Quatro Ciàcoe - Editoriale - Aprile 2005

Quatro Ciàcoe
Mensile de cultura e tradission vènete

de Mario Klein

Editoriale

Massa parole in circolassion!
No la xe gnancora na epidemìa, ma poco ghe manca: sarà ben tacare a dire parole a... boche alterne

Eco qua na persona che savéa pesare le parole, Giorgio Lago, purtropo sconparso a 67 ani, el giorno 13 del mese passà (ne la foto LuPe, insieme co Mentana)

Proprio cussì: oncò parlo mi, doman te parli ti! Se inveze volemo continuare a produre parole, quante ghe ne butemo fora 'desso, a ris-cemo de lassarghe el penaro par disorientamento crònico. Ormai, quela de le parole, la xe na industria pi che "fiorente". E no xe el caso de parlar del fenòmeno Nordest, no ghe xe assolutamente bisogno de esportare el "modelo vèneto". Tuti ga catà la vena giusta e le parole ga fato on geto alto... da farghe invidia a quei che cava fora l'oro nero da le vìssare de la tera.
L'inquinamento da "parole pesanti" xe al màssimo stadio: no le se alza gnanca pi da tera: sarà el caso de fare, come par el late, le "quote parole". Gnente pi de tante a boca, parché ghemo za superà el lìmite consentìo da le norme anti-inquinamento verbale.
A ghe xe poco da dire che i tosi che va in discoteca i vien fora intronà dal bacan del diàolo ch'i va a scoltare. No la xe difarente par chi no va in discoteca ma el va in qualsiasi altro posto: strada, piaza e casa conprese! Prova a sentarte in casa e inpizarte la television par farte conpagnìa: a tute le ore del giorno e de la note, te te sorbissi on sgiavento de parole: la pi parte vode, grosse, grasse, insulse, inùtili, maliziose, false, paciolose, zaltrone, ofensive, senza cao, boriose, radegose..., na scaretà de pancianade che stufa siè paesi!
Ciapemo, tanto par fare on esenpio, i polìtici de mestiere, che i parla, i parla, i parla: quei de on colore i dise che i ga reson lori, quei de nantro colore i sostien che i ga reson lori... Chi xe che alora ga torto? Noantri che no ghemo gnan verto boca!
Ma no la xe difarente gnanca in altri canpi, sport in testa. Dal delito de Cogne al sequestro de Giuliana Sgrena, dal tran de Padova a le sorele Lecciso, dal gol anulà al Chievo a Unabomber de Mota de Livenza: su tuto vien fato scórare fiumi de parole, al punto che spesso se catemo portà da la corente... a dover dire la nostra anca noaltri! E, se no te fè cussì, te resti tajà fora, te passi par uno che no val on scheo, uno che no xe bon de fare el so mestiere.
Con questo no xe dito che te 'l zélese de i discorsi no ghe sia destirà parole sensate, giuste, necessarie, bone cofà 'l pan 'pena fato; no xe dito che dovemo cusirse la boca o deventare on mondo de muti: a femo po' dopo ora a tasere par senpre! Ghe xe, pitosto, la necessità, l'oportunità de ridure el canolin de la boca, in modo che passa manco parole.
Fare quatro ciàcoe (o scrìvarle!) xe consentìo a tuti; tegnerse in esercizio vol dire darghe corente a le cèlule del zarvelo parché no 'l s'inturbia; comunicare le propie emozion, vèrzarse fora, darghe parola ai altri, scanbiarse na opinion, fare na ciacolada tanto par straviarse on fiantin el fa bon sangoe; però, métarghe senpre la pezeta so tuto e su tuti, el xe on difeto che, col passare del tenpo, el pol deventare na deformazion professionale che porta a fare na brentana de discorsi in più... anca so 'l stranudo del gato!
E sicome "chi prevede provede", xe ben che anca mi la finissa qua, prima che qualchedun me ricorda che le "ciàcoe no fa fati", come se mi ghesse vossudo contarve la storia de l'orso.

[torna sopra]

Archivio

2022