|
Sport
Chiara Rosa, "Principessa" del peso
 |
| Chiara Rosa co in man du trofèi: quelo de l'Arena de Milan e... quelo de Q.C. (foto GaMa) |
A nostro védare, tra le varie dissipline de l’atletica legera, quea del "lancio (o getto) del peso" la xe quea manco nominà, la Cenerentola de i canpi de atletica, la manco ’jutà e reclamizà, parché ’e tosate e i tosati i se avvissina, i s’inamora e i la pràtica.
A smóvare l’anbiente, cavàndoghe via on fià de scarpìe del disinteresse, ghe ga pensà Chiara Rosa, ’na zóvane, sinpatica e forte atleta de San Michele delle Badesse, frassion de Borgoricco, in provincia de Padova. La tosata el 24 giugno ultimo passà, a l’Arena de Milan, durante le gare de Coppa Europa de atletica, la ga traesto el peso a 19 metri e 15 çentìmetri, quinta misura mondiale de l’ano, e novo record ’talian tolto a Assunta Legnante che lo detegneva co metri 19,04. Co sta inpresa oltre al record, la Nassionale Italiana de atletica la xe tornà da novo in "Superleague" che sarìa la "serie A" de l’atletica europea.
Noaltri de Q.C. gavemo ’vùo modo de incontrare la canpionessa, de discórare insieme de la storia e de le règole de la specialità atletica del peso, de come che la ga scomissià la so cariera, de le vitorie e de i inportanti inpegni che la speta.
El "getto" o lancio de peso, xe ’na specialità de l’atletica che deriva dal lancio de le prìe (o piere), che se faseva a le Olinpiadi de l’Antica Grecia. Ne le Olinpiadi moderne, vossude dal francese Pierre de Coubertin, fate par la prima volta a Atene nel 1896, el lancio del peso i lo faseva solo i òmeni. Le fémene xe stà amesse a le Olinpiadi de Londra del 1948. Come tuti i sport, anca el "peso", ga le so règole. La pedana dove se mete l’atleta par fare el lancio xe circolare co ’n diametro de metri 2,135. So ’l davanti de la pedana da dove l’atleta fa partire la bala ghe xe on rialso fermapìe, che no ga mai da èssare superà. La bala xe de aciajo e par i tosati che scumissia la pesa 3 kg; par i alteti de le categorie pi alte la ga peso e dimenssion diverse. Par le done la pesa 4 kg e la poe ’vere on diametro variabile da 95 a 130 mm. Par i òmeni 7,26 kg co ’n diametro che va da 110 a 145 mm. El setore de lancio el ga da ’vere ’na apertura de 40° co ’l vertice che coincide col centro de la pedana. Le tèniche del lancio le xe do: traslocassion (o dorsale) e rotatoria. ’Desso la pi parte de i lanciatori a alto livelo, tra i quali anca la nostra Chiara Rosa, i pràtica la rotatoria, tènica che xe stà proposta dal russo Aleksandre Baryshinikov ’torno i ani ’70. Parché el lancio sia valido, el peso – tegnùo su co ’na man sola – ga da èssare portà sora a la spala, rasente al colo e a la ganassa e nel lanciarlo la man no ga da èssare mai sbassà.
Dopo storia e règole parlemo de la tosa. Chiara Rosa xe nata a Camposanpiero (PD) el 28 genaro del 1983. La so aventura sportiva xe scomissià a ’e ’lementari, dove gera inserìo on programa de aviamento al sport. So le prime ’a ga scomissià co ’l nuoto, co risultati boni; ma ’ndando ’vanti co i studi, scola e nuoto no ’ndava d’acordo in quanto i alenamenti ghe portava via massa tenpo e la ga dovudo molarghe. Propensa però a far sport, nel tenpo lìbero, la continuava a frequentare i canpi de atletica. On bel dì, provando col lancio del peso ’a se ga inacorto che la bala ’ndaseva davero lontan. La mola che ga fato scatare la convinsion de poder rivare a alti livèi xe stà l’incontro a 12 ani col so atuale alenatore, Enzo Agostini. Fra i do se ga instaurà on raporto de gran fiducia e conprenssion: la forsa e la bravura de la tosa, la conpetensa de l’alenatore nel sgresare i difeti e dar consili utili ga fato el resto. Chiara, canpionessa anca de umiltà, dise che bona parte del mèrito de i so sucessi xe del preparatore; sia come che la sia, i risultati ga scumissià rivare. I primi co i colori de la Libertas Samp, dopo co la Libertas Padova e dal 2004 co le Fiamme Azzurre. Nel 1996 a Bari ’a ga vinto i Zoghi de la Gioventù; nel ’98 ne la categoria "Cadette" la vinse lanciando el peso de 3 kg a 16,07 metri. Altre vitorie xe stà: nel 2000 a Padova categoria "Allieve" peso da 4 kg, metri 15,44; nel 2002 a Milan "Juniores" 16,96 metri; nel 2005 a Bressanone "Promesse" 18,71 metri; senpre nel 2005 a Erfurt medaja de bronzo ai Europei "Under 23" e stessa medaja ai Giochi del Mediterraneo a Almeria e a Padova, el 28 lujo ’07, ai Camp. Ital. Assoluti, 1a con m. 19,13. Xe oncora sui i primati indoor "Allieve" 15,18 e "Promesse "17,31.
I esperti dise che la potensa de Chiara xe dovuda a on fisico agile e a ’na grossa muscolatura. Se pensemo che sti risultati atletici vien da ’na tosa che, dopo ’ver otegnù la maturità sientifica, la se ga iscrito a l’Università ne la Facoltà de Lingue e che fra poco la ciaparà la laurea, bison proprio dire che come la xe agile e determinà nel sport, cussì la xe ferma, co le idee ciare, la testa ben piantà sol colo e decisa so cossa che la farà quando l’aventura sportiva sarà finìa: so ’na intervista la ga dito che a 40 ani ’a se vede sposà e co do o tre putèi.
Saludàndose e faséndoghe i auguri par i prossimi grandi inpegni, i Mondiali a Osaka e le Olinpiadi in Cina, ghe esprimemo la speransa de védarla so ’l podio. Chiara, però, la smorsa i nostri desideri, disendo che la sarà durissima. La promete però che ’a ghe la metarà tuta e tra el serio e ’l schersoso la dise che a Milan dopo el record ’talian la se ga emossionà e squasi no a riussiva a parlare. Se capitarà on risultato positivo ai Mondiali o a le Olinpiadi, la xe sicura che la se inbalbarà, o adiritura, da l’emossion la canbiarà lingua. Dita da na prossima dotoressa in materia, no stentemo a crédarghe.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Se vèrze le scole: par studenti o delinquenti?
Védare massacrare de bòte on Crocifisso, inprecando e biastemando, e po’ mostrarlo a tuti su Internet, ne fa male e ne preòcupa, parché no la xe na bravata da "bulli", ma on’azion da lazaroni patentati
de Mario Klein
Memoria viva
Sudore, làgrime e sangue ne la storia de la umanità
I incitamenti de Churchill ai inglesi ne la seconda guera. I avertimenti de Garibaldi ai soldài prima de abandonare Roma in te ’l 1849. El incoragiamento de Citolo da Perugia par la difesa de ’l "bastion de la gata" in te ’l 1509 a Padova
de Gigi Vasoin
Sport
Chiara Rosa, "Principessa" del peso
de Mario Galdiolo
Robe de Ciósa
Garibaldi e i pescaóri ciosòti
a cura de Angelo Padoan
Da Verona
La "Spluga de la Preta" nel film "L’abisso"
de Wanda Girardi Castellani
|
