|
Cultura orale
La frula sigalina
Da un sfogo de boca, su question de cossiensa, xe nata la curiosità pa un zogo poareto de na volta, quando par gòdarse bastava poco pi de gnente
 |
| ... co na muda de cocorite ca me toca guernare tute 'e matine... |
"Signora, la se la cava con poco stamatina: tri euro e vinti. Ghe serve na borseta?"
"Me ne farìa còmodo de sicuro una come ca digo mi, piena de schei da spèndare, te sti giorni mati, sensa tanti struchi, come ca me càpita ogni matina có verzo i oci. E po' me vorìa vint'ani de manco, chissà ca podesse cavarme calche spissa anca mi ca no go mai podesto frìzare co la padela de i maroni, come me sarìa piasùo fare col me vecio, almanco te sti ùltimi ani che 'l me xe canpà. Invesse ara qua, ogni ano senpre pèso, me toca cassarme in rio cofà na remita par tuto l'inverno. I mìi i va in vacansa ai monti dove ca se slìssega so la neve, tiràndose drio na garavana pi longa de quela de i sìngani, on catafalco grando senpre ca ghe vole tri frati pa benedirlo tuto. Lori i se ne ciava de la vecia de otanta barete gajarde co i so vodi de suca."
"La làssei casa da sola?"
"Altroché! In conpagnìa co na muda de cocorite ca me toca guernare tute le matine e s'a me vien voja de radegare col Padreterno me asio tel fare la frula sigalina 'ndando 'torno al spessegar de pipio de le do bestiole in gabia e t'ò da dire che romai se la intendemo puitin, magari insanguanàndose so le nostre miserie prisoniere de solitùdine. Descùsame, valà, bionda, s'a me so' cavà dal patusso del magon propio co ti ca no te ghe centri n'ostia co i me despiasseri. M'ò lassà scaldare el figà cofà na tuga che no vale un scotà, ma so' sbrissà via gualiva forsi parché te ghè tante somejanse co me neoda Clareta che gavarà su par zo la to età, partìa anca ela in rulote. Chissà ch'i se giassa la batarìa! Spero che no te gai butà zo de levà el me sfogo de lengua, a ti ca te ghè l'òbligo de trabaldare co 'e palanche fin stasera. 'Desso te saludo e vago a métarme suso na pignatela de aqua par bójarme sti du articiochi."
"Signora, la tegna el resto."
"Te ghè rason, cara, grassie tante. Có la me monta de bruto me vien parfin le scaldenele che m'inturbio el spartire del sarvèlo. Perdonème anca voaltri, savìo, s'a v'ò tegnù na s-cianta al balso, da sfaciatona, desmentegàndome che ognun ga i so fati da tèndare, ma so' agra de sorbir velen. Chissà che na volta o l'altra me ciapa un colpo fisso, de quei che strussia dal tuto i me trìboli so sta tera e me mena a le piopete a incontrarme co la bonànema del me omo."
Eco, zio Nerio, te go portà la spesa che te serviva e anche i sìgari che te premeva più de tuto, ma come che te ga sentìo, so' rivà co sto gaitelo che te ghè scoltà, na frinfrogna a prova de spùo tondo su aqua morta in giassarina.
Sì, magari te na sbuidèra co la colma? Vien a la cànola ca me bruso da l'arsura de la to voja de saére, ca vedemo sa semo boni de darghe la zonta a la bocàla anca co sto calìgo ca no se ghe vede gnanca a biastemare.
Sì, barba, m'à gratà un fià par drento le lagne de quela noneta bandonà che me xe tocà scoltare, spetando in fila de pagare sti pochi de gènari che t'ò cronpà come che gèrimo restà intesi par telèfono.
Cossa gheto speso? Dopo faremo conti, intanto lassa che te parla de sta grama. De i so s-ciantisi spuài fora da i denti cussì snisìi e sensa retegno, me ga messo in confusion de suca quela frula sigalina che no so' stà bon de capire cossa che la sia. Me vergogno de pissare torbio senpre sul to sèlese, 'desso inbiancà de bròsema, ma go la vessiga come na sponga che ghe serve del paciugo par farla vegnere in sì. Te darò mi la minela ca ghe vole par infarinarse a le svelte e sbrissare via come na lissegarola su la molaissa. Crédeme s'a te digo che da bocia go zogà anca mi co quel trapelo, uno de quei pareciài da Barboche, l'ùltimo de i salariati tolti suso da to poro nono prima ca ghe vegnesse fora le varicose te i polpassi che lo ga condanà i so ùltimi ani co' i pìe posài sora el cavaleto de la bugà. Sta mesa cartucia el gera alto poco pi d'un scheo mato, ma el gavéa do man de curame che 'l rebaltava el mondo e na testa tajenta cussì gussà da l'inzegno che gnente ghe vegnéa da novo. A chi lo toléa in berta par via de la so gnomisia el ghe rebatéa de paca:
"Fin che 'l spilungon s'inchina el narabòtolo liga la fassina." Da la franza de le feste ca se copava el mas-cio el ne faséa la striga a tuti noaltri snarociuni de la corte. Quando to nona broava i penini del porselo par pareciare i pàpari, la ghe metéa da parte i ossi spolpài puìto. Lu el li secava tel camin de la lissiara, pa no fare spussa in cusina e co un trivelin, a metà precisa, el ghe faséa do busi fora par fora, po' el ghe passava a giro un tòco de spago da saladi ingropando fisso i do cai. Rente a la zontura de i ossi el ghe faséa de i altri foreti pi pìcoli, sercando de svodarghe la megola pi che 'l podéa. Quando el laoro gera conpletà, el ciapava i spaghi co tute do le man, 'vendo la vertensa de inpiriolare ben l'osso prima de tacare a frulare, tirando e molando le do àsole, davanti ai nostri oci che lo vardàvimo imagài a boca verta. De le volte el se metéa a frulare anca co un boton cavà dal pastran militare de to bisnono che lu doprava sul fenile, dove d'istà el se butava a fare un passacuore dopo disnà, ma quela gera na tràpola de repiego che faséa solo un fià de rusa lesiera che ghe somejava pi al sbàtar d'ale de la sigala.
Barba, no ocore che te vaghi de longo 'ncora. L'inzegno contandin che te ghè stanpà te la to memoria sarìa proprio un pecà che 'l 'ndasse perso. Ti no te te ciapi mai indrìo co gnente. Grassie tante.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Mi st'ano vorìa... vorìa...
La storia se ripete: có riva l'ano novo, nasse spontanea la voja de fare progeti, de inbastire sogni e de sperare che tuti o in parte i se realiza
de Mario Klein
Cultura orale
La frula sigalina
Da un sfogo de boca, su question de cossiensa, xe nata la curiosità pa un zogo poareto de na volta, quando par gòdarse bastava poco pi de gnente
de Dinerio
Da Verona
El me mercatin
de Giacinta Dall'Ora
|
