Editoriale

Par chi tórnelo Nadale?
Co tuta la violenza che ghe xe in giro, co i modèi da copiare che ne vien proposti, no xe fàssile capire parcossa torna Nadale

L'angioleto el xe senpre lì che 'l speta che inpizemo... la luce de Nadale.

Le robe le sta proprio cussì, come che ghemo dito, ma sicome le circostanse le pole far deventare coragioso anca uno pien de paura, fémose corajo e serchemo sto Nadale e el so mèjo significato. Ghemo dito "serchemo", parché non senpre xe Nadale dove xe festa: pitosto, là dove xe Nadale de sicuro xe festa.
Ma, dove nemo a sercarlo sto Nadale? Intanto escludemo el calendario, parché senò ris-cemo de catare ben altro che na grota, na grupia e on Banbinelo in fasse. Provemo col mondo de i "adulti" o grandi... el pi de le volte avanti co i ani, ma indrìo de conprendonio. Qua ghe catemo aria de tenpesta, altro che clima de festa! Beghe polìtiche co na cativeria che stómega, servizi segreti che spìfara fora tuto, guera de mafia, Sanità... da Pronto Socorso, manovre econòmiche con proteste in piassa, cortèi de pace che brusa bandiere; chi tira sù on muro e chi lo vole tirar zo, delinquenti in libertà che no i sa pi cossa inventarse par guadagnarse on posto in caponara...
Canbiemo anbiente, nemo in quelo de i zóvani: a fronte del silenzio de tanti bravi tosi che studia, laora e fa volontariato, eco el bordelo de la violenza del branco contro conpagni pi déboli; eco i "sconcertanti" fati de i oto tosati de Livorno, tra i 14 e i 18 ani, tuti de bona fameja, che registra sène "a luci rosse", riprese col telefonin e po' messe in Internet, a disposission de chi ghe basta vardare. E, tra i tosi, ste robe le càpita co la carta copiativa: in Calabria altri quatro minori i xe stà arestà par avere abusà de na toseta de 12 ani. E cossa dire del "scherzo" (?) del pasto de bote al conpagno disàbile, anca qua ripreso con telecàmara. Ormai, anca tra i zóvani, se bastona, se stupra, se tortura, se copa. Questo, ne la scola, el sta deventando on fato normale. A parte i risvolti penali de la vicenda, che vede giustamente incriminà i genitori de i "minori", parché xe responsàbile la fameja del conportamento de i fiòi, xe propio ela che ga da recuperare la "patria potestà", vista come dovere de educare i propi fiòi.
Nel stesso tenpo, se ziga al falimento de na scola che no insegna, che tòlera tuto e no ghe dà peso a le "bravate" de i studenti. Xe vero anca questo, ma no se pole scaricare solo so la scola responsabilità che xe de tuta la socetà, fameja in testa! Che fruti porla dare na pianta malà?
Dunque, sicome xe za positivo che s'incorzemo de questo, semo proprio noaltri adulti che dovemo vèrzare la strada, parché... verta la strada, fata la carezà! E 'lora, recuperemo la sacra senplicità de i nostri Nadài poareti, siori de usanze e tradizion, de fede ingenua ma lanpra, che ne faséa védare nel Nadale na benedizion dal celo.
Questa xe la legna vecia da métare so 'l fogo, se volemo scaldare i pensieri e le azion del Nadale de oncò, se volemo che la pianta umana la daga 'ncora boni fruti, da magnare... anca dopo Nadale.
Eco par chi torna la festa de Nadale!

	Cari letori, i tenpi se fa duri, la vita la xe grama 'nca pa' i siuri. Ma, dato che le robe le va male, fasémose i auguri de Nadale.
Bon Nadale e Felice Ano Novo da tuta la Redassion

[torna sopra]