|
Da Adria (RO)
La Nilde
 |
| Piero S-cìchena l'era tentà de tacar boton... |
Ormai i fiòi i jera tuti grandi. Solo la Martina la staseva ancora co ela spetando de maridarse, parché el moroso la ghe l'eva da un tòco ma, co la scusa de catar casa, de sistemarse chel tanto da non averghe rogne, no i se decideva a fare el passo. No l'è che la so presensa la pesasse su la vita de la mare, parché fra lavoro, inpegni, divertimenti poco la gh'jera in casa. Cussì la siora Nilde l'eva ormai inparà a vìvere da ela sola. La 'ndaseva a catare so sorela Melia a Cavàrzere, so fradelo Piero, ch'el staseva lì poco distante, la s'inbarcava in tute le gite ch'a ghe capitava, la faseva el so viageto a l'ano de quìi organisà da qualche grupo de zovanoti del so andare, la s'jera incamesà int'un circolo de ansiani - che po' el jera squasi tuto de ansiane visto che le fémene le dura più d'i òmeni -, l'eva ciapà l'abitùdine de 'ndare tute le matine int'el Cafè Grande in Piassa dove che la catava altre sinque-siè amighe inte le stesse so condission, la beveva el cafè o l'aperitivo insieme co lore, le spetegolava un fià de questo e un fià de quelo fin a tirare a le óndese e mesa, quando tute le se levava sù p'r andare a pareciare chelcossa da disnare, esséndoghe restà int'el sangue la vecia abitùdine de quando che a mesogiorno - meso bòto, un bòto, no fa difarensa - rivava a casa marì e fioi ch'i voleva magnare. Adesso no rivava più gninsun ma l'ora de méter sul fogo la pegnata la jera na roba ch'a faseva oramai parte de la so natura; cussì, có la lanceta longa sbingolava su le siè e quela curta la jera za invià verso 'l dódese, le molava le careghe e le partiva tute insieme p'r andare a spegnatare.
La siora Nilde la jera senpre vestì in punto e vìrgola e no la gheva un pelo fora posto: da la paruchiera na volta la setimana, da l'estetista na volta al mese, a Padova par conprarse qualche strasseta nova ogniqueltanto sensa règole fisse, in palestra do volte la setimana e in pissina istesso; i so quìndese dì al mare e altretanti in montagna, d'istà; in autuno la faseva el giro de le so canpagne par rénderse cunto de persona de l'andamento d'i racolti; d'inverno la staseva ben in casa sua; in primavera l'andaseva a fare i fanghi a Abano: insuma la se voleva ben e la spendeva i so schei, adesso che la podeva farlo sensa tanti parun che critichessse o disesse chelcossa. L'andaseva in giro co chel'aria da "mi no vurìa, ma se me capitesse..." che se porta in giro più de qualche védova. Ne se pol darghe gnanca tuti i torti, povareta. La s'jera maridà ancora fioleta, lu più vecio de ela de un discreto nùmaro de ani, ma el jera un bon partito - avocato, col studio invià! - invesse ela fiola de operài, co tute le so risorse inte chel so viseto serio e dolse - almanco alora: adesso do pieghete amare le ghe segnava la boca verso in zo -, inte na figurina suta 'fà na stropa e svelta cofà un vissinelo, ma co tute le so robete al posto giusto, co chel soriseto rufian incamesà co la bona creansa ch'a gheva insegnà so mare e du oci scuri che có i se voltava verso el celo i la faseva somejare a la santa d'i sete doluri. Lu el ghe se gh'jera coto drio e ela no la ga vu el corajo de dirghe de nò. Tenpo par pentìrsene no ghe ne sarìa mancà. Defati l'avocato jera un bonomo, serio, brao int'el so lavoro, tacà a la fameja ma el gheva el difeto de la gelosìa, el gheva na paura mata ch'i ghe la magnesse, ch'i ghe la tocasse, ch'i ghe la strussiasse solo a vardarla; cussì el la tegneva senpre in casa, mai a na festa, a teatro, int'un viajo. A ela no ghe macava el pan e la polenta e gnanca el conpanàdego - ansi inte chela casa se pol dire che ghe rivava in tola parfin le lengue de gardelin! -; bela la casa, ben mobilià, insuma 'n andamento da sioroti. Però ... gh'jera un però! - so marì prima de farghe cavare i schei p'r un vestito par ela i jera suduri. E sì che no'l jera tegnoso, ma el gheva l'inpression che mandando so mujere un fiantin cincinà-sù fusse come méterla in mostra, e lu senteva odor de corni anca quando uno se brusava n'ongia int'el inpissarse na sigareta. La gheva sinquantoto ani quando ch'l'è restà védova. Fiòi praticamente sistemà, schei che no mancava, l'à pianto chel tanto che le bone creanse comandava e po' l'à mandà el morto in desmentegansa, tanto più che i diseva - le sòlite brute lengue ! - che tra i difeti so marì no 'l ghesse solo quelo de la gelosìa ma ch'el fusse anca pitosto manescon. Cussì, s'a volemo dirla tuta - nantri ch'a emo visto le robe da fora -, le vedovansa l'è stà na liberassion. No che ela la se sia messa a fare i salti de contentessa, ansi, no la faseva mancare i fiuri frischi su la tonba del morto, l'andaseva in giro co la modestia ch'a se convien a una inte la so condission; no la dava segni de disperassion ma gnanca la s-ciopava da rìdere par la strada. La faseva quelo ch'a faseva tute. Almanco pa' i primi do ani. Po', pian pianelo, come se convien a una co sale in suca, l'à scuminsià a molarghe qualche punto e int'el giro de un ano l'à fato el canbiamento che tuti podeva védare ma gninsun criticare. I so fioi int'el catarla cussì tranquila, i staseva mèjo anca luri e specialmente la Martina, l'ùnica ch'jera restà ancora in casa co ela. Pecà ch'a no ghe capitesse 'n ometo giusto e che la so conpagnìa restesse solamente quela de le so amighe, anca lore ormai pumi spessà a meso sensa st'altra metà.
Piero S-cìchena l'eva tentà de tacar boton e in prinsipio a pareva cha la siora la ghe stesse, ma è bastà poco par capire cossa ch'el sercava: mai stà maridà, senpre canpà a le spale de so mare fin ch'el Padreterno no l'à deciso de portàrsela co lu, sensa arte né parte, co na gran voja de far ben sàlteme 'dosso, el credeva de catare manza e stala, ma la Nilde la jera mina nata int'la càmara d'i salami; cussì la ga dà i oto giorni e la l'à mandà pa 'l so destin, contentàndose de la conpagnìa de le so amighe che, al màssimo, la podeva costarghe un giro de cafè, che po' el sarìa puntualmente tornà indrìo. L'à continuà a incipriarse el naso e a tegnerse sù, anca se le pieghete in banda a la boca le deventava senpre più lunghe e fonde. E có anca l'ùltima de le fiole l'è 'ndà via co chel can ch'el se se l'eva menà fora, la s'à godesto tuta la so gran casa e le so quatro palanche da ela sola.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Mi st'ano vorìa... vorìa...
La storia se ripete: có riva l'ano novo, nasse spontanea la voja de fare progeti, de inbastire sogni e de sperare che tuti o in parte i se realiza
de Mario Klein
Cultura orale
La frula sigalina
Da un sfogo de boca, su question de cossiensa, xe nata la curiosità pa un zogo poareto de na volta, quando par gòdarse bastava poco pi de gnente
de Dinerio
Da Verona
El me mercatin
de Giacinta Dall'Ora
|
