|
Editoriale
La colpa de èssare onesti
Ogni istà ga el so 'tormentone'. Quelo che st'ano ga inpinà le pàgine de i giornài e che ga fato ciacolare on pasto xe stà el sconto de pena par chi jera in preson
 |
| "Anca se co le sbare, par qualchedun... el jera on posto sicuro." |
No se pol darghe tuti i torti a chi, soto l'onbrelon, intavanà come na brespa, se agitava, discutendo so 'l valore del perdono. Non par darghe reson a sti qua o par métarghe la pezeta su le decision ciapà da chi dèta le règole de la nostra vita sociale, ma ne pare che, se el perdon el xe na bela roba, el ga da rivare al momento giusto, parché chi ga sbalià, da che mondo xe mondo, el ga da pagare pa'l dano fato. Dopo, na volta scontà la pena, el ga da vegner fora come... on nizolo dopo la lissia: stirà, piegà par ben e messo insieme al resto de la biancarìa neta!
Cussì, pa 'l poro omo che, t'on colpo de mato, ga rapinà na fameja, violentà na toseta, portà via la borseta a na veciota 'pena 'ndà a tirarse la pension a la posta, vendù on par de eti de morte in pólvare, copà par sbalio na prostituta... sto poro omo, quando el gavarà scontà la so pena, sarà giusto che 'l vègna perdonà e aiutà a tirare le lache sora on stramazo decente e disinfetà, a l'aria aperta.
No la xe stà cussì par i oltre vintimila che xe stà scarcerà prima del tenpo, butà in mezo a na strada, dal dito al fato, senza gnanca sentire se uno el jera contento de nare fora de galera e se el savéa dove 'ndare, cossa fare e come vìvare. In sostanza, el sconto de pena, el "piccolo perdono" concesso in antìcipo, ne la magior parte de i casi el ga creà on dano par tuti: par chi xe vegnù fora de galera e par chi no ghe xe mai entrà.
La gata pressarola ga fato i gatini senza oci. Cussì, in quatro e quatr'oto, senza tanta publicità, on stramenaro de sbandati el s'à catà so na strada, co na borseta de straze in man. Pi de qualchedun no 'l ghe ga pensà do volte: el ga riciapà in man l'arte inparà e messa da parte, tornando a delinquere e po' a respirare l'aria de na cela, dopo apena du giorni de libertà. Poareto! Cossa dovévelo fare? Canpare de aria? Spetare che quei che lo ga privà de on pasto sicuro e de on coerto i ghe catesse on laoro e na casa? Sì, col tenpo sarìa rivà anca quei, ma intanto?...
Proprio cussì la xe 'ndà. Ai pori delinquenti scarcerà, parché ne le preson no ghe jera pi posto, ghe ga tocà pensarghe le Province, i Servizi sociali de i Comuni, le associazion de volontariato, la Caritas. Se xe tratà de na emergenza, na situazion poco ciara che ancora na volta ga inpegnà le organizassion che le gavarìa preferìo ocuparse de le persone bisognose e trascurà da le istituzion.
Propio questo ga pensà i disocupà, i sfratà, i pori disgrazià, le done che xe stà licenzià par prime da le aziende in crisi. De questo se xe lamentà e se ga dito amaregià e rabià, chi xe ciapà za da on tòco da mile dificoltà.
Al citadin qualsiasi, iscrito da ani ne le liste de la disocupazion e che no vien ciamà a laorare ghe ga fato rabia védare che el Comune el se ga dà sùbito da fare par aiutare chi xe vegnù fora de preson e no 'l ga mai fato gnente, o poco, par i so citadini onesti. Insoma... a chi massa e a chi gnente. Ai delinquenti ghe xe stà fato do grazie: i xe vegnù fora de galera tri ani prima, 'desso qualchedun xe drio sistemarghe l'avenire.
Questo, senpre secondo el citadin qualsiasi, sarìa on fià massa: va ben regalarghe la libertà, ma el resto bisogna guadagnàrselo col sudore, come fa tute le persone oneste. Inveze, in sto caso, i onesti ghe toca sentirse in colpa. Magari anca de i cativi pensieri qua esposti!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
La colpa de èssare onesti
Ogni istà ga el so 'tormentone'. Quelo che st'ano ga inpinà le pàgine de i giornài e che ga fato ciacolare on pasto xe stà el sconto de pena par chi jera in preson
de Mario Klein
Da Verona
Aqua da tuti i cantoni
de Giacinta Dall'Ora
|
