| de Wanda Girardi Castellani |
|
Da Verona
El Bòle
"Diese schei de bòle... col pesseto!"
No' gh'è veronese al de sora de i "anta" che no 'l se lo ricorda..."el Bòle". El vegnéa ne le corte, ne le piasse, fóra da la porta de le cese e de le scole col so sgabel de legno sul qual el postava la teja de rame granda e tonda e, verta la sportela el tacava a sigàr: "è rivà el bòle!..."
Veramente, i primi a inviar 'sta profession i era stà' i toscani e 'l so sigo più precisamente l'era: "L'è calda... la bólle!" E da quel: "la bólle" è vegnù fora el tèrmine veronese "bòle" par designare el castagnacio, overo... la torta de farina de castagne, aqua, sal e ojo, cota in forno e magnà, de gusto, bela (e apunto) de bójo, postà su un tòco de carta da becar...
A Verona, fin ne i ani çinquanta gh'era anca diverse boteghe che vendéa, oltre a la bòle, el "papassìn" (dolçeti de farina de castagne, pignói e ueta passa) e altre squisitesse, sempre derivà da le castagne. Me ricordo che ghe n'era una anca in via XX Setembre, davanti al me uficio, cusì ogni tanto svicolavo fóra, traversavo la strada de corsa, me rifornivo, po' 'na òlta rientrà al sgobo, infilavo i scartossi in un calto udo de la scrivanìa e ogni tanto verséa, me impenivo la boca e seitavo a scrìvar a màchina. El me paron, paraltro, che 'l gaveva el naso fin come un can da tartùfoli, quando el vegneva drento, dopo aver usmà in tute le diressioni, par scherso el me ricatava: "E 'desso dàmene un tòco anca mi senò te paro via!"
Parlemo de i ani dal 1948 al 1955... dopo, una a una le boteghete de castagnacio che riforniva anca i anbulanti i è sparide e con lore è sparì un'època de la qual tanti come mi i prova 'na granda nostalgìa.
Ma tornando al "Bòle", le prime aparissioni de 'sto personagio che ne la facia e nel vestir el faseva ricordar le piture de Rosai, i è stade de qualche ano dopo la prima grande guera. Caraterìstico, el portava 'na baretina a visiera e majoni a col alto, da ciclista con stampà sora, apunto, la marca de 'na bici. Come ò dito, el vegnéa da la Toscana portando in giro la so sèmplice arte; quela de cósar in teje de rame dal bordo basso e la sportela mobile, la farina de castagne par fàrghene 'na spece de torta molesina dal profumo che 'l passava i sete muri come la benedission.
Ne i ani Trenta, quando che 'l rivava in corte da mi co' la so padelona coerta de carta giala ripiegà più òlte, postà su l'anca riparà dal grembial bianco, al so riciamo "L'è calda... la bólle", tuti noialtri buteleti coréimo a rómparghe le tògne a le mame e po' co' la man vitoriosamente alsà a strénsar i conquistadi diese/vinti schei, andàimo a cromparse la fetina de bòle che 'l vendidor el tajava a triàngolo co' un longo cortel da cusina sensa desmentegarse de la fatìdica zonta, overo del "pesseto".
L'usansa, durà almanco trent'ani, la scominçiava a otobre co' le scole e la finiva co' la fiera de marso. Ma la bòle l'èra po' reperìbile tuto el resto de l'ano. Noialtri de Veroneta se servìvimo, oltre che in via XX Setembre (ancó ribatesà "via Negroni"... par el fato che no' te ghe cati più un "bianco" gnanca par morte morir) anca in quel de San Nazar e in Borgo Venessia.
Ancó, de bòle, se pol par caso incontràrghene 'na qualche fetina destesa su un piato de lusso, in çerte vetrine de panetiér o, bela calda come ne la vecia tradission, in casa de qualche nona, bona de usar la farina de castagne che qualche vecio frutarol ancora el tien, insieme a le miole de suca, a l'erba madre e a le faoline impresonade soto vuoto spinto, in sachetini de plàstica.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Difìssile, ma necessario...
Conbàtare e oporse al fenòmeno del comercio de i putini, al tràfico de òrgani par trapianti, al turismo del sesso...
de Mario Klein
Da Belun
"Colli ameni" e montagne selvage
de Biancamaria De Vecchi
Da Verona
El Bòle
"Diese schei de bòle... col pesseto!"
de Wanda Girardi Castellani
|
