|
Da Verona
Aqua da tuti i cantoni
 |
| Ò visto de tuto: da i castèi a le scoliere bianco-late... |
L'è un bel tòco che no vedo, ansi no sento, la me amiga. In tuta l'istà la m'à mandà solo un messagin con scrito: "Te contarò..." Che stranbarìa: tanto no la le moca più con la lengua e tanto l'è asvelta co 'l telefonin. Inforco la bici e vao catarla. Ciapo paura: l'è bianca come na strassa e, soratuto, la tase. Secondo mi, par èssar ridota a sti passi la pol solo 'verghe un bruto mal. "Ciao, 'sa sucede?", staolta son mi co 'l cortel da la parte del mànego; ela l'è muta. A moti, la me fa comodar e la se mete drio far el cafè. "Senti, bela, sito inmulà o t'ai cavà la lengua?" ghe digo mi, schersando, par tajar l'aria. La me varda con i so du ocioni, uno al naturale e uno operà da la catarata, e con fadiga la me dise che l'è sensa vosse.
A sentirla me vien i sgrisoloni: la ga la vosse che la par na gratasola soto sforso.
"Varda come son messa; tuta colpa de le ferie: tre setimane in Inghiltera e Scòssia, cioè in moja. Se te credi, ò visto tanta de quel'aqua in vinti dì che me vien el gòmito solo a lavarme le mane."
"No 'l savéito mia che l'è n'ìsola?" ghe domando mi, smaravejà. La me varda de traerso e, tirando el col par spianarghe la strada a la 'osse, la me sópia: "Mi me intendéa l'aqua che vegnéa zo da de sora, cara. Ghe crédito se te digo che pioéa ogni giorno?"
La trìbula come un can a parlar, ma no la cede mia: vol dir che l'è sana come un pesse e che 'desso el mànego del cortel la ghe l'à in man ela e no la me le mola più.
"I è posti che val la pena conóssar; ò visto de tuto: da i musei a le 'pinacoteche', piene de quadri de pitori nostrani, da i castèi a le scoliere bianco-late, da le cità antiche ai parchi sgionfi de àlbari, con n'erba de veludo verdo ligaor. Eco, la roba che m'è piasùo de più l'è stà propio el color de l'erba e dopo do ore che te sì là te capissi parché la slùsega che la te tol i oci."
"Parché?" ghe domando mi che no go prontessa de riflessi.
"Parché pióe ogni diese minuti, bela! Pensa che quando ghera un oceto de sol, a qualsiasi ora, el me omo el inciodàa el canper, el tiràa zo taolin e careghe e, fin che lu el inasiàa la tola, mi preparàa la pastassuta, ma come me presentàa con la teja sul primo scalin del furgon, tacàa a vegner zo n'aqueta così fina, che 'l paréa che no la bagnesse gnanca e invesse in du minuti te te catai negà sbissà fin ne le mudande. Me marì el scometéa con mi, ogni matina, sul tenpo, ma el perdéa senpre parché l'è otimista de natura."
"Te podéi tornar indrìo e fermarte sul continente" ghe digo mi, credendo de èssar furba.
"Oramai s'érene spingolè massa in sù e po', dài ancò e dài doman, con la scusa de le scomesse vinte, era drio arbinarme un bel grussoleto... Dopo diese giorni, a metà giusta del viajo, ne svejemo con un bel soleto che 'l fa sperar e el me omo, con un corajo da leon, el scomete con mi sul tenpo par na cifra bela grossa."
"E el tenpo elo stà sù fin sera?" me informo mi, curiosa.
"Donca, dopo do ore ghera ancora el sol; te sé che el me dà fastidio e alora ò pensà de cronparme un bel capel de paja. L'era na citadina sul mar e ghera na mota de boteghete 'ndó i le vendéa."
La se ferma, la bée un gossin de aqua e la taca ancora: "Se te avessi visto quanti capèi; ghe n'era de tuti i segnati. Avarò passà diese boteghe e m'avarò misurà sinquanta capèi difarenti prima de decìdar. Co 'l spejo inte la man, l'era tuto un meti e cava, un vardarme davanti, de drio, de profilo, con la coa, co i cavéi molè zo... A la fine me son catà fora un bel capel de paja traforà con un nastro a fiori e na càpola che la me faséa le gatarìssole su le spale da tanto granda che l'era. Na 'olta fato l'afar, avemo pensà de proarlo spassesando, ma..."
"Ma?" ripeto mi, in sospeso.
"Ma, drio traersar la strada par nar sul mar, un vento viliaco el m'à portà via el capel."
"E ti gheto corso drio?" insisto mi.
"No ò mia fato ora, parché l'è stà investìo da na màchina e alora me marì, che l'è pràtico in materia parché l'è un volontario de la Croce Bianca, el s'à dato da far par recuperar el cadàvere."
"E sio stè boni de riméterlo in sèsto?" ghe domando.
"Maché, no la ghè mia nà riessa de rianimarlo, ma tanto no el me servéa più, parchè avéa scominsià a pior che dio el le mandàa e mi s'era contenta come na pasqua: avéa sì perso el capel, ma avéa vinto un bel pochi de schèi de scomessa."
La tase, la sbòssega che quasi la se stràngola, e con du oceti malissiosi, uno col "cristalino" vero e uno con quel artificiale, la me dise: "Dài, conpàgneme che go da far na speseta e go bisogno de 'n consilio. Voi torme qualcossa che me resta par ricordo de sto viajo nel Regno Unito."
"Un capel nóo..." ghe sugerisso mi.
"No, cara. I capèi, col tenpo, i se sassina; invesse, con i schèi che go sgancià al me omo con le scomesse, me tógo un par de recini, bèi, che i resta par senpre!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
La colpa de èssare onesti
Ogni istà ga el so 'tormentone'. Quelo che st'ano ga inpinà le pàgine de i giornài e che ga fato ciacolare on pasto xe stà el sconto de pena par chi jera in preson
de Mario Klein
Da Verona
Aqua da tuti i cantoni
de Giacinta Dall'Ora
|
