|
Editoriale
Tuta question de educazion
Xe ora de darghe on tajo al bruto vizio de butar par tera ogni tipo de porcarìa. Xe partìa na canpagna coretiva a base de multe, ma no basta: bisogna educare a l'órdine!
 |
| La maleducazion... no ga paura né de multa, né de aresto! (fotografà in Piaza de i Signori, Padova, lujo 2001) |
"Órdine" la xe na parola passà de moda, che riporta a la memoria on'època che no se ga mia caro ricordare, parché, quando na règola la vien inposta co la forza, xe segno che xe a ris-cio calcossa de grande, come la libertà. Ma quando el significato de libertà viene travisà e confuso col "fasso tuto quelo che vojo", anziché dire "fin qua posso rivare", alora l'órdine, a tuti i costi, el deventa na necessità.
Xe on tòco che ne le nostre sità xe nate iniziative de sensibilisazion par abituarse a l'órdine, a la pulizia, al neto anca fora casa, anca par le strade, tute le strade e no solo quele de sità. El xe on gran bruto védare chel spetàcolo che ne se presenta, quando se se ferma a on semàforo: par tera ghe xe carte, cartine, ciche, pacheti de sigarete vodi, butiliete de plàstica, volantini de publicità, giornài, straze... sacheti de scoaze! La xe na vergogna: le autorità le fa ben a minaciare multe salà contro i maleducà che sporca el "suolo pùblico", suolo che dopo vien netà a spese de tuti, anca de chi se conporta civilmente!
"La gente bisogna tocarla so 'l tacuin, se se vole che la inpara l'educazion" se sente dire in sti casi. Xe vero anca questo, ma no 'l ga da deventare on mètodo, parché senò a tornemo indrìo! Pitosto bisogna tornare indrìo so 'l sistema educativo. Co la scusa de dover insegnarghe ai nostri putèi "grandi cose", come tute le conquiste de la sienza moderna, parché no i resta indrìo, sia a scola che in fameja se trascura le pìcole règole de bona educazion!
A me fa na rabia da mati védare - tanto par fare on esenpio - putèi de 8-10 ani, che me sta tacà casa, che me passa davanti tuti i giorni, fin che son so 'l cancelo, senza vardarme te 'l muso, senza dire bongiorno o ciao! Zerco de saludarli mi, ma i fa finta de gnente. La colpa la xe de i so genitori che no ghe insegna a stare al mondo! E gnanca la scola no la ga pi tenpo de insegnarghe ste robe, de dirghe che no se buta le carte par tera, che no se ga da tacare i chewing-gum soto i banchi o le careghe, che no se ga da scrìvare so i muri de le case e 'ncora manco so i monumenti e le òpere d'arte!
Le conseguenze che lamentemo 'desso le xe fruto de mancanza de educazion de 10-15 ani fà. I dani i se vede dopo: tute ste ciche de sigarete spanpanà par tera le dà on fastidio che no sò! E pensare che el filtro de na cica el dura da 1 a 2 ani; e le gome da mastegare e le carte plastificà a ghe vole 5 ani par consumarse.
Ghio fato caso, 'pena passà Valli, 'ndando verso Chioggia, quando taca la laguna: a destra e a sinistra ghe xe na rosta de porcarìe che xe lì da ani, on manifesto de inciviltà che disonora, on pèssimo bilieto da vìsita par chi riva, parché... se tanto me dà tanto... cossa cataremo pi vanti?
E no parlemo de i telefonini che taca a sonare in cesa, magari al momento de l'elevazion, o durante on concerto o na rècita de poesìe! Na svista? Na dimenticanza? Nò! La xe tuta question de educazion. Anzi, de maleducazion!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Tuta question de educazion
Xe ora de darghe on tajo al bruto vizio de butar par tera ogni tipo de porcarìa. Xe partìa na canpagna coretiva a base de multe, ma no basta: bisogna educare a l'órdine!
de Mario Klein
Salute
L'ansian e 'l caldo
de Mario Galdiolo
Ciàcole visentine
La Vila Chiericati Showa de Longa
A Longa, un paeseto 'pena soto Maròstega, ghe xe na vila sinquesentesca che 'ntel tenpo passà ga ospità personaji famosi e 'desso xe deventà na scola musicale e un inportante sentro culturale
de Giordano Dellai
|
