|
Editoriale
Se vèrze le scole: par studenti o delinquenti?
Védare massacrare de bòte on Crocifisso, inprecando e biastemando, e po’ mostrarlo a tuti su Internet, ne fa male e ne preòcupa, parché no la xe na bravata da "bulli", ma on’azion da lazaroni patentati
 |
| Spacare banchi, lavagne, butare careghe contro le finestre: che scola xela? |
La xe una de quele robe che te fa vegnere la peldoca: distrùgiare a colpi de baston on Crocifisso, sìnbolo religioso par i cristiani, imàgine de on profeta par i musulmani e on "rabbino" par i ebrei, la xe na violenza insulsa. A femo de tuto par abolire la pena de morte nel mondo e ghe manchemo de rispeto a on poro "omo" condanà a morte par le so idee de giustizia!
Ma in che mondo vivemo? Ma da che scola vienli fora sti mostri che, non contenti del misfato, i taca so ’l muro, al posto del Crocifisso spacà, on folieto con scrito "torno subito", i ronpe tuto quelo che ghe xe in classe, i danegia na màchina parchegià vizin a la scola e i ghe dà fogo al brazo de on amico.
El gavéa proprio rason Alexandre Dumas nel dire che i "malvagi" ogni tanto i se ponsa, ma i cretini i va senpre de longo!
La question grave xe che ste robe no le xe capità nel mezo de na festa rocketara o de on incontro satànico segreto, ma te on’aula de on Istituto Superiore de Rovigo, co tanto de conpagni che seguìa la vicenda ucolando; "Finiscilo, finiscilo!"
Come se pole rivare a na manifestazion idiota de odio, de cìnica violenza e de inciviltà che disonora la scola, la fameja e la socetà! E qua salta fora la responsabilità del triangolo educativo de i nostri tosi che i xe privi de creatività e i copia el cativo esenpio del mondo de i adulti. On mondo violento, sacrìlego, adesso anca anticatòlico, antipreti, antipapa. On mondo agressivo ne la vita reale e ne la fiction, nel cìnema, ne la television, maestra nel mostrare le robe che no va.
Pi che de on "triangolo" se trata de on "cerchio": la scola xe tolerante, parché la fameja xe protezionista e "denunciante" e la socetà xe de mànega larga. La professoressa che ga costreto on aluno che ghea ofeso on conpagno, a scrìvare cento volte so ’l so quaderno "sono un deficiente", la xe ’ndà soto processo, ris-ciando de vegnere condanà.
Vien fati passare par "bullismo" e considerà robe da tosati che ga morbin e voja de scherzare, fati che no ghe someja par gnente al scherzo: on professore xe drio spiegare a la lavagna, on studente par dedrìo ghe tira zo le braghe, i lo fotògrafa col telefonin e la fotografìa el dì dopo la finisse su Internet. On studente de 13 ani de Vicenza el vien petufà da i so conpagni parché no ’l se veste a la moda. On toso de 16 ani, bravo a scola, el vien perseguità (a base de: "Sei gay") da i so conpagni; i professori e el prèside i vien informà ma i fa ben poco par troncare sto conportamento: el toso se buta dal quarto piano. On studente de la zona de Milan el ghe dise a la so professoressa che la pole nar fare la putana, cussì la ciapa piassè schei. El professore xe drio spiegare el teorema de Pitagora, na tosa se alza la malieta, la se fotògrafa el pèto nudo e la inpresta el telefonin in giro par la classe.
Su Internet, basta clicare "video scuola" e vien fora na valanga de filmati con studenti che se gode a sfótare professori, spacare banchi, devastare lavagne, butare careghe contro le finestre. Tuti semo stà zóvani, ma pi de ’vere portà le zurle in classe o tacà on pesse d’aprile so la càtedra, no ghemo fato o no ne xe stà permesso de fare!
Avanti de sto passo, dove pensèo che rivemo? Tuti dise che bisogna canbiare. Tacando da dove? Da noantri, dal nostro conportamento: in casa, fora, al lavoro, in strada... Anca ne la scola: via i telefonini, via i bunìgoli descoerti e le còtole che se ghe vede le mudande e paghe pi dignitose ai insegnanti. Senò... rassegnémose a ’vere sempre pi delinquenti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Se vèrze le scole: par studenti o delinquenti?
Védare massacrare de bòte on Crocifisso, inprecando e biastemando, e po’ mostrarlo a tuti su Internet, ne fa male e ne preòcupa, parché no la xe na bravata da "bulli", ma on’azion da lazaroni patentati
de Mario Klein
Memoria viva
Sudore, làgrime e sangue ne la storia de la umanità
I incitamenti de Churchill ai inglesi ne la seconda guera. I avertimenti de Garibaldi ai soldài prima de abandonare Roma in te ’l 1849. El incoragiamento de Citolo da Perugia par la difesa de ’l "bastion de la gata" in te ’l 1509 a Padova
de Gigi Vasoin
Sport
Chiara Rosa, "Principessa" del peso
de Mario Galdiolo
Robe de Ciósa
Garibaldi e i pescaóri ciosòti
a cura de Angelo Padoan
Da Verona
La "Spluga de la Preta" nel film "L’abisso"
de Wanda Girardi Castellani
|
