|
Editoriale
Parché sti fiòi no i cresse?
Eco on argomento che scota anca se no semo in piena istà: i fiòi no se la sente de nar fora casa, i preferisse restare in fameja. Dopo tuto, no ghe dispiase gnanca ai genitori!
 |
| Nar fora casa nialtri? Gnanca par sogno! |
No ghe xe pi i fiòi de na volta, ma gnanca i genitori de na volta. E no stè dirme che no xe vèro! Le robe le xe canbià de grosso ne la fameja: el vento del canbiamento el ga s-ciafezà forte la so inpalcadura e la la fameja la xe deventà on "ostello de la gioventù".
I fiòi i resta pi che i pole in casa co i genitori, zercando de fare la so vita co manco responsabilità possìbile. A tuto provede i genitori: lavarghe le straze, métarghe in órdine la càmara, farghe da magnare, tegnerghe el calendario de i apuntamenti col dentista, del canpo prenotà par la partìa a tenis, de la scadenza de l’assicurazion de la màchina... "I xe nostri fiòi: cossa ghemo da fare? Ghemo da butarli so na strada?... Co tuto quelo che te senti in giro?...Vuto che i vaga a finir male? Poarini!" D’altronde, xe difìzile torghe el lardo da in boca al gato. No digo che i tosi ghe ne profita... ma quasi.
Voja o no voja, xe poche le fameje che ghe insegnà la strada al momento giusto ai propi fiòi. Quei che lo fa, i ga da fare i conti co la socetà atuale: i vien considerà genitori col pelo te ’l core. Cussì, quasi nissun se la sente de afrontare el giudizio de i parenti, de i amissi, de i vizini de casa, de quei che sta nel condominio... e se cònplica oncora de pi el mestiere de genitore. Prova ghe ne xe el fato che i vari Assessorati ai Servizi Sociali de i Comuni i organiza incontri e corsi formativi par "suportare" el ruolo de i genitori e par miliorare i raporti genitori-fiòi.
Ormai se trata de un fenòmeno dilagante, duro da afrontare parché el xe deventà on sistema de vita. Manca anca la voja de ciaparlo sul serio, parché on fiolo che sta ben in casa la xe na sodisfazion anca par on genitore. Che inveze el dovarìa preocuparse e parlàrghene. Genitori e fiòi no i se parla, manca l’ascolto, manca la parola. E prima de parlare o de scoltare, on genitore el dovarìa avere le idee ciare so ’l so ruolo che no ’l xe solo afetivo e emotivo, ma soratuto de responsabilità. èssare genitore vol dire savere farghe fare de le selte, de i orientamenti de vita ai propi fiòi, signìfica farghe védare le conseguenze de ogni sìngolo conportamento.
Spesso, però, xe proprio el genitore che se tira indrìo, che rinuncia al ruolo de educatore. Eco ’lora genitori ansiosi, nervosi, stressà, che no xe boni de dire de nò e, de le volte, de dire de sì, sicuramente indebolìi dal passajo massa ràpido "dalle stalle alle stelle", dal "filò" al video-telefonin. Semo passà da na socetà tradizionale, con valori sòlidi e ben piantà ne la zuca, a una conpletamente diversa con senpre manco sicureza. La garanzìa che oncò pare valere de pi la xe quela che te dà i costrutori de le màchine: la fameja in quanto copia de on omo e na dona, la casa, el posto de lavoro, l’anbiente, la salute... i xe ne la pi conpleta confusion e stato de crisi, provocà in gran parte dal bonbardamento de stanpa e TV, inpegnà a mostrare falsi modèi e facili traguardi.
Fate ste considerazion, paraltro bastanza condivise in giro, podemo dire che ghe xe anca de i segnài che fa ben sperare sul superamento de sta crisi che ga za fato bastanza dano. Se auguremo che ’l sia l’inizio de na nova socetà che restituissa fiducia ai genitori, ma soratuto ai nostri fiòi. De le volte... na còcola de manco e na parola de incorajamento de pi podarìa jutare a créssare.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Parché sti fiòi no i cresse?
Eco on argomento che scota anca se no semo in piena istà: i fiòi no se la sente de nar fora casa, i preferisse restare in fameja. Dopo tuto, no ghe dispiase gnanca ai genitori!
de Mario Klein
|
