|
Da Adria (RO)
La patata mericana
 |
| La domenéga dopodisnà, dopo dotrina, subito fora, driti al teatro parochiale... |
Int'i ani de la guera 1940-45 gh'jera parici bocia in Castelo, tra i siè e i diese ani; gh'in jera anca a la Tonba, ma inte 'l nostro raconto no i ghe entra. La doménega dopodisnà, giusto el tempo d'andare a dotrina e, subito fora, driti al Teatro Ferrini, el teatro parochiale, indove se vedeva Tomìche, Stalio e Olio, Ridolini: le pelicole co i cavài e i con-boi le faseva andare in boresso la marmaja incalcà là dentro, tra sighi de "arivano i nostri" e bàter de piè sul pavimento de tola; se s-ciopava da rìdere fin a pissarse 'dosso quando conpariva sul telon le còmiche.
Quìi che staseva più vissin e che jera passionà de cinema el più de le volte volte i se ciuciava dópio spetàcolo. Inte sto caso i sfurissi conprà da la Stela Pagana lì in Piassa Castelo - pomi col caramelo, carate, stracaganasse, farina de castagnasso, ciuci diversi - no i bastava a tegner calmo el stómego e, col consenso de la bilietara, sti fiòi i faseva na scapadina fin casa in serca de chelcossa da méter soto i denti: un pomo, na patata mericana, un rosegoto de pan e mortadela o de pan e marmelata ì jera bastansa par rivare fin ora de sena. Naturalmente chi stava più distante, visto el primo spetàcolo i se ciapava sù e i tornava a casa sua s'i voleva chelcossa par merenda. Na volta Renso, che da grande l'à fato na cariera artìstica co i fiochi, tanto che l'è deventà parfin comendatore, ch'el gheva casa e botega proprio a un sentanaro de metri dal cinema, profitando de l'intervalo tra 'l primo e 'l secondo spetàcolo, el parte de corsa, el va da so mama e:
"Go fame, dame chelcossa da magnare."
"Ciapa el me putin" e la ghe slunga na bela patata mericana lessa, ancora caldina. Lu fora da la porta el scuminsia a pelarla, par tirarse avanti, siché ora ch'l'è rivà davanti al teatro el ghe l'à squasi pronta. Passando par l'entrata el ghe dise grassie a la bilietara, che tanto la lo conosseva ben, el sposta la tenda de la sala e 'pena dentro el se cata a scuro de note ché la projession la jera za scumissià. Co la so bela patata in manì el serca de anbientare l'ocio par catare un posto da sentarse; inte quelo, de boto, el sente na man che, svelta cofà un gato, ghe ciapa la patata e se la porta via. Meso inmatunìo el gira l'ocio de qua, el lo gira de là in serca del ladro, ma no 'l riesse a védere n'òstrega. Int'el stesso tenpo el trà un sigo:
"Desgrassià!" ma la patata la jera sparì.
Man man ch'el se 'ndava anbientando el vardava da un canton a st'altro sercando maltolto e malandrin. Intanto, el birichin ch'el gheva fato el tiro, insacà basso inte na carega lì poco distante el se sbafava beato la patata, contento e felisse sia p'r aver fato fesso l'amigo, sia par el piassere de gustarse na patata ancora tivia. Quando che Renso l'è vegnù fora dal Cinema l'à scuminsià a cuntarghe la so disgrassia a tuti i so amighi, specialmente i più vissini de casa. Fra quisti gh'jera Walter, d'un ano più vecio, compagno de zoghi e de marachele insieme a tuta la banda d'i bocia che viveva a l'onbra del campanile de Castelo. A sentire el raconto el faseva maraveje e comenti co na passion e na partecipassion ch'a pareva che 'l fato el ghe fusse capità a lu.
Passa i ani. I fiòi deventa ragassi, i ragassi òmeni, i òmeni ansiani. E na volta Renso e Walter, andando a rumegare int'el gnaro d'i ricordi, a ghe salta fora la storia de la patata.
"E sato chi che l'è stà chel bel capitale ch'a t'à fregà la patata?"
"Parchè ti lo sato?"
"S'a lo sò? Altrochè! ècolo chì davanti a ti!"
"Ma va là, te lo disi par scherso..."
"Te giuro: a so' stà propio mi. E me so' senpre portà drio el propòsito de vegnere fin casa tua par riportarte indrìo la to patata parchè, dopo tuto, a me so' senpre sentì un roseghin par quelo ch'eva fato."
"Va ben, có l'è cussì a t'invito a sena e, dato ch'a semo in stajon, el dessert a te lo porti ti: patate mericane roste in forno."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Chi prima, chi dopo...
Se no se metemo in testa che tuto a sto mondo ga on principio e na fine, no saremo mai boni de 'bituarse a pensare a la morte. Senza sto pensiero, gavaremo senpre paura a vìvare
de Mario Klein
Da Verona
Paolo Caliari, dito "el Veronese"
"L'è la... sentà sul scragno, in cao i giardini sospeso col dedrìo tuto da sanca come el gavesse un fià de mal de pansa o 'na çerta tension nel star sentado!
de Wanda Girardi Castellani
|
