|
Da Belun
An novo pont su la Piave
 |
| In primo pian l'Arco del Pont de l'800. |
Na olta, de machine, ghe 'n passéa qualcheduna, 'dess so an minuto, ghe ne passa zento e una. An vero problema da no saver come far; parfin i Pont i sarìe da slargar. Cossì anca al Pont de la Vittoria che traversa la Piave e che da pi de otanta ani al figura, so al panorama pi bel de Belun, in primo pian, lu: inaugurà al 23 de majo 1926... no 'l basta pi! Tant che al 19 de febraro 1994, vien inaugurà, pi a monte, an novo Pont so la Piave: ponte Dolomiti e tel stesso dì "via Serajevo" che lo colega a nantro Pont, tut novo, che traversa al torente Ardo... ma, nasse an problema: al coston "col Cavalier" propio na s-cianta pi vanti de ponte Dolomiti al taca a franar, la strada se bloca e al laoro de circolazion finisse ancora so le spale de 'l Pont de la Vittoria... che far?
"I à fat an novo pont / qua, 'pena sot Belun, / i l'à fat tut in pressa, / spendest da pi de un. / 'Dess l'é là "pore piciol" / co dentro an gran magon, / che, 'pena vert i oci, / i l'à mess sot pression. / E, no 'l conosse gnent / de quel che sta torno... / parlar al pol na s-cianta / có se smorza 'l giorno. / Al pont de la Vittoria, / lu al fa, co riverenza / le so mile domande, / st'altro risponde co passienza. / Cossì al sa de l'aqua: / la se ciama Piave... / al sa de le guere / co sangue pa le grave. / Al sa de le brentane... / La pi bruta: al Vajont / co tanti mort / su la pa Longaron... / Al sa de le Zàtere / che rivéa fin al mar... / al pont de la Vittoria / no 'l se straca de contar... / Che... anca lu da bocia / tante robe l'à inparà / dal pont de l'Otozento / che sol 'n Arco gh'é restà! / E... al Bailey al se quieta / al dorme an s-ciantenin... / al sogna... tosatèi / che co lu... se ferma an cin. / Ma, ècolo svejo... "Scuseme / se no sò gnent de nissun / ma... e noi qua dove sone? / ... Son a Belun..." Sto novo pont "al Bailey" tirà sù so "tre mesi" l'é tut in "acciaio", colaudà da Veneto-Strade e vert al passajo de "solo machine" al 9 giugno 2007. L'é a pochi metri dopo al Vittoria, al parte propio dove prima da via Monte Grappa, de là de la Piave, an scurton longo la scarpada al rivéa a le grave, dison pur an trói pa veri sportivi, 'dess trasformà, in maniera tant pi dolza, so na strada co sot an terapien co bele piere bianche a vista e, subito al pont pojà so do grossi piloni, al traversa la Piave el riva giust so la piana de Lambiói dove che sta al gran parchegio par machina e la Scala mobile che mena in piaza Duomo. Sì, son stata a vardar sto Bailey, co sto nome cossì strano che no so se vol indicar al tipo de pont, e... son stata a pìe, s'intende, dove al trafico l'é continuo e le direzion varie; an tut che m'à fat scanpar de là del Pont de la Vittoria, a Borgo Piave dove, rivada so le grave, caminando fra boscat e la destirada de sass, decisamente respirée mèjo... propio là dove l'aqua, so i tenp de piena la rivéa a superar anca de zinque metri al livel. Al pont de l'800 co al so unico arco, restà de i zinque bèi archi, al ghe ne sa calcossa de ste brentane: lu, nat có Belun l'era sot l'Austria, "1837", eco che dopo brute sagomade de smotamenti, co na piena "otobre 1882" al resta cossì: a contar la so storia e dison anca fortunà pa no èsser stat portà via del tut come altri vari pont a partir dal 1300. E, là caminando so quei sass lissi, smussadi, pensée anca a le zàtere che "fin al 1927" le véa; propio là, al so gran movimento: le rivéa da Codissago, dopo ésser state ben sagomade a Perarolo, là a Borgo Piave le canbiéa i zatieri e via... verso Venezia... altri ani, altri tenpi... davanti a mi avée tre pont: l'Arco unico de l'800 - al Vittoria e al Bailey... e ò scatà de le foto.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Somenar Nadale
Un sogno, che forse no se realizarà mai, ma nissun ne inpedisse de provare, come insegna l'esperienza de i nostri contadini, professionisti de la tera
de Mario Klein
Da Belun
An novo pont su la Piave
de Luigina Tavi
Da Verona
Come una de vint'ani
de Giacinta Dall'Ora
|
