Robe de Ciósa

Chel 4 novembre 1966

Le foto qua publicàe parle ciaro...

4 novembre del 1966: ze passà quarant'ani da quando meza Italia ze stà somersa da un delubio de piova... Mai, a memoria d'omo, el maltempo aveva ciapà tante zone d'Italia. Firense ze stà la pi colpìa, ma anche Venessia e Ciósa co le so "tradissionali" aque alte no le ze stà de manco...
Le foto publicàe a fianco parle ciaro. No se gera mai vista un'aqua alta cossì... alta come quel'ano.
Quel vènare 4 novembre per vintiquatro ore la popolassion de Ciósa ze stà blocà in casa da l'aqua alta, che à superà de tanto quela del lontan 1951, l'ano de l'aluvion del Polesine.
Le cale, el Corso e le rive s'à trasformà in pitoreschi canài comunicanti co quei naturali de San Doménego, Vena e Lombardo. L'ùnico mezo per spostarse (per chi aveva pressante necessità) gera la barca; e infati barche motorizàe e a remi - de legno, de plàstica e pneumatiche - à girà in longo e in largo tuto el giorno per la sità, funsionando da veri e propri tragheti e ormegiando, ne le soste, ai... lampioni de la iluminassion pùblica.
L'aqua alta ze stà davero impressionante ne la vissina Pelestrina e a Caroman, dove se ga dovésto evacuare diverse famégie per el cedimento de l'àrzare a mare che divide, apunto, el mare, da la laguna (i cosiddeti Murazzi).
La ze stà un'aqua alta che pareva no la volesse mai sbassarse, spintonà da un forte vento de siroco, che la fazèva risalire da i tombini, scavalcando le rive. In serte case l'aqua à superà el metro, invadendo intràe, cuzine, càmare de quei che aveva i apartamenti a piano tera... Per la prima volta, a memoria d'omo, l'aqua del mare se ga unìo, atraverso un trato de spiagia, a nord de Sotomarina, co quela de la laguna. No se parla de i dani subìi da comercianti, ortolani, contadini, stabilimenti balneari... Ghe ze stà perfin un morto, ma no somerso da l'aqua, ma morto de infarto (povereto!): un contadin, quando che l'à visto la distrussion de le so care campagne...
No se parla po' de i dani subìi ne le campagne circostanti la sità, alagàe per 'na estension de 4.000 ètari.
Un gran dafare se ga dà i aministratori comunali de alora, che à coordinà i socorsi e el trasporto de i aluvionài: ze stà perfin organizà 'na racolta de vestiario a favore de ste persone sfortunàe. Se pole dire che tuto el teritorio del comune de Ciósa ze stà alagà, eceto Ciósa e Sotomarina, e ciò per el fenòmeno del "ritiro", sepur ritardà, de l'aqua co l'arivo de la bassa mare (che "oni sie ore la cale e oni sie ore le cresse").
El sìndaco de alora à sorvolà pi de 'na volta in elicòtero le zone per rèndarse conto de l'entità de i dani.
Ma se ga mosso adiritura chela volta sia el Presidente de la Republica, Giuseppe Saragat, sia el presidente del Consiglio, Aldo Moro, tuti e dó in vìsita ai lòghi aluvionài del Polesine e al litorale de Pelestrina. Qua i se ga reso conto de quanto bravi gera stai i Savi de la Serenissima che nel 1760 aveva fato costruire cossì ben i Murazzi da resìstare a l'ìmpeto de le aque e a salvare tuta l'ìsola. Ze stà quela la volta bona che s'à deciso de restaurarli completamente e adesso da diversi ani i se pole védare integri e forti al so posto e fare da diga contro la furia del mare.
Paurosa spessialmente ze stà la situassion a Pelestrina, dove i abitanti à vissùo ore de terore. Cavaloni a "forza 9" de altessa spaventosa à fragelà la costa, entrando ne l'abitato atraverso sète grande "falle" che se ga verto su i Murazzi co l'aqua che à scomissià a suparare in serti punti i dó metri de altessa.
Co tuti i colegamenti interoti, sensa aqua e sensa luse, l'ìsola pareva, quela note del 4 Novembre, in preda a la furia de i elementi de la natura. L'aqua no calava, mentre cressèva la paura de i abitanti.
Per fortuna un improviso cambiamento del vento (el siroco à scomissià a molarghe) à fato sì che l'aqua scomissiasse a poco a poco a ritirarse. Ma tanti à vegià tuta la note, vardando el mare e el sièlo, fin che l'alba de sabo 5 novembre à messo in luse tute le piaghe che l'ìsola aveva subìo. Bastava che la furia del mare avesse continuà ancora per un poco co quela violensa, perché i Murazzi de la Serenissima i fusse spassà via anche lori e cossì Venessia e Ciósa sarìa stà esposte a l'ataco de le fòrse de la natura.
A distansa de quarant'ani, adesso se ricorda l'avenimento, ma la situassion press'a poco la ze la stessa: le aque alte continua oni autuno e oni inverno a invàdare Ciósa, Marina, Pelestrina e sopratuto Venessia. Se aspeta el Mose, el tanto contrastà Mose, ma no se sa né quando a sarà ultimà né se a sarà veramente in grado de salvare Venessia e Ciósa da le aque alte...

[torna sopra]