Quatro Ciàcoe - Le zuche - Aprile 2005

Quatro Ciàcoe
Mensile de cultura e tradission vènete

de Bepi Famejo

Vita de na volta (in dialeto rustego de la Bassa)

Le zuche

Zuche al sole. parché le sia manco acoarize e pi farinose.

Na volta ghe jera tante qualità de zuche che adesso la pi parte no le ghe xe pi. Ghe jera le zuche marine che quele le ghe xe ancora; fra queste ghe jera, e ancora ghe xe, quele da la bareta che le jera le mèjo e le più farinose che se podéa anca inpastare i gnochi. Ste zuche le se magnava, e forse le se magna anca adesso in tante maniere: cote 'nte l'acoa, soto el testo o 'ntel forno de la stua, le se metéa 'ntel menestron de verdura, le se magnava col pan o co la pulenta e se faséa i "risi e zuca".
Le naséa somenà 'nte la prima sitimana de aprile, drio le passaje morte de i urti, de fianco de i porzili e 'torno le casote de le molonare parché co i so lunghi cai e co le so grande fojaze le faséa tanta onbrìa e le tegnéa frescura. Coando che se vedéa na zuca de pingolon bisognava sùbito farghe on sostegno, parché come che la cressìa col so peso la se destacava dal pecolo o la sgorbazava el cao. Adesso ghe xe na coalità de zuche, anca co la bareta, che le se sómena a tuto canpo e le ghin fa on stravento.
I ortolani i le vende anca a tòchi da setenbre a aprile e i le taja co la sega, parché a tajarle, come na volta, col stegagno la xe na danazion maledeta.
Po' ghe jera le zuche nostrane, manco bone de quele marine, che de sòlito se ingrassava i mas'ci, le se somenava da S. Marco, 'nte calche scurzolara e in medo la pulenta; ghe jera quele a coste, quele sbrocolose e quele tute lissie, le jera de colore verde, dalo o tute smaciazà e ghe jera quele co la sgussa e quele senza. Po' ghe jera i zucòi ortolani che i fa parte anca luri de la fameja de le zuche, ghin jera de verdi e de dali, i se magnava tajà a fete, infarinà e friti, o coti 'nte l'acoa e po' conzà in salata con tanto pévaro. Adesso inveze i se magna 'pena che i ga butà via el fiore. Ghe jera anca le zuche da beleza, pìcole, sbrocolose o lissie de tanti culuri, che le jera bele che mai da védare e le se doparava come soramòbile.
Po' ghe jera le "zuche da bévare" che adesso no le se usa pi, ma chissà da coanti mejari de ani che l'omo co chesta chì el se ga fato recipienti da acoa, cazoti par bèvare e scudele par magnare. Parché na zuca la tegnesse bon el vin, bisognava che la fusse invinà, che voléa dire, prima da dopararla, 'assarla par na sitimana piena de vin o de fondaci; po' parché no la nesse rota e par farghe do reciare par portarla, la naséa ingabià cò le strope. Quei che ghea passion da nar noare, con coatro zuche, ligà do a do co la corda, ghe saltava fora la maniera da poder stare sora acoa cofà i materassini da spiaja che ghe xe adesso.
Da i zucari de quele marine, de quele nostrane e de i zucòi se rancurava el fiore "mas'cio" che 'l jera tanto rizercà par magnarlo indorà e frito; ghe xe de i ortolani che, a la so stajon, oncora 'desso i li vende. Da le zuche nostrane vegnéa rancurà con cura le megole che con quele se faséa le "megolete salà" che le se magnava par passatenpo, de sòlito caminando, al cìnema e par le ostarìe parché le faséa on bon bévare; le se faséa anca in casa co 'l brustolin da cafè. Ghe jera anca na coalità de zuche salveghe che le cressìa drio le passaje e drio i fossi, che i ghe diséa le "zuche spadare", che le so raise le jera tanto rizercà par fare le medizine. Có te passavi par le strade de la Bassa Padoana là de otobre 'nte le finestre de i granari te vedivi ste bele zuche marine de color zénare, verde o rosse che le ciapava el sole parché le fusse manco acoarize e pi farinose.
Le zuche, màssima quele nostrane, el jera on ortajo de poca sostanza e forse jera par quelo che a uno "duro de conprendonio" se ghe diséa: "Ti si on zucon."
I tosati de na volta, pi che altro par gòdarse, co na zuca nostrana i faséa la fasela o lumaza: co la rimioleta i ghe tajava la cùgola, i ghe cavava le buele e le megole, i ghe faséa de i busi a usanza de oci naso e boca; 'nte la boca co de i grani de formenton i ghe faséa i denti e i te ghe metéa na candela drento e la lumaza jera bela che fata; de sera scuro i ghe inpizava la candela e i naséa a métarla 'nte na passaja o inzima a on salgaro drio la strada. Se passava calchedun de note e che de fasele no 'l saéa gnente, el podéa ciapare paura. Narciso el se ghea ciapà de note par la strada, 'ntel palo de la bicicreta el ghea so fiolo: coando che i xe stà inpeto a na crosara, incastronà 'nte na passaja de opio i ga visto na fasela. El tosato ga ciapà sùbito paura e incontro a so pare el ga dito: "Opà, curi forte che de le volte chela bestiaza lì no la ne vègna drio." - E Narciso: "Ma valà!... bauco!... Chelalì no la xe altro che na zuca!"

[torna sopra]

Archivio

2022