|
Editoriale
Bone vacanze a tuti... anca se tuti no va in vacanza!
Quela de on mondo che tira zo la seranda, che sara botega e tuti va in vacanza, forse la xe na imàgine fantasiosa e busiara
 |
| Auguri a tuti... e speremo che la sia na vacanza inteligente. |
Anca st'ano - finalmente, disemo tuti d'acordo - ga molà de fare fredo, xe rivà el caldo e xe rivà el tenpo de cavare la spina e smorzare la luce del laoro che dura da on ano.
Finalmente l'istà, finalmente le vacanze, finalmente!
Finalmente podemo èssare felici, podemo star ben, pensare al nostro benèssare: fogo che brusa par on ano intiero sol fogolaro de i nostri desideri, de i nostri sogni pi sognà, punto de incontro co le nostre emozion più vive.
Eco finalmente la pausa, el métare da parte l'inpegno e la fadiga de tuti i giorni, la responsabilità, el dovere, l'orario da rispetare, el va ben, sior paron o sior diretore. Fermare el mondo, parché 'ndemo in vacanza!
E come senpre, anca st'ano, i tenta de farne crédare che tuti va in vacanza. Gnente de pi falso! Casomài, quei che da senpre va in vacanza, i continuarà a 'ndarghe e i continuarà a ilùdarse de èssarse conquistà la felicità, soltanto parché i ga risposto de sì a l'abitùdine inventà dal consumismo, che se no te vè via da casa, in chel determinato posto de mare o de montagna, no te ghè fato le ferie, no te si 'ndà in vacanza.
Cussì la vacanza, inveze de corispóndare al riposo, la deventa on necessario spostamento da indove che te stè a naltro posto, col peso che te toca soportare par spostare provisoriamente la to vita.
Par no parlare de i novi raporti sociali da stabilire con chi te incontri ne i clàssici oto-diese dì. E intanto cala el senso de soportazion, aumenta la tension psicològica, i raporti de copia i deventa pesanti...: "Parcossa xe che noantri no podemo nare a Sharm el Sheik al posto de i brècani de Rosolina Mare?... Vorìa anca mi nare in albergo e no so do camarete a fare la serva a tuti, come casa, tuto l'ano!..."
Questi sarìa i modèi de vacanza che passa el convento de i giornài e TV. Solo che, purtropo, có parte la vacanza de qualcheduni, taca anca la non vacanza de chi no pole permétarsela, de le persone anziane imerse ne la solitudine de le taparele quasi senpre sbassà e col televisore che va da la matina a la sera, fin che la sità, meza deserta, la bocheza par la calura...
Forse la vera vacanza sarìa quela da fare stando fermi, na vacanza tuta interiore, riorganizando i propi pensieri, rispolvarando veci sogni, ocupàndose de qualche altro che sta pezo... dàndoghe da bévare ai fiori o a l'orto de i vizini de casa, faséndote chei lavoreti de casa, che no te poi fare có te si a lavorare...
Eco 'lora che l'augurio de na bona vacanza ghe lo femo a tuti, ma 'ncora de pi... a chi, anca par via de trentasiè rason, in vacanza no 'l ghe va!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Bone vacanze a tuti... anca se tuti no va in vacanza!
Quela de on mondo che tira zo la seranda, che sara botega e tuti va in vacanza, forse la xe na imàgine fantasiosa e busiara
de Mario Klein
|
