|
Ciàcole visentine
La Vila Chiericati Showa de Longa
A Longa, un paeseto 'pena soto Maròstega, ghe xe na vila sinquesentesca che 'ntel tenpo passà ga ospità personaji famosi e 'desso xe deventà na scola musicale e un inportante sentro culturale
 |
| Vila Chiericati Showa. |
A la zente de Longa no stè tocarghe la so vila. Intendèmose: se trata de zente parben, che ogni santo dì se guadagna da vìver rancuràndose un franco, che no ghe vien serto la late su i calcagni có bisogna laorar. Zente che xe bona a ubidir (Longa xe na frassion de S-ciaon), ma anca a comandar (dal dopoguera al dì de uncò su diese sìndaci ghin xe stà oto de Longa, conpreso queo de 'desso: al punto tale che parlando de munissipi e de sìndaci da ste parte se dise che "a S-ciaon ghe xe el punaro e a Longa ghe xe el galo"). Però a la so vila i ghe tien. Par esenpio, a sta zente ghe xe vegneste le suarole có 'ntel 1990 la signora Lambert, la propietaria de la vila che ghe gera prima, ga vendùo la vila col so parco intorno a la Fondassion Showa, na scola giaponese de mùsica che gaveva bisogno de un imòbile in Italia par portare chì i so alievi a fare de i corsi de perfessionamento da parte de insegnanti italiani, considerài i mèjo al mondo.
La preocupassion gera: che cossa sarà de la vila? E invesse no solo xe 'ndà tuto ben, ma la vila xe deventà anca na apressà scola musicale e un inportante sentro culturale, che sta portando onore a Longa e a la so zente.
Ma disemo do parole su la storia de la vila. La xe stà edificà 'ntel 1590, ristruturando e anpliando na costrussion colpìa da un fùlmine e conprendente do stansete afrescàe da Gian Antonio Fasolo (1530-1572), alievo de Paolo Veronese, che le se pole vèdare anca al dì de uncò. El comitente xe stà el conte Lodovico Chiericati, ranpolo de la nòbile fameja visentina che abitava 'ntel palasso, al dì de uncò Museo Cìvico. De l'architeto invesse no se sa gnente, fora che 'l ga da èssare stà alievo del Palladio. I Chiericati ga tignùo la vila tra alti e bassi fin a quasi la metà de l'Otosento, có la ga cronpà el poeta e patriota visentin Jacopo Cabianca, che 'l gaveva la passion del giardinajo e donca el ga valorizà el parco, fasèndolo deventare un paradiso de fiori, piante e colori. Xe stà 'nte i so ani che la vila la xe stà visità da personaji del càlibro de Giacomo Zanella, Fedele Lampertico e Antonio Fogazzaro, che i passava par la Longa a dare un saludo a l'amigo poeta o, dopo la so morte, a la védova Sofia o a la fiola Paola, restà da sposare.
A la morte de la Lina (cussì Paola o Paolina Cabianca la gera conossùa), 'ntel 1931, la vila xe passà ai so nevodi Mugna de Forlì, fin ai primi ani Sessanta, có la xe stà cronpà da i Tamaro de Milan e po', 'ntel 1969, da Joseph e Evelyn Lambert, propietari de possi petrolìferi in Texas e de altre vile in tuto il mondo.
Un male càncaro se xe portà via sùito Joseph, ma la védova, 'nte i venti ani che la xe stà parona, la xe riussìa a ridare vita a la vila, e de conseguensa a portare movimento anca a Longa, invitando chì i so amissi che i vigneva da i quatro cantoni del mondo. In chei ani la vila ga ospità rissevimenti fora de ogni imaginassion: el pi famoso, forse, xe stà queo par el matrimonio del calciadore Paolo Rossi 'ntel 1981, un ano prima che el deventasse par tuto el mondo "Pablito", vinsendo la classìfica canonieri ai mondiali spagnoli vinti da l'Italia.
Come che disevo, dopo la vèndita a la scola giaponese de mùsica, vila Chiericati Showa ga guadagnà na fama assolutamente merità. I eventi culturali che sucede rento chei muri antichi, che i sia conserti o conferense, atira senpre l'atension de tanti amanti de l'arte e de la cultura in generale. E i abitanti de Longa no ghe la mola de vardare co orgojo e sodisfassion verso chela vila che costituisse na parte inportante del loro èssare òmani e done de sto mondo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Tuta question de educazion
Xe ora de darghe on tajo al bruto vizio de butar par tera ogni tipo de porcarìa. Xe partìa na canpagna coretiva a base de multe, ma no basta: bisogna educare a l'órdine!
de Mario Klein
Salute
L'ansian e 'l caldo
de Mario Galdiolo
Ciàcole visentine
La Vila Chiericati Showa de Longa
A Longa, un paeseto 'pena soto Maròstega, ghe xe na vila sinquesentesca che 'ntel tenpo passà ga ospità personaji famosi e 'desso xe deventà na scola musicale e un inportante sentro culturale
de Giordano Dellai
|
