Da la Lessinia Centrale (VR)

Viva "Maria"

Ogni tre-quatro butele, una la se ciamàa Maria...

La Valpantena e la Lessinia Centrale i è piene: de capeline, de piture, de capitèi e de crose de piéra; 'n giro se ne vede dapartuto. Coesto, mostra e testimonia de coanto amor gh'éra par la religion e coanta fede se vivéa par i vari Santi e Madone.
Maria, Santa Maria, la mama de Gesù, secondo i vangeli, da le nostre parte, no' l'è e no' l'éra solo ne i capitèi, ma anca ne i nomi de le done, almanco fin ai ani Sessanta. La contrà 'ndó staséa mi, Lumiago, no' l'éra gnente de manco de le altre contrade de la nostra tera. Le fameje che gh'éra a Lumiago, con la Colombara, 'na casa a-rente, che ghéimo la stessa fontana e che i nùmari de le case i tacàa da sta Colombara e lì, gh'éra 'na fameja con diese fiói e 'na fiola, l'éra la Maria de Lissandro; da l'altra parte de la corte i éra 'n coatro fiói 'n casa e una la se ciamàa la Maria del Mario. Al nùmero tri, 'n corte mia, gh'éra me zio che 'l gh'éa la Maria Rosa; al coatro i éra solo òmeni; al sincoe gh'éra me zia Marietóna, ma 'l so nome l'éra Maria, e 'na fiola, l'éra Maria Luigia. Al sié, ghe s'éra mi con la me fameja, e me mama par no' far confusion, no' la ghe l'à messo a nessuna de le me sorele 'l nome Maria, ma, a 'na me soreleta, nata morta nel '41, me mama la ga messo nome Maria e nantra sempre nata morta nel '60, la ga messo nome, Maria Assunta. Al nùmaro sète, de Maria no' ghe n'éra, ma a l'oto, gh'éra 'na Maria, ma la ciamaimo Mariana; dal tri al nove s'érimo tuti Ederle e al nove Marie no' ghe n'éra. Al diese, no' ghe staséa nisuni e gnanca a l'óndese e al dódese, Marie no' ghe n'éra, al trèdese e al coatòrdese, gh'éra do fameje che le gavéa diese fiói a l'una e le mame le se ciamàa Maria: una l'éra la Marieta, l'altra la Maria de i Bèli. La fameja de me, pòro nono, so bupà de me bupà, i éra 'n casa 'n tri fradèi, con le so done e tute e tre le se ciamàa Maria: una l'éra la zia Marietóna, una l'éra la Marieta, me nona e l'altra l'éra la Maria.

...e tute le butele le faséa parte de la Compagnia de Maria Assunta...

Coando me son sposà e son nà a star a Stallavena, son nà 'n te 'n grópo de case nóe: mi, con du me fradèi, 'na me cugnà, la se ciamàa Maria, la dona che me staséa da la parte sanca, l'éra la Maria del Toni, coela che l'éra da la parte drita, l'éra la Maria del Piero. Davanti gh'éra do case, con la so Maria tute e do; ne le altre sincoe case che restàa, gh'éra tre Marie. Ne la me classe, el coarantasincoe, a scóla s'érimo diese buteleti e oto butelete e do i éra le Marie. Coando naséa jutarghe al Marce, ne la so corte, gh'éra sète fameje, con coatro Marie, una la se ciamàa Maria Teresa, ma, solo par no' far confusion, una Maria del Genio e una Maria de i Mónci; l'altra l'éra la Maria.
Coando ò fato 'l corso de infermier, s'érimo 'n coaranta òmeni e altretante done, 'na diesina i éra de nome Maria, anca se ghéra la Maria Teresa, la Maria Grassia, la Maria Assunta, la Maria Rosa e coalche altra. 'Na séra, ne sémo catè, coei de la maraja de 'na olta, coei de i ani Sessanta e, gnanca a farlo aposta, émo contà i nomi che ghè stà dato a le Marie, par no' far confusion. No' posso nominarli tuti, anca parché gh'éra de i nomi o soranomi 'n po' particolari e dato che i fiói e i neodi i è vivi, carchedun 'l podaréa érghela 'n par mal. Par dir solo coalche nome, gh'éra: la Maria sabalòta, la Maria tegnissa, la Maria tratalà,la Maria piansòta, la Maria séca e la Maria picenina. Le altre, come ò dito, le lassemo da parte.
Le feste 'n onor de la Madona, 'na òlta i éra tante e bele, parché tute le butele le se vestéa de bianco e tute le portàa 'n procession la statua de la Madona e se sentéa le cansoni dedichè a la Mama del Cristo, sta mama, che la ghe jutàa a tuti, bastàa solo pregarla. Me ricordo belo e ciaro 'n discorso fato da 'na dona a la fontana fin che la resentàa la lissia: "Coando m'è nato 'l secondo fiol, go 'vù 'na grassia da la Madona e cossì ò fato 'l voto che, la prima butina che me saréa nata, gavaréa mmesso nome Maria." e 'nantra, sempre a la fontana, l'à dito: "Avéa fato voto a la Madona, che se me fiol 'l tornàa da la goera, la prima fiola che ghe saréa nata, a sto me fiol, 'l dovéa ciamarla Maria." I éra parole ciare e no' gh'éra mese misure: par ogni grassia che vegnéa dal cel o da la Madona, nasséa 'na Maria. Adesso, no' me par de conóssare butine che se ciama, Maria... 'L sarà parché, pi nessun ga bisogno de grassie da la Madona?

[torna sopra]