|
Memorie de na sentenaria
La cusina de la bisnona
 |
| In meso ghe jera na tola longa quanto bastava de far sentare i òmani e in fondo el fogolaro... |
"Quando te spósito, Betyna?" ghe dise la nona a so nevoda, "te ghè romai pi de 30 ani, cossa spètito!..." La tosa, ciapà a le strete, la ghe risponde che no la ga i schei par cronparse la cusina che ghe piase a ela. De rimando la nona la bróntola sù calcossa, po' la sentensia: "Na volta, ai me tenpi, a se se sposava co quelo che se gheva, altro che 'desso... Pènsate có se ga sposà me pora mare..."
Parlemo de i pimi ani del sècolo passà, quando che jera fadiga tirar vanti na fameja e se vardava solo a l'essensiale, la cusina la jera el core de la casa, tuto se viveva e se spartiva in chela stansa dal pavimento de piera, quando che la 'ndava ben. In meso ghe jera na tola longa quanto bastava de far sentare i òmani e in fondo el fogolaro che 'l jera el posto pi rassicurante dove d'inverno se se meteva tuti torno par scaldarse e ciacolare. Da na parte, in te un canton, ghe jera el seciaro co 'l so bravo sgiossapiati, fato de tola, che 'l scaricava l'aqua fora in corte su un curiàtolo che portava in tel fosso. Su st'altro canton de la cusina ghe jera na toeta pìcola co' sora un fiasco de vin e un goto che 'l serviva par tuti e có faseva caldo, al posto del vin ghe jera la graspìa.
Me conta la nona che so mama la gheva le tece e le pignate de teracota e che solo i sioroti i gheva tante pegnate de rame. Ne la tecia larga e bassa la cusinava i marsoni, el pesse che i òmani i ciapava co 'l piron soto ai sassi quando che i rostava la rosa. Ne la stessa tecia se cusinava anca le verse in sofegheto, i pissacani e el tocio co le patate, se faseva el dolse col sangue de mas-cio, el polastro in umido ne le grande feste, na tecia senpre in òpara insoma. Ghe jera un pignatèo de aluminio che la nona doparava solo par fare el cafè al nono, lo 'a lo gheva cronpà al marcà ne la festa de San Martin. Par fare el schissoto no serviva le pignate, bastava na padela col quercio, sora se ghe meteva la sénare calda e lu el se cusinava pinpianèo e có te lo versevi el mandava in giro un profumo che da solo el te inpiniva la pansa. Ne la pignata alta invesse se cusinava i fasòi, el minestron e anca el coeghin, ma chi che vinseva jera senpre i fasòi e tanti sbroetoni de verse, ma, a Nadale e a Pasqua la jera doparà par cusinare el capon e el risoto co i figadini. La polenta la se cusinava su la caliéra, sul fogolaro, tacà via al ganso de la caena: la se tegneva ben girà co la méscola e po' la se svodava sul panaro, faséndoghe senpre na crose in meso par ringrassiare el bon Dio e "parché no la mancasse mai", se diseva. Có la polenta la jera freda la se tajava col filo, ben ligà al mànego del tavoliero, e quando calcheduno el faseva la feta pi grossa del solito, te sentivi dire: "Pian col fio, ché la polenta xe poca!"
In parte, su la parete pi suta, faseva bela mostra la mésa, (el casson de la farina) dove de sora se inpastava la farina par fare el pan o le tajadele: la pasta la se domava ben co le man e po' co la méscola la se tirava fina, la se rodolava sù e co la cortelassina se tajava 'e tajadèe bele fine... Sora al fogolaro, che girava torno, ghe jera la napa co in bela mostra el masenin del cafè, qualche pignatelo, el pestarolo pa 'l sale, de solito tirà fora da un sasso incavà co tanta passiensa e sinò na spece de bussoloto tirà fora da un socheto de rubina parché el xe un legno beo duro. Ne la credensa, sora ne la vetrineta, se vedeva qualche piato, qualche cicareta par ofrire el cafè ai foresti có i te vigneva far visita, do o tre scudele par la marenda, raquanti biceri, uno difarente da st'altro, e par fare bela figura de i biciarini che i pareva disiali roversà, par métarghe dentro el rosolio quando che i te vigneva a catare. Ne i cassetini se ghe meteva le possade, i cortèi e le cortessine, la mesaluna pa 'l pesto, raquanti minestri, un par de cassarole, na tovaja par le grande ocasion, le canevasse e tute le tàtare che serviva par fare da magnare, de le palete de legno che i òmani faseva de inverno, tajàndoli fora dal legno pi duro. Soto, sarà sù da do portele, se meteva le pegnate e i pignatèi, raquanti piati sbecà, do tre terine smaltà par consare la salata, bianche co na righeta blu torno via, la bossa de l'ojo e el fiasco de aséo.
'Torno a la tola ghe jera qualche carega inpajà dove se sentava solo che i òmani a magnare: prima se serviva i veci e chi che laorava, i putèi se senteva su le scale che 'ndava de sora su le càmare col piato su i senoci, le fémene invense le magnava in pìe, tacà al fogolaro, contentàndose de quelo che restava ne la pegnata. Picà via sul muro ghe jera raquanti panari e tavolieri, la bala par brustolare el cafè o mèjo l'orzo, un quadro infumegà de la Madona co dentro le fotografie de tuti i parenti morti ne i ani passài. Anca el bigòlo el jera picà via co soto i seci par 'ndare a tor l'aqua al posso e un paro de sesti par rancurare le verdure in te l'orto o portar dentro le panoce da sgranare pa i polastri o par portare al mulin a fare farina par la polenta. In fianco del fogolaro, ben in vista, te trovavi i feri pal camin e tacà la gradèa par brustolare la polenta parché cicin ghi ne jera pocheto e quando se lo faseva el jera senpre lesso, cussì col brodo te fasevi anca la minestra e te la inbrijavi do volte.
"Védito, Betyna!" dise la nona, "le robe le se muciava pinpianelo, man man che le serviva, se te speti de 'vere tuto par sposarte, te toca spetare na vita e dopo, có te te ghè abituà de star ben anca da sola, te xe romai passà la voja de maridarte e te ghè perso i mèjo ani de la to vita... Pènsaghe, cara, e po' decìdete!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Chi prima, chi dopo...
Se no se metemo in testa che tuto a sto mondo ga on principio e na fine, no saremo mai boni de 'bituarse a pensare a la morte. Senza sto pensiero, gavaremo senpre paura a vìvare
de Mario Klein
Da Verona
Paolo Caliari, dito "el Veronese"
"L'è la... sentà sul scragno, in cao i giardini sospeso col dedrìo tuto da sanca come el gavesse un fià de mal de pansa o 'na çerta tension nel star sentado!
de Wanda Girardi Castellani
|
