Da Maran Lagunare (UD)

La ceseta de San Domeni

Cesa e casa del '600 fate costruir dal conte Domenico Novelli (dis. de D. Navarria).

Fin dal 1800 Maran el gera circondò de mure, la zente de 'fora le mure' i vigniva ciamài foresti. Apena fora de queste esisteva 'na capelina dedicada a la Madona e se podeva visitala; sta capelina le gera tacada a un palasso abitò da un capitano de la "piassaforte de Maran". La guera del 1648 la ga distruto casa e cesa. Xe sto anca par la distrussion de sta cesa che el Conte G. Domenico Novelli un poco più 'vanti del posto sora citò, el ga fato costruì nel 1681, 'na ceseta in onor del so Patrono, San Domenico. Dotàndola de un patrimonio par la vita de un prete adeto a la cura de le àneme. Sto patrimonio confermò nel testamento del Conte el porta la data del 13.12.1703. Ne l'ato de la fondassion de sta ceseta, pur se la se troveva vissin a Maran la dipendeva da Carlin, un paese vissin al nostro. In sto posto ghe gera diversi casài co fameje numerose; nel 1855, abiteva 21 fameje co ben 128 persone, fameje de mezadri che i se dedicheva ai lavuri de i campi. Dal 1694 al 1855, 19 capelani ga vesto cura de le àneme de sta ceseta.
L'ultimo che ga abitò in sta zona ciamada 'Casino' xe sto Don Giovanni Dose in data 1868-1878; come se pol notà el se ga fermò 10 ani ( se presumi par motivi de salute), pur restando senpre pàroco de Maran, dopo sta data la casa canonica la xe passada ai contadini e la cesa xe stada del duto 'bandonada. Nel 1962, co decreto de l'Arcivescovo de Udine, Mons. Anastasio Rossi, e có l'acordo de i do paroci interessài, de Maran e Carlin, la ceseta la xe passada a le dipendense de Maran. Nel 1931, el pàroco de alora, Mons. Albino Galletti, 'vendo vesto sta ceseta in gestion, essendo tanto mal ridota el ga pensò de restaurara. Ghe xe vignùo in aiuto i Signori Treves e Bonfili de Padova che là i gera proprietari de un teren, co la soma de lire 1000. Anca S. Giorgio de Nogaro ga partecipò donando la soma de lire 500, par el resto de la spesa la se ga arotondò co le oferte de i maranisi, par fortuna e bon cuor ghe xe stò diversa manodopera gratuita. Un altro restauro el xe stò fato nel 1969, e ancora un ultimo nel 1989 con l'arichimento drento la cesa, de un dipinto del conpianto pitor maranese Mario Della Ricca. Ani fa insieme a un mio paesan, F. Toso, semo 'ndài a parlà co i puchi contadini che ancora i se ricordeva de vè vissùo ne la zona vissin a la ceseta. Dal 1903 al 1911, propio ne la casa ex canonica, gera 'ndài a abità la fameja Fanin, che la veva 7 fiòi; i ne ga contò che a la sera i 'ndeva a impissà le candele de la cesa parchè ghe gera chi che 'ndeva a pregà. Ne la stessa casa, originari del Padovan, xe 'ndài a abità i Sig. Bragagnolo, anca quisti co 6 fiòi duti òmini e duti sposài co fiòi a l'infora de un. In duti i gera 48 persone e a sintì luri i viveva dignitosamente in armonia e rispeto. I ne ga contò fra le tante robe, che drio la cesa ghe gera un pìcolo simiterio che ga senpre rispetò come giogo sacro. Parlando i ne ga contò un fato che luri i ritigniva miracoloso. Rita, una so nessa, la se troveva co so mare al secondo pian de la casa ex canonica, in t'una stansa che la vigniva usada come cusina. Sta fiola la ziogheva co so sorela, a un certo punto no se sa come, la xe cascada dal barcòn, el caso ga volesto che tra la casa e la cesa ghe fussi un fil de fero messo de traverso che 'l serviva par sunà la canpana. La fiola la se ga fermò propio sora quel fero, pò la xe sbrissada sora 'na grossa piera 'ndove che i veci de sera i 'ndeva a recità el Rosario. El dotor, dopo vè sintìo el caso el ga ritegnùo de ricoverala in ospedal 'soto osservassion', ma par fortuna sta fiola no la ga riportò nissuna conseguensa. Col tenpo sto fero el xe sto portò ne la Basilica de Sant'Antonio a Padova, come 'GRAZIA RICEVUTA', e la el xe ancora. La festa de S. Domenico la casca l'8 Agosto, ma naltre - i ne veva contò - entrévomo in clima festaiol sete zurni prima. Insieme co le fameje del posto colaborévomo in bona armonia preparàndola co grande entusiasmo. I maranisi i 'ndeva squasi duti a sta festa; a le 11 ghe gera la Messa, e dopo-mesozorno i vespri cantài. Par ralegrà sto zorno, fora de la casa de i Sig. Bragagnolo vigniva oferto un magnà nostran, - museto e fasiùi -, formagio, bona carne de cortil a la grilia, polenta ai feri, el duto inafiò co del bon vin. A la sera no podeva mancà el 'tavolasso' co la musica par fa quatro salti in alegria fin a tarda ora.
Col passà del tenpo e col progresso, sto posto el se ga spopolò: 'desso che la ceseta la sarissi ben ristabilìa, manca le persone; ultimamente xe stada demolìa anca la ex casa canonica parché deventada pericolante. In sti ani la vien verta sol el zorno de S. Domenico e vien celebrada 'na Messa in suo onor. Par el resto xe duta storia del tenpo che fu, che no la torna più.

Bibliografia:
Mos. Elia Piu, Marano Lagunare, 1983.
"Voce della laguna" - Bollettino Parrocchiale, Aprile 1990.

[torna sopra]