Teatro vèneto (in triestin)

"Trilogia della villeggiatura"
"Le smanie" - "Le avventure" - "Il ritorno"

El regista Luca De Fusco. (foto LuPe)

Stemo tuti per partir per la vilegiarura: no la sarà longa come quela de i viniziani (squasi tre mesi, da el Redentor a S. Martin), parché 'desso la se ridusi a poco più de do-tre setimane e anca la parola xe stada sostituida dal tèrmine "ferie" de orìgine latina. "Villeggiatura", in toscan, vol dir "vacanza in villa" e el Goldoni, che za el ghe ne gaveva tratado nel "Momolo sulla Brenta" del 1739 e ne la "Villeggiatura" del 1756, cussì el giustìfica la su decision de presentar "L'ambizion de' piccioli (che) vuol figurare coi grandi..." (Goldoni, "L'autore a chi legge" nota che precedi "Le smanie").

Gaia Aprea (Giacinta) con Max Malatesta (el so spasimante Leonardo).

Sì, el Goldoni! El xe stado el mio primo amore: l'inpression de "Sior Todaro" e de "La locandiera" no la xe sparida col passar del tenpo; prima la letura scolàstica, po' quela personale e po' el spetàcolo a teatro: el zùcaro e el cafè, i risi che devi bogir per diventar più grandi, secondo i cruci de Todaro; el brìndisi de Mirandolina,"Viva Bacco, viva l'amore..." i ga continuado a masinar dentro anca dopo che xe rivade altre perle: el Pantalon interpretado da Cesco Baseggio, "L'impresario della Smirne" (Venezia 1947, co la regìa de Renato Simoni), "Le baruffe chiozzotte", "La bottega del caffè". E tute ste vosi goldoniane le me ga portado drito a l'ano bicentenario de la morte del comediografo, el 1993. Veramente questo xe stado l'ano de "Le massere", indove la legereza de oni sèna continua per sinque ati, basta quel somesso "Siora mare..." d'inizio, de Zaneta, esclusa dal carneval, per inamorarne!
Per sto bicentenario el Veneto Teatro gaveva programado "La locandiera", "La moglie saggia" e "I rusteghi", sta ùltima comedia co la regìa de Massimo Castri. Sto regista, in t'el 1990 gaveva messo in sèna la "Trilogia della villeggiatura" in tre stagioni sucessive, a difarenza del regista Strehler che in t'el 1954 el gaveva fato un longo spetàcolo co l'union de le tre comedie che el Goldoni gaveva scrito e fato recitar (propio nel momento de lassar Venezia per Parigi) come tre copioni separadi, ma concepidi come el svilupo de un fato sociale, determinado dal conportamento de 'na zerta borghesìa che, come gavemo visto, voleva imitar la nobiltà. Anca Missiroli nel 1980 el la gaveva presentada in do serate in teatro e in television, meténdole po' in un spetàcolo solo. E 'desso vedemo cossa che ga fato in sta stagion 2005, prima al teatro Goldoni de Venezia, po al Verdi de Padova, el regista Luca De Fusco: in un spetàcolo de tre ore e meza, el ga fato recitar la "Trilogia" tuta intiera, ciapando oni distinta comedia come un ato bastanza longheto. Ma no 'l se ga limitado a questo: el primo ato - "Le smanie"- el lo ga anbientado in do case borghesi de fine Otozento; el secondo - "Le avventure" - ne rimanda al tenpo nostro (el costume de bagno de Giacinta xe eloquente); el terzo - "Il ritorno" - el se svolgi in 'na atmosfera de romanzo zalo, indove però, secondo el copion, le robe se meti, se non del tuto, squasi a posto, perché i matrimoni de Guglielmo co Vitoria e de Leonardo co Giacinta, el personagio principal de tuta la Trilogìa, i vien fati più per dover che per amor.

Lello Arena, ne la parte de Filippo, con Gaia Aprea, ne la parte de Giacinta.

Un bel spetàcolo, che ghe va drìo ai nostri tenpi anca per le "implicazioni psicologiche", che no xe propio quele che el Goldoni esprimi ne i capìtoli de i "Mémoires" dedicadi a ogniduna de le tre comedie; Goldoni che, forsi per non ofènder i viniziani, meti el logo de l'azion in te la canpagna vizin a Livorno, a Montenero, e ch'el esprimi la su simpatìa per le mode de Torino e de Francia, fazendo del cosideto àbito "mariage" el "deus ex machina" de la vanità feminile.

[torna sopra]