Da Belun

Le me pedonade

Luigina Tavi e la Chica "numero Uno".

La copertina de Quatro Ciàcoe de Aprile, dedicada a la Maratona de S. Antonio, co sti "atleti" drio córer, me à fat ciapar te le man i cartelin de le me pedonade; zerti i specìfica no sol al posto ma i é fornidi de nome, cognome, data de nàssita: tuti me ricorda momenti, panorami, persone e anca premi. No parché ò vest la grinta de rivar prima, ma parché, de i partecipanti, ere... "la manco zóvene". Zerti cartelin po' i é anca dopi: prima avée scominzià da sola, po', vist che sola me capitéa de èsser tut longo la caminada, eco che me son ciólt al can in conpagnìa, anca lu, o mèjo ela: la pi fedele e passionada, la me Chica (numero Uno) co tant de cartelin. Tornando ai atleti figuradi su Q.C. in braghete curte, no posse far de manco de rìder pensando a na gara su a Sois, una de quele olte che me son meritada la copa. Alora, rive sul posto, an s-ciant de scondion fae an fagot de la còtola messa sora pa no partir da casa in braghe curte, perché, a dirlo, sinceramente, era la prima olta che frontée la socetà; me dae n'ociada e... "Si" me dighe, "posse andar!" Là a na s-cianta, un al fa: "Tò, anca le vece in braghe curte!" e sicome, quel, sol na s-cianta pi zóven de mi al stéa a vardar, ò deciso che de corajo no al ghen'avéa manco an cin, dato che no al se era iscrit ai 12 Km. Le braghe curte, ve lo dighe in confidenza, le ò regalade al dì dopo.

Luigina Tavi e la Chica "numero Due".

La pedonada che pi de tute st'altre m'é restà tel cor, l'é quela che era stata organizada da i Salesiani: Istituto Don Bosco. Son a l'iscrizion, eco i do cartelin fornidi de spaghet, me mete al méo al col, e st'altro lo mete a la Chica (senpre n° Uno); confusion de partecipanti, an tosatel al ghe diss a na siora: "Mama, se podéa portar anca noi al nostro cagnét." E quela sta "dolce signora": "Mi no son mia mata!" e, pensar che quela matina, manco a farlo aposta, avée al stómego pi che inmagonà. "Beh!" me son dita, "fin che da mata fae sti sèst, posse ringraziar al Signor." E von fat la caminada. Al bel l'é che ancora ancói, che da ani sta me Chica - nùmero Uno - la riposa "ten canton de l'ort visin la susinara" me piase vardar la so copa.
A la premiazion, an bel momento, al Sacerdote Salesiano al fa: "Questa bela copa va a Chica Tavi: ùnico cane partecipante." Ciapando in man sto premio l'é capità che, sto Salesiano, l'ò fin basà, par el fato che al me véa vardà co an cossì gran soriso che m'à dat da pensar che al me vesse let fin dentro, e me fa tenereza la foto che ricorda "sto momento" anca se de Chica se vede sol che al guinzalio... sò che ela l'é là rente a mi! Pi vanti co i ani sto Salesiano l'ò ligà a naltro Salesiano: Vincenzo Savio, véscovo, tut par al ricordo de la prima olta che, par strada, l'ò incontrà. Lo salude e Lu, rivolto a Don Diego che 'l véa rente: "Questo è il mio segretario" e mi, rivolta a la me Chica (nùmero due): "E, questa è la mia segretaria." - "Ma è brava come il mio segretario?" "Beh! senz'altro più segreta." Sti do Salesiani i me conpagna no sol có son là che me iscrive a na nova caminada, ma so al caminar de ogni momento de la me vita.
Sfojando i cartelin eco Venezia: "Su e zo pa i ponti" / in dódese in cordata / avon portà a Venezia / an s-ciant de aria belumata. / Su e zo per i ponti", / son andati co i scarpói, / rusach, moschetói, ciodi / ciaspe e ranpói. / Avon portà a Venezia / l'odor qua de le zˆime / de queste de Belun / lontane e pi vizine. / Sonando la spineta / i ne à sentì cantar: / Venezia benedeta / Regina del bel mar. / Son tornadi có al sol / al paréa squasi na luna / e na festa de colori / al féa te la laguna / Avon portà a Belun / al zolo de i gabiani, / i ricami de le case / de tenp ormai lontani. / In cor na voja granda / tornar da ti a cantar: / "Venezia benedeta / Regina del bel mar."

Premiazion a la "Chica" Tavi.

Mi i me véa piazà, sti conpagni de pedonada, propio in mèdo cossì su i pont e i é stati propio tanti, manco riussìe a ociolar i scalin, senpre de corsa che pressapoch zolée. I sie "atleti" a l'inizio de la cordata i era belche do pa i scalin: finì al pont, che i zinque da drio i scominziéa i scalin che portéa so 'l pont. Có se rivéa a i posti de "ristoro", i primi senza fermarse i branchéa al bicér co 'l tè e... via, mi sol al tenp de slongar la man a vodo, quei da drio gnanca quela. "Ma andé pi pian, avon sé anca noialtri - Pian che no vedon gnanca i scalin." An sbraitar e an rìder e anca an cantar tut longo: finalmente "l'arrivo"! dove sta nostra "ùnica cordata", co nostra gran sodisfazion l'à vést an riconossimento special che savéa da mar, che po' là ben sentadi in treno, dopo 'ver svodà rusach e borace, avon destinà "sto premio" al C.A.I. (Club Alpino Italiano) de Belun, dove che, se i registri i avesse par caso segnà tute le "cordate che à ranpegà" la nostra de "Su i zo per i Ponti" a Venezia, risulterìe propio l'ùnica!

[torna sopra]