|
Robe de Ciósa
Garibaldi e i pescaóri ciosòti
 |
| Garibaldi acolto trionfalmente a Ciósa (tela de A. Brusomini Naccari). |
9 febraro 1849: l’Assemblea costituente proclama la Republica Romana. Ma el papa, profugo a Gaeta, domanda agiuto e protession ai Stati catòlici e la sità se trova assedià. Core a difèndarla Goffredo Mameli e Giuseppe Garibaldi, ma Roma ze costreta a capitolare el 2 lugio 1849. A Garibaldi no resta altro che tentare de scampare ai so nemissi: a passa per una de le porte de Roma, evitando la guardia de i soldài, e a se dirige verso el nord. A spera de rivare in tempo per dare ’na man a Venessia, che continua a resìstare. L’ariva a San Marino. Co poco pi de duzento òmeni a va zo ne la spiagia de Cesenatico la sera del 1° agosto 1849. Ze note. Tuti dorme. El tempo no promete gnente de bon. Nel picolo porto ze ancorà de i bragossi ciosòti sensa nissun a bordo. I òmeni o per la stanchessa o per el cativo tempo i ze andà a riposarse in qualche casa vissina.
No ze difìssile per Garibaldi arestare la guardia austriaca e subito dopo a comanda ai so òmeni de andare a svegiare i pescaóri che dorme. L’eroe de i dó mondi a se impossesse de i dódese bragossi ciosòti e de ’na tartana, comandà da Vincenzo Bellemo deto Biasetto. Xe so intension quela de portarse subito al largo, siben el mare sia pitosto mosso da vento de levante, che rende difìssile vegnire fòra dal porto-canale.
Alora Garibaldi, sfidando la furia de le onde, da marinèro esperto come che a gera, a sérche co ’na barcheta de fare fondo ai fèri (i fèri gera picole àncore) fora del porto in modo da quilibrare i bragossi. Co sto sistema a riésse a far ciapare el largo ai bragossi e a dirìgiarli verso Venessia. Ze quasi le oto de la matina del dó agosto. Se nàvega a sie mìlia da la costa. El generale co Ugo Bassi e Anita ze montà a bordo del bragosso comandà dal pescaóre Federico Penzo deto Birìciolo, de proprietà de l’armadore Luigi Penzo deto Scuèla, che ze a bordo de ’n’altra imbarcassion. Navigando co vento bon, la flotigia verso el tramonto sta per rivare a destinassion, ma sfortunatamente durante el giorno, calmà el vento, scomissia a supiare ’na bréssa lisièra, ma contraria a la diression de i bragossi. Cala la sera e nel sièlo sprende ’na luna piena. I pescaóri vede, verso el delta del Po, in diression de Goro, un brigantin austriaco, l’"Oreste", insieme a ’na goleta. El primo scomissia a far fògo: ’na bala passa davanti al bragosso montà da Garibaldi, che a ze posà a l’àlbaro de maistra fumando. Finalmente a l’alba del giorno 3 la flotigia da bragossi ciosòti se trova tra la pónta de Goro e Magnavacca (ora ciamà Porto Garibaldi), tuta sircondà da navi austriache co tanto de canoni. I componenti de nove bragossi ze fati prigionieri e solo quatro, anche se inseguìi da lance nemiche, i riésse a aprodare a la spiagia press’a poco a quatro chilometri a tramontana del porto de Magnavacca, mentre i altri oto co la tartana i vien portài a Sacca Scardovari.
Finisse così miseramente el generoso tentativo de Garibaldi. De i so dusento òmeni 150 ze fati prigionieri e portài ne le prison de Pola; lu se salva per miracolo, tocando riva co la mugère Anita, Ugo Bassi, Ciceruacchio e pochi compagni superstiti. El bragosso, dove gera imbarcà Garibaldi, vien incendià da i austriaci e i òmeni del quipagio, avendo perso tuto, per dó giorni e dó note i gira dispersi per le campagne vissine. L’eroe, morta a le Madriòle la compagna Anita, a se dirige verso Genova e a se imbarca per l’America.
Disdoto ani dopo, el 27 febraro 1867, Garibaldi ariva in visita a Ciósa. L’ariva da Venessia e a sbarca al molo de Vigo: a ze portà per el Corso del Popolo sóto ’na sorta de baldachin montà sóra de un caretin; le campane sóne a festa, svèntola le bandiere, piove fiori. L’ospite ze aclamà sitadin onorario de Ciósa. Lu a struca la man a tante persone, ai so pescaóri che l’à salvà e improvisamente a ricorda i nomi de i sinque ciosòti che à combatùo insieme a lu tra i Mile, compreso el pi zóvane de lori, el ciosòto Giuseppe Marchetti, de ùndese ani, oltre ai setanta che aveva partessipà a le altre so spedission. E dopo, dal balcon del munissipio, a scomissia el so discorso co ste parole: "Sono fortunato di trovarmi in mezzo a voi. Questo era il desiderio più ardente della mia vita." E a conclude co la celebre frase tutora scolpìa su la lapide de la faciata del palasso comunale: "Sono figlio del popolo ed in mezzo a voi parmi d’essere in mezzo alla mia famiglia."
A prométe ’na pension ai pescaóri che l’à salvà. Ma questa vien assegnà nel 1888 dal governo Crispi quando che lori, stanchi de spetare, i gera za morti...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Se vèrze le scole: par studenti o delinquenti?
Védare massacrare de bòte on Crocifisso, inprecando e biastemando, e po’ mostrarlo a tuti su Internet, ne fa male e ne preòcupa, parché no la xe na bravata da "bulli", ma on’azion da lazaroni patentati
de Mario Klein
Memoria viva
Sudore, làgrime e sangue ne la storia de la umanità
I incitamenti de Churchill ai inglesi ne la seconda guera. I avertimenti de Garibaldi ai soldài prima de abandonare Roma in te ’l 1849. El incoragiamento de Citolo da Perugia par la difesa de ’l "bastion de la gata" in te ’l 1509 a Padova
de Gigi Vasoin
Sport
Chiara Rosa, "Principessa" del peso
de Mario Galdiolo
Robe de Ciósa
Garibaldi e i pescaóri ciosòti
a cura de Angelo Padoan
Da Verona
La "Spluga de la Preta" nel film "L’abisso"
de Wanda Girardi Castellani
|
