|
Da la Marca
Camini e canore
 |
| Un camin a copi, uno a cono e na canora de fornasa. |
L'edilissia de i nostri veci, quela che unquò se ghe ciama architetura spontanea o vernacolar, no podendo contar su tanti mezi tècnici o econòmici par darghe lustro a un fabricato, la çercava de caraterizarghe l'estètica puntando la so fantasìa su l'elemento pi vistoso, el camin, dove che respira l'ànima de la casa o de l'edificio. Anca se oramai se usa el termine "camin" sia in senso de comìgnolo che de ciminiera, i mureri esperti i distingue el camin, tìpico de le case de abitassion, da la "canora" che sarìa la ciminiera o fumaiolo de costrussion industriali, come fornase, fonderìe o calchere. La canora in gènare la xe a pianta circolar, altissima e dotada de 'na scaleta in fero par la manutenzion e fin a la prima metà del sècolo passà se costumava de ornarla co 'na corona de fero in çˆima opur 'na gran giràndola che assicurava un bon tiragio de la cana fumaria.
El camin domèstico inveçe el jera el pi de le volte a forma quadrata e ne la version pi sènplice l'apertura par el fumo la vegneva querta da 'na lastra de piera, ciamada "stolina", che in poco tenpo la ciapava el color del nerofumo o del calìzene. Par darghe un fià de grassia a 'sta sporgensa dal querto se ghe meteva sora tante volte 'na bela pigna de piera o 'na bala de sasso, anca par aumentar la stabilità de la covertura. Qualchedun ghe posava sora 'na statuina a forma de animal, de sòlito un leon o 'na colonba o qualche cantonal a mo' de rostro o de risso. Altri al posto de la lastra i usava do spioventi de copi o de tavele, che diventava quatro se el camin jera grando e ris-ciava de piòvarghe drento. Jera inveçe rari i camini co la covertura a forma de cono che riciamava quela de i fonghi opur quela co i merli intorno a la corona, che indicava pretension nobiliari. Frequentemente se vedeva anca banderiòle o variègole che faseva da segnavento par le prevision del tenpo prima che rivasse la TV. Su i colmi de le case private se alsava anca vere e propie ponte o cùspidi de teracota che ghe dava come un'aria oriental al paesagio, anca parché le fornase che le produseva, de sòlito Gregorj, Appiani e Tognana, i se ispirava ai modeli de la Cina e del Giapon. Oramai l'architetura postmoderna e i novi modi de riscaldamento i ga cancelà 'ste usanse che vivarà solo ne le cartoline antiche.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Tuta question de educazion
Xe ora de darghe on tajo al bruto vizio de butar par tera ogni tipo de porcarìa. Xe partìa na canpagna coretiva a base de multe, ma no basta: bisogna educare a l'órdine!
de Mario Klein
Salute
L'ansian e 'l caldo
de Mario Galdiolo
Ciàcole visentine
La Vila Chiericati Showa de Longa
A Longa, un paeseto 'pena soto Maròstega, ghe xe na vila sinquesentesca che 'ntel tenpo passà ga ospità personaji famosi e 'desso xe deventà na scola musicale e un inportante sentro culturale
de Giordano Dellai
|
