|
Vita de na volta (in dialeto rùstego de la Bassa)
El riscato
 |
| Partejani de la Bassa (Pontelongo, 1945) drio festejare la Liberassion. |
Rino el jera on omo, cofà tanti altri, sposà co coatro fiòi; elo a la so fameja el ghe voléa on mare de ben, e coando che 'l ga visto che a so fiòi no 'l xe bon da garantirghe na vita come che el se intendéa elo el se ga messo 'nte na banda de ladri e el xe nà a ciordire. Per tre-coatro volte er la ga fata franca ma dopo i carbunieri, con tuta la so banda, i lo ga ciapà e messo in buso ai Pauloti de Padoa. No xe passà tanto tenpo che l'omo ga capìo da 'ver sbalià e el se ga ciamà gramo a la morte, el gavarìa volesto tornare indrìo par no fare pi quelo che 'l ghea fato, ma ormai quel che xe stà xe stà. Al processo el ga ciapà pi de vint'ani be bojosa e i lo ga mandà 'nte na galera de la Bassitalia. Rino ga tacà a revédarse, el xe deventà bon, passiente e premuroso con tuti: se capìa che 'l jera drio canbiare vita. Intanto xe s'ciopà la guera e col tenpo ga tacà anca a petar doso le bonbe. L'omo, che el ghea pràtica, el se ga esibìo a nar cavarghe la spoleta a tute quele che petava basso drio al mare e 'nte i pra e ca no s'ciopava gnanca; el mestiero el jera gran pericoloso ma elo er lo faséa co gran inpegno e amore. On bruto dì na bonba de le pi grosse la xe petà 'nte la prason e la ga fato el disastro. Rino no se ga fato gnente, alora el se ga dà sùbito da fare par salvare jente: el ga tirà fora tri secondini che i jera stà intrapolà soto a on rojo de travi e conventini, el ga scavà co le man 'nte i ruinazi, tirando fora on mucio de ferìi e de morti e có xe stà in ùltima el ga podesto scapare a casa. Anca in fameja, i so parenti e i so amizi i s'à catà davanti a on omo canbià de sana pianta, ma la jente cà no saéa e ca no capìa i lo vardava de traverso. Gnissun lo saludava, gnissun ghe parlava, tanti i lo schivava e da tuti el jera segnà a déo e anca quei che se ghea reso conto del so canbiamento i lo considarava pi par quelo che 'l jera stà e non par quelo che 'l jera deventà. Rino, 'ntel capire e védare ste robe el staséa male parché drento de elo el se sentìa nantro.
Na sera xe vegnù a catarlo on so amigo che jera 'nte i partejani; i du òmani, dopo 'verse parlà par tuta la sera, a la matina drio i xe partìi tuti du par la montagna. Có i xe rivà a la malga, refujo de i partejani, el capo 'pena che 'l ga sentìo chi che jera Rino, el ga dito sùbito che là no 'r lo voléa, disendo che i partejani no i xe na banda de ladri e che gnanca no i vole èssare el refujo de i ladri. Sto capo no 'l ga gnanca fato ora a fenire sto discorso che xe rivà na stafeta disendo che xe in corso on grande rastrelamento e che i vardesse da scapare. Sti tusi i s'à tolto sù tute le so tanpeline e i xe partìi par nare 'nte de le posizion pi sicure e, par forza o par amore, i ga cognesto menarse drio anca Rino. Al di drio frà tidischi e partejani ghe xe stà on gran conbatimento; Rino el ga dimostrà tanta bravura e on corajo da leon, el ga salvà du partejani da morte sicura e elo el xe stà anca ferìo. In sèguito sti partejani i ga capìo che l'omo el ghea on core grande: el jera bon, jenaroso e premuroso con tuti. Se ghe jera poco da magnare el staséa indrìo elo pur che magnesse chel'altri, se ghe jera poco da vestire elo el se toléa la roba pi frusta e elo ghe voléa ben a tuti e tuti ghe voléa ben a elo. I montanari i lo vedéa tuti de bon ocio par la so creanza e bravura, e có 'l ghe n'ea de bisogno, i jera senpre prunti a darghe da magnare e da dormire. Col passare del tenpo, par la so bravura, el xe passà capo scoadra e po' comandante de brigata. Tidischi e bande more có i se catava a frontejare i òmani comandà da Rino i saéa senpre da 'vere on osso duro da rosegare e anca el pi de le volte i ciapava le fòrcole e no se sa cossa che i gavarìa pagà pur da brincarlo. Rino anca se el jera in medo a tribilazion e al perìcolo el jera gran contento, ormai el se sentìa rifrancà. On bruto dì par de i mutivi che reguardava el so laoro con de i altri capi partejani el xe vegnù in pianura e ghe ga fato gola nar catare so mojere e so fiòi, ma na fémana che jera in conbuta co le bande more la lo ga cognossù e fato la spia. A la matina presto bande more e tidischi i ghe ga circondà la casa, i lo ga ciamà e invità a 'réndarse. Rino che 'l jera armà fin ai denti e che el corajo no ghe mancava, el voléa farghe fronte, ma coando che i ghe ga dito che sa no 'l se 'rende i lo brusa in casa con tuta la so fameja, alora el ga cognesto a darse 'nte le man. Ai tidischi e a le bande more no ghe paréa gnanca vero da 'vere brincà cussì a boca dolze on capo partijano de chela fata lì. Có i lo ga bu 'nte le sgrinfe, al dì drio i lo ga picà; l'omo xe nà sù 'ntel palco de la pica calmo e sereno cofà on anjoleto; passando par davanti a le bande more el ga dito: "A dovaressi a èssarghe valtri coà" e coando che 'l boja ghe ga messo la corda 'torno al colo el ga visto che ghe tremava le man e alora el ghe ga dito: "Ti te tremi e mi nò!"
Chel capo partejan che a la malga a tuti i custi no 'r lo voléa el ga dito: "Rino se ga riscatà, no una ma diese volte!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
Come canbiare el mondo
El mondo xe drio passàrsela maloto. Xe necessario intervegnere. Ma come? Canbiando la cossienza, el cuore, l'imaginazion
de Mario Klein
|
