| de Maria Luisa Furin Zilio |
|
Storie estive
Anguria, che passion!
 |
| ...na anguria de oto chili... on fià a la volta, el se la ga magnà tuta. |
I protagonisti de sti fati xe 'ncora vivi, i ga tuti oltre la setantina e i gode de na discreta salute. Cominsio col contarve cossa che 'l ga fato Bepin de Villafranca Padovana, a l'età de diese ani.
So popà, on contadin onesto e dal cuore grando, che ghe tegneva che i diese fiòi cressesse altretanto, cossa fasévelo d'istà? El conprava na sinquantina de quintali de angurie, che meteva in càneva al fresco, parché i fiòi no i 'ndasse a robarle da i vissini. On dopodisnà del mese de lujo, quando che tuti gera in leto, Bepin, el più furbo de tuti i fradèi, el xe 'ndà torse na anguria su i oto chili. El se gaveva procurà on cortèo, el xe corso soto na piantà de ua e, on fià a la volta, el se la ga magnà tuta. Có 'l la ga finìa, el xe restà co la boca verta, no 'l gera quasi più bon de respirare e la pansa ghe s-ciopava. 'Lora el se ga tirà zo le braghe e el ga scominsià a rodoearse ne l'erba e tasi che, pian pianèo, el ga scominsià a desgionfarse, spandendo aqua a più non pòsso.
E la storia de i do zemeli, senpre de Villafranca Padovana, Benito e Vitorio che i gera drio dare aqua ai canpi de formenton 24 ore su 24, rapossàndose on poco a turno, destirài so na coerta? I tirava sù l'aqua da na canaleta co de i tubi; on tratore faseva funsionare la ponpa de tirajo. Na sera, so 'l tardi, i gaveva na sen da mati e cossa gai pensà? Vissin ghe gera un bel tòco de tera coltivà a angurie de Varisto, che li gaveva tegnùi a Crésema. Penseve che lu faseva la guardia a le so angurie, ogni note, co la s-ciopa, parché no i ghe le portasse via. Benito ghe dise a Vitorio e a Etore, che li iutava: "'Ndè da Varisto a domandarghe on cortèo par tajare na guarnission; disighe se el poe vegnere elo a portàrmelo, parché go da parlarghe, intanto voaltri porteghe via na angurìa!"
Dito e fato: finché el sàntolo se ga 'lontanà, i do ga tolto la mèjo anguria e i la ga sconta soto el tratore e dopo, i se la ga magnà in santa pace. La matina drio, 'riva Varisto rabià come on bisso: "Fiosseti cari, la savìo la notissia? Stanote i me ga robà l'anguria più grossa: se vegno a savere chi che xe stà, ghe dago na s-ciopetà su le ganbe." Benito ghe risponde: "Eh, sàntolo, cossa dìsito? Mi sò chi che xe stà, ma te lo digo solo se te me prometi che no te ghe fè gnente..." Dopo 'ver pensà on fià, Varisto aceta la condission.
'Lora i zemeli ghe ga contà come gera 'ndà le robe e el sàntolo, smontà da la rabia de fronte a sta birbantada el ghe ga regalà, par zonta, na angurìa.
E, par finire, anca questa xe bea.
Tonin, co on so cugin, el xe partìo na doménega, in bicicleta, da Conejan par 'ndare a Vilanova de Istrana a trovare la zia Teresa, che 'desso la ga 88 ani, e che la gaveva on canpo de angurie.
'Rivài verso le ùndase, dopo 'ver fato quasi 30 km, i xe 'ndai sùbito a torse na anguria e i ghe n'à magnà meza paromo. Dopo disnà, come fruto, naltro quarto. Verso sera, la zia Teresa la ghe ga dà do angurie a ogni nevodo, da portar a casa, e i xe partìi co do sporte tacàe una par parte del manubrio. A metà strada, a Tonin ghe se ronpe na borsa e cossì l'anguria xe 'ndà par tera ronpéndose a tòchi. A lori no ghe ga parso vero e i se la ga magnà tuta, sentài beati e pacìfichi drio el fosso. Gnanca farlo aposta, poco prima de Conejian se ronpe anca la sporta de so cugin e l'anguria la ga fato la stessa fine de la prima. Manco male che i xe riussìi a portàrghene casa una.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
La colpa de èssare onesti
Ogni istà ga el so 'tormentone'. Quelo che st'ano ga inpinà le pàgine de i giornài e che ga fato ciacolare on pasto xe stà el sconto de pena par chi jera in preson
de Mario Klein
Da Verona
Aqua da tuti i cantoni
de Giacinta Dall'Ora
|
