|
Da Thiene (VI)
Fungomanìa
 |
| Na famejeta de igrofori spia in meso a l'erba. |
El fenòmeno, la moda, la manìa o quéo che volì ciamarghe de 'ndare par funghi, che da più di vinti ani ga contagià, se pol dire, quasi tuti, xe nati par mèrito o colpa del progresso, a seconda de chi te on modo o st'altro i la pensa.
Sta "nova civiltà" de i "computers" co "l'informatica, la telematica, la robotica", la cadena de montagio, el lavoro fato in serie che no dà respiro, e via discorendo... ga contribuìo al bisogno de l'omo e, parché nò, de 'a dona, de "evadere" par no ciaparse un esaurimento e ingrossare cossì le file de quéi che speta da i speciaisti de malatìe "mentali", che le se slonga senpre de pì.
Eco alora, par no deventar "mati" la "riscoperta" de'a natura, le marce, el "footing", la palestra, le gare de " mountain bike" e, in particolare de agosto/setenbre, tuti o quasi a catare funghi in te i boschi e in te i prà de montagna e, come " un'orda" de bàrbari, i novi Atila, armà de bastoni, sestèi o sachiti de plàstica, pestando a drida e a sanca i distruge a bastonà, par rabia o dispeto, no solo i funghi "mati" (el pì de 'e volte i xe boni, ma no i li conosse), ma tuto quéo che ghe càpita a tiro: da 'e piante de lasarele (mirtillo), de fragole, lanponi e greste de galo, a 'e felci, ai rododendri e altre piante del sotobosco.
Dove prima te podevi "gustare" ste belesse naturali e provare drento l'ànima un senso de pace che te ricaricava le batarìe consumà, da la vita "stressante" de tuti i giorni, el core se struca e sofre vedendo sto posto de sogno, sto tapedo verde tuto pestà e semenà de scoasse: la xe propio na vargogna!
Tornando ai "miceti", bisognarìa darghe na tiradina de rece e tanta gente fassilitona, i "micofagi" (magnadori de funghi), che rancura tuto, anca i funghi che no i conosse, parché, secondo luri, quei che sa da bon o rosegà da 'e lumeghe, o parché i li ga visti stanpà te on libro in te la "Mostra Micologica" del paese, col cartelin che diseva "commestibile", sensa prima farli védare da un "esperto", i li mete in pignata, magnàndoghene dopo na spansà, ris-ciando de lassarghe la pèle.
Tuti i ani, de sta stajon, lesemo che fameje intiere xe stà ricoverà a l'ospedale par velenamento da funghi che, se i ga fortuna, co na lavanda gastrica e un forte spaurasso i se la cava, de 'e volte però la causa de velenamento xe provocà par 'ver magnà la tremenda "Amanita phalloides", un fungo "mortale" che fa efeto anca 72 ore dopo 'verlo ingiutìo, se no se core in tenpo, a sta pora ànema no resta che métarghe el paleto de legno.
No vojo, par no inpressionarve massa, descrìvarve le varie "fasi", prima de tirar le lache (morire) che sto "maledeto" el ghe fa passare al poro desgrassià che lo ga magnà: me se acapona za la pèle! Ve sicuro che a tuti ghe passarìa in pressa la voja de narli catare, xe mèjo ca nemo oltra.
Par métarghe un freno a sta "piaga", Comunità Montane e Comuni de l'Altopiano i ga messo na tassa par la racolta bastansa salà: 6 euro el parmesso giornaliero, 30 euro el mensile e 77 l'anuale.
Sicome quéi che va a funghi no i se contenta de un posto solo, par cavarse la spissa e catarghe pi de 'i altri, sensa ris-ciare na multa co i fiochi e védarse portar via da 'a forestale el fruto de ore e ore de caminade te i boschi, i cava pi parmessi e, meténdoghe in conto solo la bensina, cari i me funghi! Setu ti co do-tresento euro quanti "porcini" e "zaleti" che te cronpi al marcà soto la Basilica a Vicensa? Ma la passion xe 'n'altra roba: vuto métare la sodisfassion ca te provi 'ndarli a catare in conpagnìa de amissi e, tornare col sestelo pien? Anca sto fato xe vero, ma co le "marmaje" che da ani rancura e "sassina" tuto sensa remission, no te cati pi gnente, ansi, tel bosco te cati solo gente anca se te vé in fra setimana.
Anca mi sta "passion" la go da tanti ani, ma in sti ùltimi tenpi la va senpre pi calando. Me ricordo, come fusse 'desso, la prima volta che co me fradèi nel '49 (gèrimo in vilegiatura a Tonesa), co la "guida" de on libreto "I funghi dei nostri boschi", semo 'ndà a funghi e te on par de ore ghi nemo catà on sésto pien de trèdese quaità che, messi in tecia, ghemo magnà de gusto, par fortuna sensa conseguense.
'Desso, dopo 57 ani, có penso me vien la pèle de oca, parché, on fia pi tardi, frequentando el Grupo Micologico "G. Bresadola" de' a me cità, go capìo quanto ghemo ris-cià, difati pi che te "studi" i funghi, più te vien savere quanti che ghin'è che se someja e che no se pol magnare parché velenosi.
Mi i funghi me piase catarli no tanti, sinque/sìe eti, da fare on misto de 30/35 quaità: do rùssole, tri zaleti, na massa de tanburo, qualche prataiolo, un carpanato (porcino), na branchinela de agarici... purtropo 'desso no te cati gnanca l'onbra e, par forsa te passa la voja e la passion.
Se tornasse al mondo l'abate Giacomo Bresadola, curato de canpagna, botànico e naturalista, uno de i pi grandi "studiosi" de funghi (el ga "classificà" più de mile nove spece che'l ga descrito e ilustrà co disegni a colori de so pugno, in te na monumentale "enciclopedia", la "Iconographia mycologica" fata de 26 volumi. El xe stà el primo a utilisare i caràteri "microscopici" nel studio de i funghi), a védare come vien tratà funghi e anbiente, sbregàndosse la veste, el ne corarìa drio col baston.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
La colpa de èssare onesti
Ogni istà ga el so 'tormentone'. Quelo che st'ano ga inpinà le pàgine de i giornài e che ga fato ciacolare on pasto xe stà el sconto de pena par chi jera in preson
de Mario Klein
Da Verona
Aqua da tuti i cantoni
de Giacinta Dall'Ora
|
