|
Da i Coli Euganei
Ua soto la luna
 |
| Giada e Greta drio fare on eviva a la ua. |
Quando che mi parlo de ua za me par de sentire 'sto dolse, 'sto gusto, come se fusse drio magnarla.
Quanta ua go magnà mi, fin da picenina, no se pol savere! E xe par questo che me vien fàssie parlare de 'sto fruto cussì inportante par mi da volerghe proprio ben. Qua in casa i me ga senpre contà che da picenina, có pianzéa, i me metéa on gran de ua strucà drento na pesseta e mi ciuciava contenta e no pianzeva pi. On pochetin pi grande, apena inparà a caminare, on dì no i me catava pi. Tuti preocupà i xe cursi a sercarme e i me ga catà drio na pianta, soto na vegna de ua, ca tirava i grani e li magnava. "No se pol magnarla, la xe ancora crùa!" diséa la mama tentando de fàrmea spuar fora. E mi, che ancora parlava a metà, rispondéa: "Sì, mama, ua ciùa, tuto ciùo!"
On quadreto questo che, a pensarghe, el fa proprio da rìdare.
I me ricordi me porta invesse pi vanti col tenpo quando, toseta, se coreva descondon da i grandi fora de 'a porta zo par i canpi có gera ormai scuro. Tuti tri fradèi d'acordo, par sentire se se gera boni col scuro a indovinare el graspo pi dolse, se coreva soto le vegne e po' a taston se sercava i grani pi grossi. Ogni tanto se sentiva on rumore, el "frrr" de do ale de oseeto che scapava inpaurìo; altre volte la gera na farfala noturna o un paejon (libellula) che se gavéa sconto lì par dormire soto le foje. El gusto che gavéa chei grani cussì frischi de sguasso no se pol gnanca descrìvarlo: el miele no gavéa a che fare! Intanto la luna vegnéa fora dal colo del monte, la ne jutava col so slusore s-ciarando el scuro e paréa che la ne fesse l'oceto, contenta de i nostri salti de contentessa. Ma tuto gera beo e ocasion de alegrìa, lì, in tel nostro vegneto. Se scumissiava dal momento che le vegne criava: da ogni cao te vedéi vegner fora na giossa tonda che paréa na làgrima. "Se la cria vol dire che la xe viva" diséa el papà.
"Ogni giossa xe vita: el xe on criare de contentessa par aver passà ormai l'inverno." E mi, a vardar tuta sta distesa de giosse tacà ai cai de 'e vegne che in tel tramonto del soe le paréa giossete de luce, me sentìa la comossion in tel core. Pi tardi anca la fioritura de 'a ua gera on qualcossa de beo. Se spandéa in tel canpo on profumo dolse e aspro che faséa proprio pensare a l'odore del vin. Se ghe voéa cussì ben a sto vegneto che ogni volta che rivava on colpo de ton, segno de tenporàe, on po' tuta la fameja se metéa in preocupassion. E la gera la paura de 'a tenpesta quea che ciapava on po' tuti in te chei mominti. Difati, dopo na tenpestada noantri pìcoi se vardava incuriosìi i oci de i grandi, lustri e co qualche làgrima meza fora da 'e seje. Foje rote, graspi par tera... se se vedéa torno proprio na disfata. "Varda" - diséa el papà - "anca le vegne, messe cussì, le fa proprio pecà..." Le so vegne! Quanto che le ga caressà! Ogni volta che mi tornava dopo èssare stà via on tochetin de tenpo eco che lu me conpagnava zo par el canpo par mostrarme le so vegne e la ua disendo: "Varda la marzemina che graspi zai: la xe quasi fata!" E 'l vardava 'sti graspi caressàndoi coi oci quasi che i fusse stà na persona che ghe voéa ben. A volte, quando me càpita de tornare arente chel vegneto, dopo èssare stà via par tanto tenpo, me vien in mente chel ricordo e, vardando i graspi tacà via de picolon, me pare che i sia ancora lì che i speta le caresse de i oci de 'a mama e quée de 'e man del papà. El momento del vendemare gera par noantri tusiti de grande inportansa. No se faséa gnente ma se coréa piè par tera drio le piantà, zogando e girando torno a la gente che vendemava. "Basta sigalare" diséa la mama quando se osava on po' massa forte "almanco 'ndè pi distante!" Da pi granditi invesse se ghe jutava a vendemare e gera propio on gusto ciapare in man 'sti graspi caldi de soe sajando ogni tanto on gran de i pi bei. "Varda" diséa qualcun "'sto graspo cussì longo e grosso el pare on toseto infassà!" E se sentìa in distansa de i còri che cantava de quei che vendemava in altri canpi. Ghe gera on paron de on vegneto - contava el papà - che 'l voléa che i operài cantasse senpre vendemando parché cussì i magnava manco ua. E ognuno diséa intanto la sua. Da pi grande invesse me comovéa vardando la mama o el papà che se piegava a rancurare i grani de ua che petava par tera: quanto amore mi ghe vedéa in te chel gesto! La ua se metèa prima in te i sesti pìcoi (par noantri tusiti) che se ciamava 'piloti' dopo in te i sisti grandi ciamà 'sisti da staro'. I vegnéa portà sù dal canpo col bigòlo in spala e svodà drento in te le corbe. Le corbe gera seste de vìmini co du màneghi, uno par parte, che podéa tegnere arquanti quintài de ua. "A ti la te piase cussì tanto che te ghin magnarissi na corba!" me diséa ridendo la mama. Na volta svodà la ua so 'l tinasso eco che 'l papà o el zio, co le braghe fate sù, i se metéa a saltare in modo de folarla.
On brondinèo de mosto ghe gera senpre par noantri, in modo che la mama ne fasesse i sùgoi. Che delissia, gente! De note te sentivi el mosto che bujìa brontolando e profumando l'aria e la ua deventava vin. Oncò me vedo toseta, a sbecolare la ua soto la luna e dal core me riva a la pena paròe insucarà de poesìa: "Furegava curiose / le nostre man picenine / za moje de sguasso. On gran dopo l'altro / rivava a la boca e chel gusto coréa / in tel fondo del core / spandendo in te l'aria / na canson al Creatore. E se vendemava / l'amore de 'a tera / i basi del soe / de tuta on'istà. E se vendemava / cantar de sigàe / note ciare de luna / respiri de vita".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
Come canbiare el mondo
El mondo xe drio passàrsela maloto. Xe necessario intervegnere. Ma come? Canbiando la cossienza, el cuore, l'imaginazion
de Mario Klein
|
