Aniversario... de moda, in basso veronese

Bon conpleano, bikini!

Come Lucia Bosè, tanti ani dopo, (15-8-64) anca Lucia Beltrame... posa in bikini, su le piere de Fiascherino, in Liguria.

Emo 'pena finìo de celebrare i 60 ani de la Rèpublica Italiana (1946-2006) e quelo del 60° aniversario del primo voto de le done, che nantra scadenza se fa avanti a conpire 60 ani anca ela. L'è na roba pitosto lezéra e che gavarìa mia tanta inportanza; se trata de... on costume che à canbià... el costume: el bikini, ancora cussì moderno e attuale al giorno de ancó. No 'l dimostra par gnente l'età che 'l ga, e sì che de strada el ghe n'à fata tanta. El bikini l'è senpre stà e 'l resta el sìnbolo de la sensualità e de l'emancipazion.
La prima olta che el bikini l'à fato la so conparsa l'è stà el 5 lujo 1946, a Parigi; i l'à mostrà in pùblico durante na sfilata balneare e sùbito s'à creà quasi na rivoluzion. A la prima conparsa de 'l due pezzi, cussì tanto ridoto, s'à quasi ofeso no solo i òmeni, ma anca le done. No l'è mìa stà fàcile catare na modela par portare sto du pezi; a la fine, à dito de sì una che se despojava par mestiere del Casinò de Parigi, Micheline Bernardini.
Ci se ne intende de storia de la moda, dise che la prima idea ghe l'abia avù ne i ani '30 Jaques Heim, on stilista francese de orìgine polaca, fiol de on peliciaio. Altri i sostien che a inventarse el bikini l'è stà on ingegner francese: Louis Réard. Lu, de mestier, el faséa el progetista de otomòbili e, quando l'era lìbaro da laoro, el ghe dava na man a la so fameja che la se ocupava de biancherìa ìntima. Se volemo però dare on ocio a la storia antica, i primi due pezzi i è quei che se vede 'dosso a le atlete rafigurè ne i mosàici romani del IV sècolo, de Piazza Armerina, in Sicilia.
I giornài del 1946 i à scominzià sùbito a parlare del bikini e i l'à paragonà a na sorta de pazzia nucleare; cussì el costume piassè pìcolo del mondo l'è stà batezà col nome de bikini (come l'atollo de la Micronesia, 'ndó che i Mericani, in chei stessi giorni, i avéa sperimentà la bonba atòmica.
La Cesa la l'à proibìo sùbito, soratuto su le spiaje de i paesi catòlici come Italia, Spagna e Portogallo, 'ndó che ghera i polizioti, mandè dal Ministro de l'Interno de alora, Mario Scelba, che, co 'l metro a la man, i controlava la misura de sto du pezi tanto pericoloso, parché el fusse in règola co le norme concesse. à fato in tenpo a passare altri tri ani, prima che la rivista Elle, in Francia, la publichesse el primo servizio de moda sul bikini.

Mietta, no sta' ciaparme de facia, ché me vergogno!

Le prime done a métarselo qua in Italia, nel 1947, i è stè Lucia Bosè (su la passarela de Miss Italia, sepur co 'l bìgolo de la panza coerto); po' Sofia Loren l'à venzo el concorso de Miss Eleganza. Nel 1953, in Francia, Brigitte Bardot la se l'à messo 'dosso par fare el film E Dio creò la donna. In 'Mèrica le prime a mostrarse cussì meze nude i è stè Rita Hayworth, seguìa, dopo poco tenpo, da Marilyn Monroe, nel film Niagara. Pi avanti, se riva al 1962 co Ursula Andress e 'l so bikini bianco in tel film co James Bond Licenza di uccidere.
Ma oramai s'èrene nel 1960 e la rivoluzion del mostrarse l'era za a le porte. La dona, pi che angelo del focolare, la se sentéa seduttrice. Cussì anca le signore e le butele de bon ton le à scominzià métarselo anca lore, fin a rivare a na moda par tute.
Personalmente, a me ricordo che mi e la me amica Mietta, nel 1964 in vacanza in Liguria, a Lerici, co pension conpleta in tel favoloso hotel fronte mare La Venere Azzurra, influenzè dal borezo de sto nome, na matina n'è vegnù l'idea de èssar on po' trasgressive: s'emo montè su la coriera fin a La Spezia, s'emo 'ndè drento in te na botega e s'emo cronpà on due pezzi paromo, dopo averlo proà davanti al spejo nel camarin. El mio l'era turchese e el suo verde vivo, tuto plissetà sia sul regipeto che sul slip. Gavéene solo vint'ani, la beleza de l'àseno; el ne stava ben par forza e noantre se stimàene da mati, anca se se vergognàene on poco, pensando a le nostre mame. Emo fato na roba che a Verona no avaréssimo fata de sicuro. Par noantre l'è stà na vacanza che no s'emo pi desmentegà. Se sentéene cussì bele al punto che la me amica la s'avéa parfin catà el moroso.
A mi inveze m'è vegnù el magon parché el mio l'avéa lassà sora a le sudate carte par dare i esami a l'Università de Bologna.

[torna sopra]