|
Da la Marca
I Veneti in Belgio
 |
| "Interno di baracca in miniera", disegno de Leonida Dalla Vedova. |
In ocasion del sessantésimo aniversario de la tragedia mineraria de Marcinelle, che in Belgio la ghe ga costà la vita a çenteneri de minatori, soratuto italiani, la Provincia de Treviso col Gruppo Folclorìstico Trevigiano la ga organizà a le Case Piavone la mostra "I Veneti in Belgio - Esposizione di documenti e attrezzi dei minatori" che ilustrava le condission de vita de i nostri emigrài ne i bacini carboniferi de i Paesi Bassi. L'emigrassion italiana in Belgio la gavéa scomissià za prima de la guera, ma la ga avùo el so màssimo a partir dal 1946 quando che De Gasperi ga firmà col governo belga un acordo par l'invio de lavoratori ne le miniere, in canbio de un gran quantitativo de carbon gratuito par l'Italia. A l'inissio i tenpi i xe stai durìssimi pa i nostri, alogiài in barache scomode, pagài manco del patuìo e senpre esposti al perìcolo del grisou e de la pussière, la tremenda silicosi che magnava fora i polmoni. Un poco a la volta però le condission le xe andàe in mèjo parché tanti i ga trovà lavoro in altre industrie, altri i ga studià e i ga canbià setor lavorativo; altri ancora i se ga sposà e i se ga integrà perfetamente ne la società local e altri ancora i ga fato sù un fià de schei e i xe tornài casa.
La mostra la jera divisa in varie session: quela stòrica co i documenti come contrati originali, libreti de lavoro, manifesti sindacali, giornali e bandi; quela fotogràfica co le imàgini de vita in barca e in miniera; quela etnogràfica co i arnesi de lavoro, le lànpade, i strumenti musicali e i passatenpi del dopolavoro.
Jera esposti anca disegni fati da minatori e cartoline che i ghe mandava a le fameje ne i so paesi.
A conclusion de la mostra el grupo teatral "Raize de tera" el ga messo in sèna el spetàcolo teatral "Mina-Storia de Orfeo" che conta la storia vera de un contadin trevisan che jera andà in miniera par ciaparse i schei e cronpar 'na canpagna par i sui, mentre inveçe in fondo a le galerìe el jera deventà mato e 'pena tornà a casa el jera stà internà nel manicomio de Sant'Artemio, dove che el ga passà i so ùltimi ani co la facia al sol, istà e inverno, col teror che la tera lo ingiotisse ancora.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Bone vacanze a tuti... anca se tuti no va in vacanza!
Quela de on mondo che tira zo la seranda, che sara botega e tuti va in vacanza, forse la xe na imàgine fantasiosa e busiara
de Mario Klein
|
