|
Zente de Padova
Giulia Bigolina
Se no fusse stà par Valeria Finucci, che la insegna "Letteratura Italiana" a la Duke University del North Carolina ne i Stati Uniti, de Giulia Bigolina gavaréssimo perso probabilmente ogni notissia e sto nome sarìa cascà nel silenzio più scuro.
Xe comunque poche le notissie che go trovà de sta padovana, probabilmente nata nel 1518 e che la ga ris-cià de èssar confusa co na so dissendente vissuda sinquant’ani dopo.
Ma par restare a ela, la fazeva parte de na fameja molto antica e aristocratica come figura in documenti del 1297. La jera conossùa come fameja Bigolini. Figureve che nel 1420 i Bigolini i apare ne la "Lista dei nobili" de la sità de Padova. Uno de la fameja, Alessandro Bigolino, el xe stà ricordà dal Sanudo come "condottiero" nel 1509. Giulia gera fiola de Gerolamo Bigolin e Alvisa Soncin e la ga vudo un fradelo nato nel 1523, Socrate. Savemo che nel 1543 la se ga maridà con Bartolomeo Vicomercato.
El fato xe che de Giulia Bogolina manca notissie certe e la so biografia xe tuta na suposission. L’unica tracia sicura xe un documento del 1542 che conferma che la viveva qua a Padova e che la gaveva de le proprietà ne i teritori de Montagnana e de Camposanpiero.
Tenendo in considerasion le poche notissie de sta Dona, se sa che la xe stà autrice molto ativa e la xe senpre stà in contato co i più inportanti circoli culturali de Padova, dove che nel 1540 Daniele Barbato, Sperone Speroni e Domenico Varchi i ga creà la "Accademia degli Infiammati" tra i quali menbri figurava Pietro Aretino e Tiziano oltre a tanti altri letarati de chel tenpo.
Sto grupo ga prodoto un gran numero de òpare in prosa e notevoli lavori su la codificassion de la leteratura in volgare. Molti de sti qua i fazeva parte anca de la "Accademia degli Elevati" ne la quale ghe gera anca Bartolomeo Selvatico "giureconsulto". A sto letarato Giulia Bigolina ga dedicà la novela "Urania". Da quanto go dito se pol desumere che la nostra xe stà in relassion anca epistolare co i nomi più in vista de la so època, che i la ga, da quanto risulta, apressà in modo notevole.
La xe stà cità tra "le donne notabili nelle lettere" a tal punto che Cesarotti ga dito che ne la novelistica la pol èssare considerà al stesso livello de Gaspara Stampa. Inoltre el so nome xe inserìo in un tratato in forma de dialogo platonico "a ragionar d’Amore" scrito probabilmente da Mario Melechini, ciamà co el pseudonimo "Il Mutino".
Da quelo che go possùo trovare se pol dire che la xe stà na figura inportante del Rinassimento Veneto, ma roba curiosa e strana, se ga tramandà solo la so fama e invesse i so lavori letarari i se ga disperso e i xe squasi sconossùi. De i so arquanti raconti e de le so bele novele uncò ne resta solo el testo "Giulia Camposampiero e Tesibaldo Vitaliani" publicà nel 1794 dal critico conte Anton Maria Borromeo ne la so colession "Notizia dei novellieri italiani". Ne resta de un altro raconto solo el titolo "Fabula de Panphilo" parché el testo xe ’ndà perso. Ne resta solo un "sonetto-enigma" de la so vasta produssion poetica che jera sensa onbra de dubio de valore. Nel 1589 Ercole Filogenio la ga messa al pari par la so produssion poetica a Vittoria Colonna, Veronica Gambara, Laura Battiferra e Laura Terracina.
Torno un momento a la novela "Urania" parché la xe considerà l’unico esempio in prosa de sto gènare scrito da na dona nel Rinassimento, co tuta probabilità fra el 1553 e el 1558. La definission de "novella" no va intesa nel senso moderno de la parola, ma bensì nel senso rinassimentale che col tenpo se ga trasformà in novela baroca. El testo, da un punto de vista culturale, xe stà influensà da l’anbiente filosofico-culturale padovan e sul quale la Finucci se soferma co na vasta argomentassion, fazendo saltar fora anca l’idea de Giulia su la parità fra omo e dona.
Sempre da notissie incerte, pare che la sia morta nel 1569.
Ve confesso che go fato fadiga a tirar fora ste notissie sul nostro Personagio, ma penso che ghe ne sia valsa la pena. La xe stà na poetessa e scritrice de valore, anca se uncò ne xe restà pocheto de le so òpare e la xe stà na dona che ga frequentà i letarati e i artisti più in vista de l’època co pari dignità e considerassion.
Giulia Bigolina ga tuto el dirito de èssar considerà un vanto par Padova, anca se la so sità la ga desmentegà e no ghe ga dedicà gnanca na strassa de piasseta o de stradeta, magari in periferia.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Parché sti fiòi no i cresse?
Eco on argomento che scota anca se no semo in piena istà: i fiòi no se la sente de nar fora casa, i preferisse restare in fameja. Dopo tuto, no ghe dispiase gnanca ai genitori!
de Mario Klein
|
