|
Editoriale
Salvemo i zóvani!
Se continua a 'vere na vision inconpleta e na idea sbalià de i zóvani: no i xe el futuro, ma el presente del mondo!
 |
| Girémolo come volemo... questo xe el mondo da salvare! |
Se noaltri grandi, genitori, insegnanti, educatori continuemo a ipotecare el futuro, soratuto el nostro, puntando su i zóvani, semo fora strada. I tosi va considerà e tratà par quelo che i xe, non par quelo che i podarà o i podarìa èssare on doman.
Forse la xe na storia vecia: drio le nostre premure, le atenzion, le racomandazion che ghe femo ai tosi, ghe xe el desiderio, la ricerca, le aspetative de védare realizà in lori on nostro sogno, e par realizarlo se servimo proprio de i tosi che, a seconda del caso, li consideremo on capitale da difèndare, da utilizare, de le volte da sfrutare o da tegnere sconto par no córare el ris-cio che 'l perda valore.
Ma, cossa se spèteli i zóvani dal mondo de i grandi? No xe fàssile calarse ne la so testa e, pur tentando de nare drento te 'l gnaro de i so pensieri, ocore fare on grande sforzo de adatamento e l'incastro el gavarà senpre on fià de lasco. Ma se pol tentare e, se la ne va ben, se pol rivare a capire che forse i zóvani de oncò, quei mediamente "sani" - ch'i xe la magioranza - no i xe par gnente contenti del mondo de i grandi. No i se sente capìi, i se sente sfrutà, tanto soli e delusi.
Ciapemo i nostri mezi de informazion, carta stanpà e TV: le pàgine de i giornài e i telegiornài i xe senpre pieni de i fati incressiosi che vede coinvolti i zóvani par robe de droga, rapine, omicidi e violenza. No ghe xe mai dà altretanto spazio e notizia a tuto quelo che de belo e de bon fa la magioranza de i zóvani. Quando mai on telegiornale parla de quei che se ne frega de i movimenti de disobedienza e de le mode, de quei che ragiona co la so testa e fa el so dovere fin in fondo, de quei che se spende par 'jutare i altri...
Anca i educatori - non tuti par fortuna - i xe poco preparà a modelare la materia prima che ghe vien afidà: forse i xe cargà de massa responsabilità. E no parlemo de la fameja che, par mile motivi, pare che no la esista. Cussì i zóvani i se tien drento le so paure, i so problemi, la so voja de deventare grandi (proprio nel senso de adulti).
Una de le delusion de i zóvani la xe quela de sentirse misurà col metro de quei de l'Isola dei famosi, del Grande Fratello, o de Amici de Maria De Filippi, come se quela la fusse la mèjo gioventù. E sto anbaradan no lo ga messo sù i zóvani, ma i grandi che se serve de i zóvani par sodisfare la so manìa de narcisismo televisivo, el bisogno de contenplare la so bravura, destinà a deventare on stùpido conformismo che li bloca a na ripetizion ossessiva del solo "apparire", come se la vita la dovesse dipèndare dal governo televisivo.
Tanto, quindi, dipende da noaltri genitori, massa volte inpegnà nel córarghe drio al sucesso personale, a descàpito de la necessaria atenzion che i fiòi ga dirito de avere; genitori che no ghe 'assa ai fiòi el tenpo de sbaliare, de farse la so esperienza; genitori che no ghe fa capire che deventare grandi no vol dire avere on posto de comando o on gran conto in banca, ma acetare el ris-cio de afrontare el mondo personale e quelo sociale.
Insoma, anca el mondo de i adulti el ga da créssare... se 'l vole salvare i zóvani.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Salvemo i zóvani!
Se continua a 'vere na vision inconpleta e na idea sbalià de i zóvani: no i xe el futuro, ma el presente del mondo!
de Mario Klein
Memoria viva
La fine amara de Lombardo della Seta
La casa a Padova dove che viveva la fameja della Seta. El scritore e umanista padovan xe deventà segretario del Petrarca. I ani de conpagnìa al Poeta a Arqua e a Padova. El grande sbalio fato contro i Carraresi
de Gigi Vasoin
Da Verona
La febre del "barachin"
"'Na quarantina de ani fà, al posto de quela de i telefonini e videofonini, scopiava l'epidemìa de i "barachini"
de Wanda Girardi Castellani
|
