e 'l laora a raquante riviste stòriche.
El libro porta come sototìtolo "Kaiserjäger alpini e artiglieri sul pilastro difensivo delle prealpi vicentine". I Kaiserjäger i xe rivà sul Pasubio solo a la fine de giugno del 1916. A chel punto lì la "batalia par la pianura" gera za finìa anca se la 10ª Brigata da montagna austro-ungàrica sercava de tirarla in longo lanciàndose in ùltimi desperài sforsi ofensivi. Fursi chela batalia lì gera stà persa za parecio tenpo prima, fursi có el 20 majo la 18ª Brigata da montagna gera stà tirà via dal monte, su cui stava 'ndando vanti sensa quasi pi trovare resistensa, par èssare avià in Val Teragnolo e al Passo de la Bòrcola. O fursi queo che doveva capitare a la pianura vèneta gera stà deciso 'ncora prima, el giorno 18, quando, co na decision che essèndose po' rivelà vincente gavarìa avùo naturalmente tanti pari (i gen. Pecori Giraldi e Pasquale Oro, el col. Mattei o 'diritura el mag. Pariani), le spaurìe rèclute canpane de la Brigata Volturno gera stà proietàe da la Vallarsa fin a la somità del Pasubio. Ma se la batalia par rivare fin 'ntel piano gera finìa co la sconfita de l'inperial-regio esèrcito austro-ungàrico, che 'ndava cussì strenzendo senpre de pi el so fronte de ataco, fin a incunearse (tra l'altro par gnente) 'nte la Val d'Astico, quela par el monte gera 'pena ai so inissi e senbrava spetare propio i Kaiserjäger par scaenarse in tuta la so violensa.
Sti soldài sielti de l'Inperadore no gera propiamente de le trupe da montagna e i se gera bravamente e sanguinosamente batùi su le pianure del fronte russo, dove i gaveva za perso pareci de i so mèjo "quadri". Ma se tratava de reparti reclutài 'nte i distreti alpini, boni donca de adatarse co poca fadiga a la guera in alta montagna, anca se quela del Pasubio se sarìa presto rivelà cofà na feroce guera de posission. Anzi, sarìa stà la guera "carsica" pi alta de l'intiero conflito 'talian e fursi de tute le guere conbatùe fin 'lora. Defati quasi prima 'ncora che fusse finìi i ùltimi sforsi ofensivi austrìaci, el Comando Supremo 'talian gaveva domandà a quelo de la Iª Armata na decisa assion controfensiva, che gaveva el cònpito de tajare ai do estremi tuta l'area che i nostri aversari gaveva ocupà a l'interno del Vèneto. Ocoreva donca atacare in pressa, prima che el tenpo bruto autunale rivasse a far dani a tuta la situassion, lì su l'Altopian de Asiago, fin a la linea Portule-Verena-Campolongo, e sul Pasubio, fin a recuperare el nodo del Colsanto. E tuto questo par assicurare linee curte, de sicuro rendimento difensivo, presidiàbili co puchi soldài e soratuto co caraterìstiche tali da garantire de novo a Cadorna libertà de manovra sul fronte de l'Isonso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Riva setenbre: tuti a scola!
Se vèrze le scole... se vèrze el rubineto de i problemi.
Ogni giorno ghe ne nasse de novi, de stranbi... e de pericolosi
de Mario Klein
Storia vèneta
La batalia par el Pasubio
Un libro 'pena vignù fora, par mezo de l'editore Itinera Progetti, fa pi ciaro su na vicenda stòrica che se credeva straconossùa
de Giordano Dellai
|
