Da Ìsola Vicentina (VI)

Nostalgìa che ricorda

Taschent. Davanti a l'albergo 'ndove, al 22° piano, se gera 'logià: incucià l'amico Mario e po' la Mari, la Roseta, la Clelia, me cugnà Aldo, Franco e so fiolo Paolo; mi so'... drio fare la foto.

Fin che so 'a mente i ricordi va 'torno de qua e de là par la molonara e el cor bate forte, anca se 'n po' sbalà, xe belo scrìvare quel che so 'sto viajo me xe capità. De sti dódase dì in Russia, oto xe stà spesi a visitare sita come Alma Ata, Taschent, Bucharà, Samarkanda e altri caraterìstici paeseti.
El primo ricordo che me torna so 'a memoria xe quel che, scavalcando 'na grande montagna, semo rivà fin al deserto che portava a l'Afganistan pa' vedare 'ndove jera sepolìo el grande conquistatore Tamerlano. Rivà insima al passo, l'autista ga fermà 'sta spece de caretaja che ne faséa da coriera, disendo de svanpolarse 'na s-cianta e de mirar 'ste roce color griso-rosa venà de viola, che 'na volta laorà, sarìa deventà granito pregià, racomandàndone de no 'lontanarse parché 'sti posti jera famusi pa' èssare regno de i cobra.
Ne 'a dissesa verso el deserto, mi che jera sentà so 'e prime file, vardando l'autista el me paréa preocupà, la velossità po' jera massa forte, difati, có 'l se catava 'na curva davanti el faséa tanti de quei ati co' ganbe e brassi, che, se no' gavesse bio paura, me sarìa messo rìdare, invesse sensa ca m'incorsesse a pontava i pìe so '1 sedile davanti come pa' voler frenare. Có semo riva in fondo, 'sto poro autista gavéa 'na giossa par cavejo, contàndone che i freni no tegnéa, cossì el gavéa doveste doprare marce basse e so 'e curve el sercava de jutarse co1 freno a man.
Dopo 'ver visità 'sto giojelo de architetura esòtica, Ludmilla, una de le guide, ne ga spiega on po' la storia de 'sto mausolèo che '1 gran conquistatore Tamerlano el gavéa vossudo parché lì el gavéa passà tri ani meraviliosi, pareciando i guerieri del so esèrcito, prima de partir a la conquista de sita come Delhi, Damasco, Bagdad e altre ancora.
Có semo torna 'ndrìo le robe xe 'ndà mèjo e, rivà quasi in fondo a la dissesa, se gavemo fermà pa' visitare on paeseto 'ndove la povertà se daséa man co 'a miseria. Difati, no' solo la jente, ma anca 'ste pore bestie che pascolava so 'a colina jera de 'na tristessa da far pecà, tanto le jera scheletrìe. Le nostre guide ne ga portà visitare de 'e casete 'ndove i vendéa "souvenir", che pa' nar rento se dovéa sbassarse fin a mesa vita. Tatiana ne ga spiegà che gera come on ritual, pa' onorare el capo fameja che dopo ne gavarìa fato 'na calda 'coliensa. In sima de 'e tole se ga possudo 'mirar de 'e statuine, figuranti diverse persone e animài, 'na vera mostra de arte artigianal, tuta laorà a man, cusinà rento 'n giojelo de forneto che quasi ogni fameja se gavéa costruìo. Nantri semo stà incanta che so 'n posto cossì ùmile esistesse tanta braura che brilava come on fior de rarità.

Qua semo rento la pansa del turboèlica: resiste qualche soriseto... prima de scontrarse co la tenpesta!

Nantro fato bastansa burascoso xe capità có da Samarkanda se dovéa 'ndar so 'a sita de Taschent, 250 chilòmetri de 'reoplan, e dopo quasi 'n'ora pararia, có se credéa èssar rivà, se gavemo visti rento 'n uragan da far paura. Me ricordo de èssar deventà tuto stenco, co' i oci fissi de là dal finestrin, vardar sto grosso motore che faséa 'ndar torno sto po-po de èlica che paréa se destacasse. Tuti i jera seri e '1 silensio faséa star male 'ncor de pi. Ogni tanto paréa pressipitare nel vodo tanto da farme mancar parfin el respir. Cossì conta el sìndaco nel so diario: "Anca mi, come i altri, go sarà i oci a sercar corajo e me so' visto rento 'na grande cassa de legno insieme ai amissi, rivare al paese de Isola Vicentina so 'na procession de jente che ressitava orassion, davanti a tuti co 'a me fassa tricolore torno 'a vita, el vicesìndaco co' la facia da sircostansa scondéa la so sodisfassion traverso on soriseto sconto soto i bafi, mentre la banda parochiale, co' profondi culpi de tanburo, intonava la solene marcia fùnebre che faséa piànsare done e fiui co' parenti tuti."
Finalmente gavemo 'terà so 'n 'reoporto militare 'ndove se podéa védare tanti cacia da guera tuti ben 'lineà. Scortà da soldà so' l'atenti, semo 'ndà rento 'na gran sala, spetando che '1 tenpo se justasse. Intanto che se jera lì, uno a la volta se ga dovudo 'ndar ai servissi e no jera bon capiere parché có i tornava, gavesse sta facia schifà. Có anca mi go usufruìo... go capìo: no se savéa dove métare i pìe da quanta ghin gera sparpanà e, có se jera 'ncucià 'sta pìcola fasseta che faséa da portesèa la cuerséa 'pena i oci, el resto jera tuto in bela mostra. Tornà de novo in 'reoplan, tuti se ga sbotonà contare la so' espariensa, ridéndoghe sora, ma nissun ga sfiorà el parché tuti ga cognesto usufruir de ste "toilette".
Ilustrar tuto quel che se vedéa so sti gran marcà de ogni sità sarìa inpossìbie, pitosto vojo farve savere come i faséa vèndare el miele. Lo conta me cognà Aldo che '1 dise: "Prima de tuto vorìa farve savere come i faséa pesarlo. 'Lora, da 'na parte de 'a balansa i metéa sù da uno a tri pumi conforme quanto i ghin voléa quei che conprava e da chealtra, sora on scartosso, i scomissiava posare el miele. Speta ca ve digo che sta operassion vegnéa fata tolendo sù el miele da on tavolin co 'e man. Dài na volta, dài do, i dìi se inpastrociava cossì tanto ca no se destacava pi gnente. 'Lora sto qua, co calma e passiensa el se netava i dìi ciuciàndoli co 'a lengua e po' el finìa l'operassion fin a rivar al peso justo."
El nono dì, de matina presto so' montassù de pressa so l'Aeroflot che ne gavarìa portà a Mosca e... ancor 'desso me rinpròvaro de no èssarme voltà pa' l'ultima ocià a inpienarme i oci de on mondo fiabesco, fato de na 'legansa rafinà co 'e so moschèe, i so minariti, le grandiose case del pòpolo e i so monuminti che fondéa armonìa de coluri so' n vìvare difarente cristalizà, contribuendo a dar on velo fantasioso a sta civiltà. E scusè se ancor 'na volta ve parlo del soriso angèlico de quei toseti che sprissava felissità e me faséa sentir insieme, smissiando i so zughi ai nostri sogni. Invesse, ciapà da 'na smania de tornar verso casa, on pensier me xe s-ciantisà so 'a mente: "Speremo e se ricorda la strada justa pa' tornar indrìo".

[torna sopra]