|
Da San Bonifacio (VR)
Otobre: vin e cantina da sera a matina
 |
| Có l'era el momento de vendemar... gh'era on pòpolo a disposizion... |
"A Santa Fèma (Eufemia), se scominçia la vendèma", ma ’l tenpo l’è deventà cossì mato che anca i proverbi no i ghe ciapa pi, propio come le prevision che se sente far su tuti i canài de la television. Mi me fido solo del canal... de la gronda! L’è el pi sicuro, ve lo digo mi, parché quando che ’l scàrica acoa vol dir che... piove! A sto ponto me vien da dir: beato el calo sul piè de me nono Cilo, parché chelo no ’l sbaliava mai! Có ’l ghe faséa mal, s’era sicuri che l’era acoa a séce roèrse. Se ’l fusse ancora al mondo, ancò, me nono el farìa un saco de schei: bastarìa che ’l vendesse le so prevision al canal che ofre de più e el vivarìa da nababo, inveçe de aver tanto tribulà in vita par parar vanti la so fameja! Mah!
Diseva che la vendema, de sti tenpi, la scominçia quando l’ua l’è maùra e sicome el sol el s’à messo a ciocar cofà un mato, eco che sto clima tropical el fa anticipar anca el laòro de i contadini. Cossì anca i proverbi i va a farse frìzar e sta sienza de i nostri veci la sbala come lori (i proverbi, no i veci!).
Le stajon de calche ano fà le era ben definìe: gh’era l’inverno, la primavera, l’istà e l’autuno... e se savéa come vestirse, parché ognuna la gavéa el so clima particolar. Ancò, le meze stajon i è sparíe: fa caldo có dovarìa far fredo e fa fredo có dovarìa far caldo: cossì l’è tuto un vestirse e un cavarse zo! ’Na fadiga che no ve digo!
Ani fà, la vendema la se faséa a na çerta data, no digo propio fissà, ma quasi. Noantri gavéino in corte calche vigna de ua gargànega e se se faséa el vin par tuto l’ano. No l’è che ghin vegnesse fora po’ tanto, ma a iutarlo a bastar gh’era senpre el vin pìcolo: la graspìa. Dopo ’na bela mostada co i piè e ’na "feroce" torciadura, parché le graspe le fusse bele seche, ste ultime le vegnéa messe te ’na tina e sora se ghe roersava de i seci de acoa finché no le era tute cuerte. Po’, parsora, se ghe metéa de le fassine de legna tegnùe fracà da ’na grossa piera. Altri, le piere i le postava inveçe sora de le asse che le inpedìa a l’aria de penetrar. Ognun gavéa la so maniera da procédar, insoma.
Dopo un paro de giorni se podéa scominçiar a béar sto vinelo che del vin el gavéa poco, quasi gnente. Però el cavava la sé e sicome ‘na olta se tribulava tanto a laorar e se sudava assè, vegnéa bona anca la graspía! Bastava seitar a zontar acoa, có el livelo de la tina el se sbassava, e sto vinel el durava par tuto l’inverno; ma co i primi caldi de la primavera la graspìa la scominçiava a no èssar pi bona e a saver da smarçin... Alora se trava ia tuto. Anca i semeti de l’ua i vegnéa recuperà e, dopo averli messi te la bala da tostar e averli brustolà sul fogo, i se masenava e co la pólvare che vegnéa fora se faséa el cafè. Altro che ’l Lavaza crema e gusto!!!
Ancò i è pochi chei se fa ancora el vin in casa. I contadini i consegna l’ua a le cantine, che le provede a laoràrsela e el vin i va a tórselo a damigiane indò i lo produse.
Te ’na frazion del me paese, indò la tera l’è pi che altro... sabion, se produséa el vin clinto (pensè che ‘l nome el vien dal merican cleanton!). Se trata de un vin a bassa gradazion e che sa da fràgola, ma cossì moro, cossì moro che l’incolorisse le buèle.
Gh’è ancora ancò chi se lo produse, ma i è restà in pochi, parché l’è un vin difìçile da digerir e da conservar, po’ no l’è comerciàbile, propio parché el fa pochi gradi (calchedun pi de la graspìa, sì).
Sti vini de poco grado i vegnéa boni par darghe un fià de forza a chei che laorava la tera e al tenpo stesso i inpediva che i se inciucasse: fato, chesto, che no dovéa sucédar, soratuto a chi era soto paron. Eco che se diséa: "A San Brunéto, el vin con el fiaschéto", propio par avisar de bere sì, ma de no alzar mia massa... el gonbio!
El fiascheto, no l’era mia senpre chel de véro inpajà... el podéa èssar pi façilmente ’na zuca (fata a fiascheto) che, tegnùa ligà co un spago par el colo, la vegnéa messa in fresca te l’acoa de un fosso. E la zente la beéa a cana!
’Desso, ciò, l’è tuto difarente... Le cantine i è vegnù sù come i fonghi e la laorazion del vin la s’à fato assè sofisticà. Se vendema ancora a man, ma gh’è anca de le machine che le fa tuto pi in pressia. El vin l’è deventà ’na gran realtà econòmica e ghe se dèdica tute le pi grande atenzion. In comercio se cata botilie par tute le scarsèle e par tuti i gusti e vini che maca senpre de pi in... testa, parché le gradazion le va senpre più su. Alora bison torse chei vinèi un fià bassi de grado, se no no se vegne pi fora co le ganbe da soto la tola dopo i pasti.
E l’è mèjo evitar de ber el solito bicer de vin botànico che ofre el contadin, parché par finirlo bison far tuti i sforzi de sto mondo. El sarà pi sano e biologico (anca se go i me dubi!), ma è passà el tenpo indò tuto nava ben parché tuto nava mal e gh’era poco sia da magnar che da ber... ’Desso, co tuto el vin bon che gh’è dapartuto, che alza la man chei che bearìa volentiera un goto de graspìa!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Parché sti fiòi no i cresse?
Eco on argomento che scota anca se no semo in piena istà: i fiòi no se la sente de nar fora casa, i preferisse restare in fameja. Dopo tuto, no ghe dispiase gnanca ai genitori!
de Mario Klein
|
