|
Editoriale
La strada de casa
In sto groejo de strade, de trodi, cavezagne, vie traverse e tabele de indicazion, co sto destejo de apòstoli e profeti che prèdica vangèi falopi, xe senpre pi fadiga catare la strada de casa
 |
| De scondon... i ghe gavéa girà la bicicleta par st'altra direzion... |
E che fadiga vìvare! No te fè ora a radunare le to straze par nare t’on posto, che te toca tornare indrio parché te vien el convulso a védare che no te cati la strada justa.
Xe senpre pi fadiga tegnere la man: se no te ghè... la man de Sant’Antonio, te toca acetare de nare par strade che no t’intaressa. E pensare che, ognuno de noantri, par question de natura, se ga fato el so gnaro, ga messo insieme le so paje, s’à costruìo la so mentalità, s’à fato le so idee e le so selte. Purtropo la sorte vole che, oltre a chi tase e va pa i fati sui, ghe xe anca chi ùcola, chi sbraita, chi vende la pèle de l’orso senza ’verlo ciapà... e el te crea confusion e el te fa nar ’torno la memoria. Chi te dise de caminare a drita, chi te dise de tegnere la zanca, chi te sugerisse che se te camini drento te ’l fosso, te magni manco pólvare, e chi inveze sostien che nando traverso canpi, te ris-ci de manco e te rivi prima a destinazion.
Anca in fato de religion, de ànima, de spiritualità, co tuto che te sii vegnù fora da na formazion catòlica, col màssimo rispeto e obedienza a preti, suore e comandamenti vari, secondo l’autorità de la Cesa, oncò tuto vien messo in discussion. Se assiste al trionfo de le parole "laico" e "laicismo", parché ghemo da pensare e da fare quelo che decidemo noantri e non quelo che vorìa farte fare... el Papa de turno!
Nel nome de la màssima libertà, del dirito a la piena libertà, no ocore pi gnanca sposarse in cesa o in Comune, no ocore èssare de sesso diverso par farse fameja... basta volerse ben, sentire atrativa verso na persona... e tuto xe a posto. No inporta gnente che du òmeni o do done che se ama... no i possa métare al mondo na creatura. A ghe ne xe anca massa de creature senza genitori: basta torse uno de questi, stabilire che Bepi xe el popà e Evaristo xe la mama e el fiolo xe sistemà!
Se ga l’inpression che no la sia mia questa la strada da fare par rivare in qualche modo a destinazion, cioè a la casa de la cossienza umana, civile, sociale e morale. Sta strada qua la porta da tut’altra parte.
E no volemo gnanca pensare dove!
A sto proposito, me xe stà contà on fato. Na volta ghe jera uno da Rovigo che tuti i sabo el naséa a far baraca te na ostarìa de Stanghela. Sicome el conosséa ben le so deboleze e el savéa che ’l sarìa finìo in ciarina, prima de nar drento in ostarìa el metéa zo la so bicicleta za girà in direzion de Rovigo: cussì no ’l coréa el ris-cio de pèrdare la tramontana. Fato sta che na note, quei lazaroni che bevéa insieme a lu, ma che i tegnéa ben el cheno e i ghe ne bevéa manco, senza che el se ne incorza, i ghe ga voltà la bicicleta. Cussì chel poro omo che anca chela sera el gavéa negà i so pensieri te ’l vin, a ore pìcole el s’à catà al Bassanelo, a le porte de Padova.
A sto punto, no ghè bisogno che tira mi le conclusion: ognuno xe in grado de tirarle da solo e de sèliare la strada giusta, la strada de casa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La strada de casa
In sto groejo de strade, de trodi, cavezagne, vie traverse e tabele de indicazion, co sto destejo de apòstoli e profeti che prèdica vangèi falopi, xe senpre pi fadiga catare la strada de casa
de Mario Klein
Novità Linguìstiche
El "tesoretto" de Manlio Cortelazzo
In sti giorni ga visto la luce un lavoro linguìstico de l’ilustre professore emerito de Italianistica e de Dialetologia, el catedràtico Manlio Cortelazzo, gran benefatore de la cultura vèneta e sostegno par chi ama la storia e vol conóssare le propie orìgini
de Mario KLein
|
