Editoriale

Mi st'ano vorìa... vorìa...
La storia se ripete: có riva l'ano novo, nasse spontanea la voja de fare progeti, de inbastire sogni e de sperare che tuti o in parte i se realiza

Alza la man chi, svejàndose, el primo de l'ano, no 'l ga sùbito pensà o dito: "Speremo che sto ano la vaga mèjo de quelo passà! Lo spero tanto!"
Gnente da dire: l'inportante xe capire! I ani, i giorni, le stajon, i avenimenti i se mucia uno sora l'altro, i se moltìplica, i se ripete come le spighe t'on canpo de formento, come le face de on diamante... El desiderio de l'omo el xe senpre el stesso: "Speremo che sto ano la vaga mèjo!" E xe za un fato positivo pensare, desiderare, augurarse, métarse ne la condizion de chi se speta calcossa de diverso e de mèjo in tuti i sensi dal novo lunario.
E qua i "vorìa" no i se conta pi: tante teste, tanti desideri; ognuno par conto sóo, tuti zerca de tirare aqua al so mulin. Ma el tenpo, el ciclo solare, l'ano novo no 'l varda in facia nissun, el tira 'vanti par la so strada, portando i canbiamenti, ma che non senpre corisponde a quei che se se spetava nialtri. E 'lora nasse le delusion, le crisi, le depression e se ris-cia de nare in dóe fin da la prima suta.
La lista de i desideri de Capodano la sarìa longa come l'ano de la fame. Eco na mama dire: "Me piasarìa che st'ano ch'i tusi i metesse sù fameja: a son stufa de lavarghe e stirarghe chée quatro straze! A xe ora che la ghe pensa ela pa 'l so omo. Mi, xe da quando che go finìo la terza che i m'à messo al mastelo!"
Stufa del sòlito tran-tran, na mojere dirà: "Chissà che st'ano gabia la grazia che 'l me porta a fare on viajeto chel tàngaro che go in casa: a so' segregà cofà na carcerata condanà a l'ergàstolo!"
El toso pi vecio: "St'ano s'a me riva chele quatro pessarele de 'retrati a vurìa cronparme na màchineta on fià par la quale, che la sia catalizà e co do targhe, cussì almanco a córo có vojo mi!"
El fiolo che va scola: "S'a son promosso, bisogna che me lo cronpè st'ano el motorin. Senò no vao pi scola! Tanto: par queo che i m'insegna!"
El pare ga altri pensieri: "Se la va ben co la stala, par la Sunta a ghemo soto 'l pòrtego el pi bel tratore del paese. E po' vao arare so la tera d'i altri!"
Ma ghe xe anca i sogni del bocia: "Opà, no sta' dirme de nò! St'ano pa 'l me conpleano te me regali la PlayStation. I me conpagni i la ga tuti quanti e i me cojona parché mi no la go gnanca! E luri i ga anca el telefonin e mi nò. Oh, bela!"
E la tosa? La tosa: "Se st'ano no me fè na camareta par mi-mi-sola a vago via da casa. Par senpre! E no stè zercarme a Chi l'ha visto?, parché perdì tenpo par gnente!"
La sarà veramente dura afrontare l'ano che riva co tute ste prospetive! D'altronde, la fameja la xe senpre stà el specio de la socetà. E anca ne l'Europa che se va tirando sù, la fameja sarà el pi inportante termòmetro de la situazion culturale del Continente, parché xe propio in fameja che nasse i desideri, i progeti, le nostalgìe, ma anca l'educazion a vìvare in maniera più universale, più altruìstica el tenpo, l'ano novo che riva, par dirla co na parola, el futuro.
L'augurio che se femo, xe quelo de continuare a sognare i sogni nostri e quei de i altri, a maravejarse, a sorìdare, a entusiasmarse e a gòdare el spetàcolo de la vita, parché la vita la va in sèna in qualunque data e stajon.

A Colaboratori, Letori, Abonati e Inserzionisti, l'augurio de un sereno 2005 da la Redassion e da l'Editoriale Padova

[torna sopra]