|
Devossion popolare
Santa Cunegonda
 |
| Particolare de na statua de Santa Cunegonda. |
Questa la xe una de quele sante che qualcun ga sentìo nominare, ma che pochi conosse ai nostri giorni, e no xe fàssile trovarla gnanche su i calendari. Epure, fra i credenti d'altri tempi, la ga avù i so devoti. Arquanti pitori ga fato de i quadri che la rapresentava vestìa come na suora co l'aureola da santa, e qualche cesa ga donà un altare. Poco, se vardemo a de i altri santi che ga magari de le catedrali, ma el motivo par el quale la gera invocà, gaveva na importansa portentosa fra le done del me tempo. La gera la patrona de le future mame, le done incinte, un compito riservato, delicato e difìssile ma tanto apressà. La fede popolare ghe zontava n'altro còmpito ch'el sarìa stà na prolunga del primo e derivava - secondo la mentalità del tempo - da quel so nome strambo: Cunegonda. E sicome i putèi se meteva ne la cuna, la vegneva fassilmente interpretà come una che cuna, (cunare, dindolare) a onda, Cunegonda i pìcoli che pianze par farli indormensare. Quando un pìcolo finfotava e stentava a ciapare el sono, le mame invocava santa Cunegonda. Robe da no crédare, anche se te le ghe viste, come quando te càpita sotoman un ricamo favoloso che te par impossìbile che i sia stà boni a farlo, epure l'è là, soto i oci.
Ma le mame e le spose de campagna de i ani Venti del sècolo passà, conosseva anche la so storia, che forse no sarà documentà ma che xe credìbile parché, magari co parole diverse, la xe nominà su i i libri sapienziali e anche su qualche enciclopedìa.
Cunegonda gera la mojere de un imperatore potente e geloso che se ciamava Enrico II e che, dopo ani de bona convivensa, forse par la cativeria de qualche cortigian (vedi la storia de Otelo), la ga acusà de adulterio. Na acusa disonorante e disastrosa che podeva costarghe la vita, alora no ghe voleva tanto par métare a morte qualcun, e na dona ancora più fassilmente. Ma sicome sto imperatore gaveva bon cuore, invesse che farla copare, el ga preteso che la subisse la prova del fogo, che gera come la màchina de la verità. E qua vien vanti ne la memoria la figura de Muzio Scevola, parché la prova del fogo gera la stessa. El condanato doveva métare na man sora la fiama e tegnérghela par arquanti minuti. Se el se brusava, el gera colpévole, e i lo faseva fora a le svelte, se invesse la man restava intata, sensa gnanche na vissiga su la pèle, alora el gera inocente, lìbero e anche onorà. La santa Cunegonda ga superà sta prova, naturalmente par grassia divina, e so marìo, l'imperatore, se la ga tegnù in considerassion fin a quando el xe morto. Na volta resta védova, Cunegonda ga pensà de entrare ne la vita monàstica, la ga fondà l'Abazia de Kaufungen e la se ga ritirà dal mondo. La xe morta, santamente, scrive i stòrici, verso el 1040 e la xe sta sepelìa nel domo de Bamberga. Nel 1200 el papa de alora, Onorio III Romano, la ga fata santa. E xe stà el papa stesso, qualche tempo dopo, a dichiararla patrona de le spose in atesa de un bambin.
Come go dito prima el fato de la cuna xe vegnù fora dopo, ma la devossion ga durà sècoli e sècoli, e forse la dura ancora in qualche paese. Naturalmente la storia de la santa e de la so prova del fogo, vegneva contà in maniere diverse, anche ne i filò, ma sempre co la fede e la devossion che la meritava. Na me parente lontana che vegneva da la parte de me papà, me ga fato védare più volte un santin de sta Cunegonda a la quale la gera devota e riconossente parché, dopo tanti ani, in età non più zóvane, la gaveva avù un fiolo mas-cio, belo e san, quando tuti pensava che ormai fosse massa tardi.
A sto punto la storia de santa Cunegonda pol dirse finìa, una de le tante storie de santi, de fede e devossion popolare. Solo che, volendo, e a mi me piase anche farlo, se pol tiràrghene fora de le considerassion che mete in mostra tanti particolari, a dir poco curiosi e anche interessanti.
El tuto de la storia, come altre del resto, porta dentro riferimenti evangèlici e stòrici che xe fàssile riconóssare. El nòbile casato de partensa, un fato comune a diverse altre, spose, vèrgini e màrtiri, che se trova nel libro de i santi. El particolare de la acusa de infedeltà da parte del marìo, forse istigà da la cativeria de qualche altro, come go fato notare più sora, comune a altre storie dove la gelosia se fa tragedia. La prova del fogo, anche questa conossùa e nominà ne la storia profana ma anche ne la Bibia, come el segno de na partecipassion divina a la giustissia de i òmani. E, par ùltima, la considerassion del tardo concepimento de tante done atribuìo a na grassia del cielo, che trova el so esempio in quelo de santa Elisabeta, la mama de san Giovani e cugina de la Madona.
Volendo osservare tuti sti pìcoli ma importanti riferimenti che a prima vista pol passare inosservà, se pol costatare come l'uncineto che ga ricamà la storia de la fede e de le tante devossion cosidete popolari, parché no le gaveva l'imprimatur uficiale de la Cesa, andava a pescare nel tessuto vitale de la storia de i òmani, sacra e profana, par tiràrghene fora un ùnico grande masso de fiori, in onore de la santità, de la fede e de la devossion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Difìssile, ma necessario...
Conbàtare e oporse al fenòmeno del comercio de i putini, al tràfico de òrgani par trapianti, al turismo del sesso...
de Mario Klein
Da Belun
"Colli ameni" e montagne selvage
de Biancamaria De Vecchi
Da Verona
El Bòle
"Diese schei de bòle... col pesseto!"
de Wanda Girardi Castellani
|
