|
Editoriale
Chi prima, chi dopo...
Se no se metemo in testa che tuto a sto mondo ga on principio e na fine, no saremo mai boni de 'bituarse a pensare a la morte. Senza sto pensiero, gavaremo senpre paura a vìvare
 |
| Cussì credemo de aver fato, el 18 de otobre, consegnando ne le man del Signore el nostro amico MAURO SORZE, morto inprovisamente la note del 12 otobre 2007, a soli 47 ani. |
Non solo, ma se rovinaremo anca la vita, parché sentiremo senpre supiare so la copa el vento de la fine! A gavì rason: anca mi a zerco de farme corajo, parché anca mi a son come tuti. Però, sicome uno che ghe ne savéa pi de mi (Montaigne) el ga lassà scrito "Chi insegnerà agli uomini a morire insegnerà loro a vivere", a zerco co sti discorsi de insegnarme a vìvare, parlando del morire. A vìvare senza la paura de la fine. Tanto, paura o no paura, la capitarà istesso.
E 'lora... a penso che se trata del conpletamento de na storia - chi pi longa e chi pi curta. Na storia che finisse parché ga da scuminziàrgane nantra, che no la gavarà identiche condizion e che sarà tuta da sperimentare. Lo penso parché, a difarenza de le bestie, no go solo l'istinto, ma anca l'inteligenza. Le bestie, al massimo le pole "sentire" che la fine la xe un fato naturale. Ma mi, èssare umano, me xe stà dà la possibilità de rèndarme conto de sto fato e quindi de sèliare na determinata strada anziché on'altra, andando oltre l'istinto.
L'omo che preferisse vìvare la so vita basàndose solo su l'istinto, come fa el mondo animale, el sodisfa solo la necessità de "sopravvivenza". Al contrario, se l'aceta de "ragionare", la so esistenza se veste ben de altre finalità e azion, tegnendo conto anca del ben de i altri. Questo vol dire darghe a la vita on significato pi grande de quelo che se ghe dà a la morte. Chi ghe dà pi inportanza a la morte che a la vita, el finisse de esìstare prima del tenpo.
Quelo che inveze pole disturbare xe el non savere né l'ora, né el giorno del passajo a st'altra forma de vita, e in quale maniera vegnarà fato el canbiamento. E pi che el quando preòcupa el come. Par questo xe inportante prepararse pensàndoghe, ne la convinzion che no ghe xe gnente de pi naturale, che se trata de on destin comune a ogni creatura e che, morendo... se va fora da tuti i problemi!
Ligà a l'idea de la morte, ghe xe na convinzion forte, che fortunatamente corisponde a realtà: quando more na persona, no xe che tuto finisse, parché la vita continua e non solo nel significato de la fede cristiana, ma anca in quelo tera-tera. El mondo, l'universo, la storia, le stajon, i afari, i amori, le guere, el progresso, le sconfite, i torti e le reson: tuto va 'vanti, anca senza de noaltri. Parché? E qua tornemo da capo: parché veramente el conceto de vita include quelo de morte. Morte che, par chi ga fede, deventa solo trasformazion.
Questo vale par tuti, anca par chi perde a l'inproviso na persona cara, on amico che va in leto a la sera e che no se sveja pi la matina dopo par nare a lavorare. Ghe vole la fede che, propio quando tuto deventa teribilmente scuro e senza senso, la te invita a acetare la man amica de chel Dio che qua in tera el ga provà so la so pèle el dolore e la disperazion davanti a la tonba de l'amico Lazzaro. Forse solo cussì se podarà catare serenità davanti al pensiero del traguardo finale; solo cussì se podarà domandare l'eterno riposo, passando tra le tonbe del simitero, fasendo memoria de i nostri cari defunti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Chi prima, chi dopo...
Se no se metemo in testa che tuto a sto mondo ga on principio e na fine, no saremo mai boni de 'bituarse a pensare a la morte. Senza sto pensiero, gavaremo senpre paura a vìvare
de Mario Klein
Da Verona
Paolo Caliari, dito "el Veronese"
"L'è la... sentà sul scragno, in cao i giardini sospeso col dedrìo tuto da sanca come el gavesse un fià de mal de pansa o 'na çerta tension nel star sentado!
de Wanda Girardi Castellani
|
