|
Mesi e santi (in veronese)
Febraro e San Biasio
 |
| San Valentino, sti du morosi chì çerca de sveiarli fora ti. |
Se ghe nemo drio a la tradizion, tanti ani fà la primavera la se ga svejà massa presto. Era ancora genaro e 'na merla, inbrojà dal caldin fora stajon, la ga pensà de farse sù el gnaro in barba al mese fredo.
Genaro el s'à incanà 'fà un bisso e el ga dito: "Du ghi n'ò, du in prestio li torò, te sì bianca e mora te farò!"
Alora i merli i era tuti bianchi o forsi del color del bèco, comunque sia genaro l'è nà da febraro e 'l se ga fato inprestar du dì; dopo el ga scadenà 'na bufera de vento e de neve, tanto che 'l poro osel el ga dovù nar a intanarse rento un camin da indò l'è vegnù fora, moro cofà el babào, tri dì dopo.
Passà i dì de la merla, febraro el ga domandà indrìo i giorni che 'l gavéa inprestà, ma genaro no 'l ga volù saerghene. Cossì febraro l'è deventà el mese pi curto de l'ano, ma anca el pi rabioso e catìo.
Sùbito el terzo dì de sto mese gh'è la festa de San Biasio.
A San Bonifacio gh'è la frazion de Prova che la ga come protetor sto Santo e è senpre stà tradizion nar a ciapar la benedizion in cesa, par tegner distante el mal de gola.
I resti del Santo i è conservà ne la cesa de San Nazaro a Verona, portà da l'Oriente da un crociato che te la çità el s'à malà de peste. Prima de spirar el ga confessà che 'l gavéa con lu le relichie da portar in Germania: i era chele de San Biasio e de Santa Giuliana, che 'l cavalier el ga volù lassar al convento indò l'era stà assistìo.
A Prova ogni ano gh'è 'na gran sagra dedicà al so Santo protetor e 'na olta, in chel 'ocasion - mi era buteleto ma me lo ricordo ben - davanti a la cesa i faséa la sfida de la pastassuta. Tri o quatro volontari i se faséa ligar le man dedrìo la schena e i dovéa afrontar la terinà de bìgoli che i gavéa davanti a lori. Ci li finìa prima vinçéa.
Da San Bonifacio a Prova (un paro de chilòmetri), se ghe nava a pié anca par scoltar 'na màscara del logo che 'l fa el so discorso ogni ano. Sto personajo el gh'è senpre e el se ciama "el Sìndaco de la Gramegna". El discorso, senpre in rima, che ormai da un lustro ghe 'juto a inbastir sù mi, godéndome un mondo, l'è direto al Comune de San Bonifacio e el ghe rinfacia tuto chel che no è stà fato te la frazion e nel capologo e chel ch'è stà fato mal. No gh'è mai gnente de ofensivo, ma solo calcossa de becantin che, fasendo rìdar, el dà de le freciadine e ci ga da capir capisse. Come dir che ridendo e scherzando Bertoldo el se confessava.
Senpre da bocia, me ricordo che con me nona Erminia partìvimo presto da casa a pié e quando rivàimo a Prova, nàvimo in casa del pitor Nani Morin, che 'l stava poco prima de la cesa. Là catàino senpre frìtole e galani e 'na bela cìcara de cafè de bojo che ne scaldava un fià.
Febraro l'è anca el mese de Santa Polonia, tanto cara ai butini parché la ghe porta 'na manceta par ogni dentin da late perso.
Se sa che la Santa, za avanti co i ani, l'è stà ciapà da i pagani che i ghe ga fracassà le massele faséndoghe nar fora tuti i denti. A ricordo del so martirio è restà sta bela tradizion indò la Santa, co la promessa de un dente novo, la vien a ritirar chel ch'è cascà e al so posto la lassa 'na palanca.
El 14 se fa vanti anca San Valentin che no se sa se 'l sia esistìo o nò. San Valentin l'è deventà el protetor de i morosi parché in sto tenpo la natura la se sveja, i useleti i scominçia a farse sù el gnaro e cossì se sveja anca l'amore.
Ancò la festa pi che religiosa l'è laica e sto giorno el fa sì contenti i morosi, ma anca i comercianti che i pol védar 'na spera de primavera in chela gran crisi che de sti tenpi l'Euro el ga procurà a tuti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Difìssile, ma necessario...
Conbàtare e oporse al fenòmeno del comercio de i putini, al tràfico de òrgani par trapianti, al turismo del sesso...
de Mario Klein
Da Belun
"Colli ameni" e montagne selvage
de Biancamaria De Vecchi
Da Verona
El Bòle
"Diese schei de bòle... col pesseto!"
de Wanda Girardi Castellani
|
