Ricordi venessiani

Febraro 1945
(ùltimi mesi de guera, sessant'ani fà)

Ghe xe chi 'ste robe se le ricorda parché le ga vissùe su la so pèle. Ai più zóvani le ghe xe stae contàe. Mi nel 1945 gero 'na puteleta de quatro ani. E alora lasso che a parlàrghene sia la voze de mio papà o, par mègio dir, riporto quelo che su quel febraro el ga scrito nel so diario.
Zorno 1: stamatina 'ndando al lavoro so' passà davanti a l'Albergo Stazion e go visto de i todeschi che portava drento mitraliatrici e cassete de munizion. Cossa ghe passa in testa ai "nostri aleati"? Zorni fa i ga provedesto a protègiar le entrate de i alberghi 'ndove i alogia co sbaramenti de filo spinà e 'desso i fa rifornimento de armi. Ghe xe poco da star tranquili! Forse i pensa al "dopo", a quando i se ritirarà e i dovarà tegnir a bada chi çercarà de ostacolarli. Se mórmora infati che i abandonerà el nord Italia par córar in difesa de Berlino, lassando ai republicani el cònpito de afrontar i aleati. Bela propestiva par nuialtri: sarà come cascar da la padela a la farsora! Go infati l'inpression che el pezo gabia 'ncora da vegnir, co patimenti, fame e prepotenze.
Più de ogni altra roba ne manca el conbustìbile. Gavemo in magazen un per de quintali de carbon (de qualità scadente, che dà apena un fià de calor) e qualche chilo de legna. Poco, par superar 'sto inverno rìgido co tanta neve. Sarìa senpre possìbile trovar legna e carbon sotobanco, ma i prezzi xe massa alti. Cussì la zente se inzegna come la pol. Xe sparìi i paleti de legno, messi ai bordi de le fondamente parché no se casca in aqua durante l'oscuramento, xe stai tagiài i àlbari e, a Sant'Alvise, parfin el stendardo de la bandiera. Xe stai portài via parapeti de ponti e parfin porte de casa desmentegàe verte!
Sera del zorno 8: taca a sonar l'alarme e come al sòlito i tol la luze. Inpissemo 'na candela e quasi xe più ciaro cussì, parché la corente che vien fornìa xe débole e le lanpadine dà un ciaror scarso, sul rosso, che mete tristezza. Fra el scuro e el poco calor che emana la stua no se ga vogia de far gnente; se fadiga a védarghe, cussì tante volte el mio diario resta fermo e mia muger no riesse a passar de ponti la biancarìa.
Mancomal che stemo 'ndando verso la bona stagion, i zorni sarà più longhi e la tenperatura manco rìgida.
Sùbito dopo l'alarme se sente tanti aerei ronzar sora le nostre teste, ma l'artilierìa no spara, segno che i velivoli xe direti da 'n'altra parte. 'Ndove 'ndarài a portar morte e distruzion co i so ordigni infernali?
La destinazion, se lo savarà el zorno dopo, xe stada Verona, 'ndove i bonbardamenti ga causà tanta devastazion.
Domenega 11: Ghe xe un fià de sol e al dopopranzo 'ndemo fora co i puteli. Se fermemo in un cafè par tor qualcossa, ma no i ga gnente: da diversi zorni xe proibìa la fabricazion de la pana e de tuti i tipi de paste dolçi e no ghe xe gnanca ciocolata da bévar. Pòvari puteli, senza gnanca un golosezzo!
A le 7 e meza de sera semo a tola e a l'inproviso sentimo 'na serie de esplosion. Sora passa un aereo e imaginemo che el gabia lassà cascar qualche "spezzon".
El zorno dopo infati, 'ndando al lavoro, vedo che xe stada colpìa 'na casa davanti al Ponte dei Scalzi, causando do morti e ferindo altre persone.
El diario, più avanti, continua cussì: Al marcà no se trova gnente, manca anca el late par i puteli.
E più in là: Da tenpo, anzi da ani, i 100 grami de saon al mese che vien dài par persona no basta proprio. Sotobanco finora se lo trovava a 20 franchi, ma ormai el xe rivà a 50, massa par le nostre scarsele. Cussì se lo fabrichemo in casa pena che riussimo a métar da parte un fià de grasso.
Me fermo qua. A parte la paura, ghe ne xe bastanza par poder far el confronto fra come se viveva sessant'ani fa e come se vive 'ncùo. Tenpi duri queli, quando se doveva contar solo sul poco razionà che se conprava co le tèssare: gèneri alimentari, vestiario, legna, carbon... ancùo inveçe le vetrine sluze de robe bele, tuti pretende e gnissun ga vogia de far sacrifiçi.
çerto, xe belo che se possa vìvar ben, ma un fià de moderazion no guastarìa.
Quanti, fra chi me leze, ga 'vùo par le man tèssare e carte anonarie emesse da i ufiçi razionamento, vardando le foto de quei documenti che fa parte de la nostra storia, farà un tufo indrìo ne i ricordi, ma sicuramente senza rinpianti.

[torna sopra]