|
Da Verona
Come una de vint'ani
 |
| La s'à 'nfilà paletò e capel e la s'à presentà bardà cosita davanti a sta dona... |
"Ciao, bela." Capisso ci l'è da la 'osse e da i oci. El resto de la facia l'è coerto da chili de bonbaso che ghe gira 'torno a la testa come i tornanti del Stelvio; i so cavéi i par na pista ciclàbile dopo na nevegada: l'è la me amiga adrìo farse far le mesc da la paruchiera. Adìo chiete!
"Te pènsito che semo a Nadal e è za passà 'n altro ano!" la taca ela, gajarda come senpre.
"Tasi" ghe digo mi, "senò me ven la malinconìa. Oramai semo vece, cara mia... A propòsito, come stala to mama?"
La se gira verso de mi con du oci da mata che i salta fora da quela cavejara come do vrespe da na sesa. Me incorso che go dato de la vecia a so mama che no avaréa dovùo, parché guai tocàrghela.
"Me mama, cara, la sta ben" la siga contro 'l specio che gavemo denansi. "Te dirò che l'ò menà propio ieri dal geriatra e el n'à dito che la ga el cor e i riflessi come una de quarant'ani."
"E de testa, come ela messa?" ghe domando mi.
La me risponde de paca: "Come una de vint'ani! Pènsete che sto specialista de i ansiani el stentàa a crédar che la ghe n'avesse otantauno. Ma par via de furbissia, l'è messa anca mèjo. 'Scolta qua 'n atimin..."
Beata corona, la m'à incastrà 'n'altra 'olta. Rimeto in borseta el libro che avaréa volùo lésar e me rassegno a 'scoltarla.
"Donca" la parte ela, "te sè che la sta da par ela sola in te la casa 'ndo' semo nati noantri sié fiói e 'ndo' è morto so marì..., ben, ghera un marochin che 'l ghe sonàa el canpanel tute le matine par domandàrghe la carità. E dài ancó e dài doman, no la ghe ne podéa più. I primi giorni la ghe butàa zo sinquanta centésimi da la finestra e lu el le ringrassiàa e el giràa el canton, ma dopo un pochetin de tenpo i ga pensà sù tuti du. Ela l'à fato du conti, ghè vegnùo fora na spesa de quìndese euro al mese e par una che ga la mìnima no l'è che 'l sia propio gnente; lu, invesse, el deve aver fato un conto solo e cioè che, con un poca de costansa, l'avaréa podùo vansarse el dopio. El seto 'sa el s'à pensà? De sonarghe anca dopo disnar, che l'è el momento che me mama la sponsa n'oreta sul sofà. Le prime do olte la ga risposto al citòfono, ma el terso dì, capìa l'antìfona, l'è restà sul divano, ma lu el seitàa scanpanelar e ela no l'era bona de dormir. I è né avanti cosita par na mes'ora bona. A sinque a le tre, ela la s'à alsa, insustà, l'à fato i vinti scalini par rivar al portonsin e la l'à sbacià un pel par spiar fora e dìrghene quatro, ma lu el se n'à profità, l'à infilà el piè (scarpa nùmaro 47) inte 'l sbacio, l'à spalancà la porta e l'è vegnùo dentro."
"Maria santa! No 'l gavarà mia fato del mal, era?" ghe domando mi spaentà par la "veceta".
"Te pol inmaginarte! Me mama (talia 38), davanti a sto marcantonio l'à tacà a sigar come 'n'anguana."
"'Sa sigaela?" insisto mi.
"La sbraiàa: - Fuori, vada fuori, prima che riva el can - verso el marochin e: - Vegni, Bobi, vegni qua da la to parona - verso le scale."
"E alo fato ora a salvarla el can?" ghe domando col fià in sospeso.
"Bela" la me risponde ela silabando le parole, "varda che no la ga mai avùo el can... El marochin, 'ntanto, par paura del can o (secondo noantri) spaentà da i sighi de me mama, l'era invià a scapar quando el s'à scontrà su la porta con me soreleta (39 ani) che, a le tre, la passàa a saludar me mama come la fa ogni dì, 'pena fora da laorar. Pensa che dopo averghe crià a me mama par averse fidà a vèrzarghe a 'n foresto, me sorela l'à s'à sentìo dir sù da me mama parché l'era rivà con du minuti de ritardo. Eto capìo che furba la veceta? L'avéa calcolà tuto."
"L'è furba dalbon" ghe digo mi.
"Sta roba qua no l'è gnente" la séita ela. "Tanto par dirtene n'altra, un giorno che s'era là è sonà el canpanel. Ela l'à risposto al citòfono, la ga verto a na so amiga, ma fin che sta qua la vegnéa sù da le scale, me mama la s'à 'nfilà paletò e capel e la s'à presentà bardà cosita davanti a sta dona, na bagolona de prima categorìa, diséndoghe che ghe dispiaséa ma l'era drio nar fora, così quel'altra l'à girà i tachi e l'è nà via co la coa tra le ganbe: l'era el so trucheto par deliberarse da le comare."
"L'è furba assè. Ma 'desso te saludo
parchè mi son pronta" ghe digo a la me amiga.
"Me spètito mia? 'Ndo gheto pressia de nar?" la me salta sù ela."
Ghe mando un basin con la man e ghe sopio: "Vao a cronparme un capel par le emergense!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Somenar Nadale
Un sogno, che forse no se realizarà mai, ma nissun ne inpedisse de provare, come insegna l'esperienza de i nostri contadini, professionisti de la tera
de Mario Klein
Da Belun
An novo pont su la Piave
de Luigina Tavi
Da Verona
Come una de vint'ani
de Giacinta Dall'Ora
|
