|
Storia de la Zona A ai italiani (in triestin)
A Trieste mezo sècolo fà
Xe passadi zinquant'ani da quando Trieste xe tornada a l'Italia per la seconda volta. La prima, el 3 novenbre 1918, mia mama, 'pena guarida da l'ùltimo scosson de la spagnola, la xe 'ndada a saludar i bersalieri e i marinài sbarcadi dal caciatorpediniere "Audace". La me contava che in quela volta ghe se ga streto el cor nel veder i marinài che ghe butava pan a la zente sul molo S. Carlo. E sì che la gaveva patido bastanza la fame, ela sola co i su do fiòi a magnar risoto de milio e pan nero co la melassa, intanto che el papà iera internado polìtico de l'Austria.
Mi, che son nato dopo, go visto 'rivar i marinài italiani int'el 1954, el 26 de otobre. I bersalieri e tuta la trupa i era za in zità, vignudi la note a el zorno prima e i gaveva ciapà posizion in tuta la Zona A; la marina inveze se ga mosso da Venezia la matina del 26 a le sie e meza: l'incrociator "Duca degli Abruzzi", scortado da i caciatorpedinieri "Grecale, Granatiere e Artigliere", comandài da l'amiralio Bigliardi, i riva a le ùndise e tre quarti; ma intanto el general Edmondo De Renzi, novo Governator de Trieste, 'rivado al posto de bloco de S. Giovanni de Duino, e acolto da i picheti inglesi e americani e da le cornamuse de i "highlanders" scozesi, el se ga portado al castel de Duino, acolto da el general inglese John Winterton e da l'american John A. Dabney. Forse questo xe stado l'ùnico momento uficial de tuto el passagio da l'aministrazion aleata (G.m.a.) a quela italiana; Dopo, tuto xe 'ndado in balon, un poco per 'na forte bora e piova che paralizava ogni movimento, ma soratuto per el gran nùmero de persone, che no se curava de
la "bora nera" e che ocupava tute le rive e la piaza "Granda", quela co el municipio, che diventerà "piazza Unità d'Italia".
In sto momento son arivado mi col treno da Padova, e a piedi go fato el corso Cavour e, a l'alteza de el Canal de S. Antonio, me son infilado in una ressa umana squasi insormontàbile; a spintoni fra la zente che zigava "Viva l'Italia", fra ombrele che la bora roversava, fra la piova che no dava requie, go superado la riva davanti a la piaza strapiena e son 'rivado de fronte a l'Hotel Excelsior, indova ghe iera 'na zona lassada lìbera e proteta da la polizia italiana, per 'na parata militare. Infati al gen. american Dabney, el solo de i tre che fussi in te l'hotel, xe vignudo fora co la so banda musical e co le trupe che ghe restava (le altre, e quele inglesi, le iera partide via tera za zorni prima). Xe sta' sonadi i tre ini nazionài e, dopo el present-arma, el se ga inbarcà su le su navi. In quel momento la zente ga ocupado el spazio lìbero e le autorità italiane responsàbili de l'órdine pùblico, forsi le ga lassado che i travolgessi el cordon de protezion inegiando a l'Italia; el general Winterton no se ga mosso da la su fregata, forsi per paura che fra la fola nasessi qualche roba poco pacìfica, in ricordo de le fucilate ai triestini davanti a S. Antonio Novo e a mezogiorno e meza el se la ga mocada co le su navi. Fine poco gloriosa del Governo militare aleato in te la Zona A, che per el "Memorandum di Londra" de el 5 otobre el vien sostituido da l'aministrazion italiana.
El gen. De Renzi, intanto, el iera in prefetura, nel palazo sul canton de la piaza, ma per la fola no el se podeva móver: qua vien esposto uficialmente el tricolor, mentre le navi italiane le vien drento al porto e 'na squadrìlia de aerei passa a bassa quota. Delirio de la zente che ziga "Viva l'Italia", che svèntola bandiere, che àgita el "Piccolo", el quale se verzi co el tìtolo a tuta pàgina: "L'Italia in ogni cuore nel giorno del grande ritorno"; "Il Piccolo", che torna anca lu, dopo oto ani, ai triestini, al posto del "Giornale di Trieste". Po' el tenpo se ga un poco calmado e el dopopranzo e la sera la zità iera 'ncora 'sai animada: scritori, atori, giornalisti, òmini polìtici girava per el Corso; me ricordo de aver visto el scritor e pitor Carlo Levi, gènero de Umberto Saba, che tigniva co la cinghia do magnìfici cani, tuti compagni.
Femo un poco de storia de Trieste e de la zona in sti ùltimi ani. Dopo l'8 setenbre 1943 i tedeschi fa nàsser el "Litorale Adriatico".
Dal 1° magio al 12 giugno 1946, i quarantasinque giorni de ocupazion de Trieste da parte de i soldài partigiani titini.
A Parigi 10 febraio 1947 vien firmado el "Trattato di pace" co la creazion del "Territorio libero di Trieste" (T.L.T.): èsodo da Pola, da Fiume, da Zara, da tuta l'Istria de miliaia e miliaia de Italiani co le su povere strasse. 9 magio 1952: "accordo di Londra": in Zona A l'aministrazion civile passa ai italiani, la B vien incorporada completamente da Tito. Giugno 1953: Tito pretendi qualcossa anca de la Zona A; alora el Pres. del Consiglio Giuseppe Pella sposta verso el confin de le divisioni italiane. 8 otobre 1953 dichiarazione bipartita che "a titolo provvisorio" la ne prometi la completa amministrazion de la Zona A (in segreto in via definitiva). 5 otobre 1954, el "Memorandum di Londra", per el quale le trupe italiane le òcupa Trieste el 26 otobre 1954. El "Trattato di Osimo" meti fine a le "controversie", ma le tere giuliano-dalmate no le ghe xe più.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
Come canbiare el mondo
El mondo xe drio passàrsela maloto. Xe necessario intervegnere. Ma come? Canbiando la cossienza, el cuore, l'imaginazion
de Mario Klein
|
