|
Da San Bonifacio (VR)
Pissacani e molesini
 |
| Molesini: gran salata de primavera. |
Noantri semo gran fortunà: ne basta far un paro de chilòmetri e semo za te 'l regno de le verdure pi bone e genuine del mondo. Su le coline che ghe fa da mantelina a Monteforte e indò l'ua gargànega la ga el so regno, pissacani e molesini i se sveja ai primi soli de la bona staion e alora basta tor sù 'na cortelina e un par de sacheti de plàstica par far cacia.
L'aria la se fa pi dolça in alto e l'invita a star fora, par netarse i polmoni da tuto el marùsene mucià sù in inverno stando rento casa, o nando a spasso par le strade del paese. De sòlito gh'è 'na dona grossiera che la bate le me zone e de le olte par che se demo apuntamento soto le vegne, par sfidarse a ci cata pi erbe da métar in teja. Ela la ga pi mestier de mi, parché la se porta senpre drio 'na casseta de plàstica indò la se senta par curar ben i pissacani da la tera e no la taja mia ia tuta la raisa, parché ghe piase el maròtico che la ghe dà a ste erbe. I molesini no la li varda gnanca parché a so marì ghe piase la verdura cota, no chela crua, cossì mi ghi 'n posso catar sù fin che vojo.
Se semo un fià distanti, la canta pantesando par via de tuta la cicia che la se porta drio, ma la ga 'na oçe bastanza intonà, anca se le so canzon i è pi da ostarìa che da mare de fameja co un bel gropéto de fiói da tirar sù. Mi ghe sto senpre distante par du motivi: el primo parché me vergogno 'na s-cianta de far chel che la fa ela, come omo, e dopo parché go osservà che la ga da 'ver un disturbeto, assè poco sinpàtico, che 'l se presenta ogni olta che la se cucia a tor sù un pissacan. Sa gh'è zente 'torno el fato el pol crearghe calche problema psicològico difìçile da superar, cossì mi sto senpre un fià in là par farla sentir pi lìbara e no 'ver rimorsi.
Par come i tien le vegne 'desso e l'anbiente indò le vive, deventa senpre pi difìçile catar retài de vegro indò se raza pissacani e molesini e alora bison spostarse in pianura, parché calche prà el gh'è ancora. Ma bison star tenti parché spesso l'erba l'è giala e alora vol dir che i contadini, par non doparar la zapa, i ga spianzà col velen. Mèjo canbiar teren alora, parché senò se ris-cia de métar in teja de la roba che fa s-ciopar el figà. Altro che verdura genuina!
Anca chì cato senpre s-ciapi de done che tira sù pissacani a tuto nar, circolando come pàssare sora 'n'àlbara e contàndose robe che ghe fa indrizar i cavéi su la testa de ci li ga. Una la contava che la ghe dà da ber a tuta la so fameja l'aqua indò la ga coto le erbe parché cossì se purga el sangue; 'n'antra la diséa che ela te i pissacani la ghe mete 'na testa de ajo par via de i vermi de i fiói; 'na donona bela in carne la contava inveçe che ela la condisse sta verdura co lardo e panzeta e pi la ghi 'n mete e pi la deventa morbia e saorìa. "E pi ela la se slarga!" go pensà mi.
Insoma, la primavera la riesse a menar in canpagna un saco de zente, anca parché è finìo el tenpo de le vache grasse. Pi i cala le tasse e pi cresse la roba te le boteghe. L'an passà go isto dal frutarol i pissacani a du Euro e mezo al chilo! Ohè, fiói, du euro e mezo i è 4.840 franchi vìrgola sessantaoto!!! Se tornasse al mondo me nona par chei schei lì la se fruarìa i zenoci fin a l'osso par catàrghine sù e forsi la narìa anca a vèndarli. Anca i zucói i costa i stessi schei e pensar che 'na olta i nostri veci gnanca i podéa védarli. Un me zio el diséa senpre de la roba che no sa da gnente: "Orca de un'eva! 'Sa elo sto magnar!? El sa da zucolo!"
Pi l'Euro el cresse e pi se vede zente cucià a catar sù erbe, a spigolar pomi, a rancurar panoce, a vendemar receti de ua lassà indrìo su le vegne par farse un fià de vin. Gh'è ci va a fonghi e l'è 'n esèrcito de òmeni e de done. Par de èssar tornà a sùbito dopo la guera, quando tuto vegnéa bon da métar soto i denti. Alora che se podéa magnar, no ghi n'era, 'desso che ghi n'è, bisogna far de manco par tute chele marogne che se porta drio el "benèssere". Ma i dotori no i ghe tol mia la verdura ai so pazienti. Anzi! Basta che no la sia condìa come chela de la dona in carne, se pol anca sgionfarse. Se se sente lizieri, ariosi (tanto!); pronti a ciapar el volo come de i Zepelin ancorà co 'na corda par no scapar sùbito ia.
Ghe ga vossù l'Euro par farne tornar a le sane abitùdine de 'na olta e i ga anca corajo de dìrghene de mal! Rivaremo a riciclar tuto col tenpo, anca le scorze de fasolo e chele de i bisi...Cucina sana, vegetariana...Basta stómeghi in fora e panze al vento. Ma lo savìo che belo poder védarse ancora i piè!?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Massa parole in circolassion!
No la xe gnancora na epidemìa, ma poco ghe manca: sarà ben tacare a dire parole a... boche alterne
de Mario Klein
|
