|
El raconto del mese in visentin
Nadale in corte
 |
| El paréa on paesajo vero... |
Questa ca ve conto, no la xe na storia, ma na ricorensa de na volta, có no ghe jera la television. Me la ga descrita par ben me nona e 'lora capì quanto distante ca semo co i ani. Sta usansa popolare i la tegnéa al me paese, in corte de Momi Gropo, la sera vanti Nadale. Tuto el dì don Milio jera stà in confessionale: i òmani se gavéa sguaratà l'anima e le done rasentà la lengoa.
Momi Gropo el jera el bacan pi grosso del paese: tanti canpi, na stala lunga e na gran corte. Ma el core el lo gavéa grosso 'fà na sesta. Lu savéa che d'inverno laori ghe ne jera puchi e no te savivi cossa ordinarghe a le opere. Però el capìa che le fameje, par de pi che le jera tute numerose, le gavéa fame a ogni stajon. E alora i so òmini el li tegnéa ocupà anca l'inverno, fasendoghe fare tute le riparassion: a la casa, a la corte, al portelo e a la stala. El brontolava ansi contro el bacan vissin, che i òmini d'inverno el li 'assava sensa laoro.
Anca la Giovana, so mojere, gavéa on gran core. Al pomerijo la se sentava soto el portelo par taconare braghe e calsiti e la tegnéa, in sima na carega, na scudela de legno co tante palanche e ventini e a ogni poareto che se presentava la ghe faséa la mancia.
Ai Gropo ghe faséa pecà massime i poareti che so la porta i te domandava sotovosse: "Me fala la carità, parona, par amor de Dio?" scominsiando na Ave Maria. Momi disea: "Quel che va fora da la porta, vien rento da la finestra." Ogni vènare la corte de Momi a mesodì jera piena de poareti e tuti con una e anca do gamele. La Giovana cusinava on gran pegnaton de minestron, tanto grande da poderghene dare on piato a tuti.
Momi jera anbissioso che rento la so corte tuta la contrà vegnesse a "ciamar Nadale". Par questo, de i tri pajari, quelo davanti jera 'assà con tuta la so paja, belo drito, co na lunga scala posà.
La sera jera crua e paréa che 'l celo se pareciasse a nevegare. Ma la contrà jera tuta lì, parfin veci e puteli, co le sgalmare e intabarà co la mantelina corta de militare. Se faséa so la scala par primo Omero, che 'l gavéa na gran bela vosse. El tacava:
"Augusto imperator de Roma ordinava del mondo el censimento. Erode, so compare, in Giudea spadronejava. Da 4000 ani Israelo spetava e Isaia santo profetava: Beteleme, de Giuda la pi picola. Ma da ti nassarà el Re dei Re."
Dopo de elo, montà so diese scalini, la Nina intonava:
"Tu sendi da le stele, o Re del cielo" e tuti osanava. E rivava el momento pì forte: la "Nina" ricordava la nàssita, la vita e la morte de Gesù. El coro, come pregando, rispondéa ogni tanto a la "Nina":
"Maria e Giusepe povereli pietà i domandava ma nessun li acetava. Le porte jera tute sprangà. Nissuna pietà pa el Re del Cielo! Maria pi no la ghin podéa e parfin Giusepe pianséa. Freda na stala jera verta in fondo ai prà e lì l'è nato el Redentore, sensa fogo e sensa panni ("sensa fogo e sensa panni " el coro rispondéa) e lo scaldava el fià de on bo e on asinello. Ma ne la crua note se ga inpissà tute le stele, la luna piena se ga fato vanti e on s-ciapo de angeli ga intonà: 'Pace in tera ai omini de bona volontà'". E 'l coro rispondéa: "de bona volontà".
Tuti jera comossi. La "Nina" continuava:
"Xe cursi i pastori co on agneleto in spala, le done co na fassinela, i omini co on sacheto de farina. Nostro Signore vegnù in tera, catava i so poariti, quei che dal vèro sa amare. Xe rivà anca tre foresti da l'Oriente con oro, parché Gesù jera re, incenso parché el jera Dio, mira parché da grande el saria stà sacrificà."
La "Nina" ancora intonava:
"Fa la nana, Banbin" e tuti inpissava na candeleta e in procession i faséa el giro del sélese e i se inviava cantando:"Tu sendi da le stele" a la messa de mesanote.
Nessun laorava chel dì de gran festa e nessun mancava a tola: pronti risoto, caponi e dolsi, fuassa, mostarda de Boschetti e mandorlato de Cologna e, in meso la tola, el fiasco de recioto. Gioanin che faséa la quinta, scondéa soto el piato de so pare la leterina de Nadale. So pare faséa finta de catarla par caso e in piè, stentando, el la leséa e tuti batéa le man. La Marieta picoleta no la voléa èssere de manco e la osava:"Popà, anca mi te vojo ben!" I oci de l'omo gavéa le làgrime e 'l strucava e 'l basava tuti i fiòi e, parché no, na volta tanto on strucon davanti a tuti anca a la so dona e tuti a bàtere le man.
La jera la festa pi inportante e pi bela par la fameja.
Nantri toseti, dopo messa, se incalcàvimo davanti al presepio in cesa. El paréa on paesajo vero, co i monti, i prà, le case, l'aqua e le stradele. Le lucete se inviava e se stuava come in celo, le stele e la luna caminava sora i monti e la se scondéa có nasséa el dì. El prete, dopo na bela predica, el partìa da l'altare col Banbinelo in brasso par posarlo tra Maria e Giusepe, rento la capana.
* * *
Gioanin jera senpre tacà le còtole de so nona, el la conpagnava dapartuto. Ogni volta che i passava davanti la cesa, el tirava so nona a vardare el presepio. El stava là fermo inmagà e là el ghe sarìa stà tuto el dì. Na volta, insanocià sora el banco par rivarghe mèjo, el tirafora da soto la mantelina na bachetela e a so nona che lo bravava tiràndolo par na recia, el ghe ga risposto che lu el gavéa el cònpito de tèndere le piegorete.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Somenar Nadale
Un sogno, che forse no se realizarà mai, ma nissun ne inpedisse de provare, come insegna l'esperienza de i nostri contadini, professionisti de la tera
de Mario Klein
Da Belun
An novo pont su la Piave
de Luigina Tavi
Da Verona
Come una de vint'ani
de Giacinta Dall'Ora
|
