|
Editoriale
Somenar Nadale
Un sogno, che forse no se realizarà mai, ma nissun ne inpedisse de provare, come insegna l'esperienza de i nostri contadini, professionisti de la tera
 |
| Seminatore col sole che tramonta de Vincent van Gogh (1853-2003). |
Disemo la verità: el clima del Nadale el xe ne l'aria da 'pena dopo San Martin, sia parché la publicità televisiva la taca a tontonarne par tenpo con mile proposte comerciali, sia parché a tachemo a tirar fora roba pesante, e sia parché el pensiero... el córe pi forte del calendario e la preocupazion del "cossa ghe regalo st'ano?" la ne fa pèrdare pi de qualche sono.
La stìrola de brute notizie, de maleducazion, volgarità e violenza, spece su le done e su i putèi, el vento de guera che supia parfin su quelo che dovarìa èssare on divertimento... fa el resto. Sentimo el bisogno mentale e fìsico de calcossa de manco tormentoso, calcossa che ne faga caricare le baterìe de l'anima, che xe drio scaricarse, senò no la va pi in moto.
Par fortuna l'aluvion del fiume rigenerante de le Feste, l'inondazion del Nadale, magari traverso vetrine che scopia de regài, steline e luminarie, in qualche modo el riva a portare in tera el colore del celo, l'armonia de la luce, el beneficio de la speranza.
Se on omo, anca par on solo giorno, el ghe la fa a métare da parte l'odio par chela persona che ghe ga fato del male, se el se sforza de no sacramentare, de no doparare l'aroganza del potere, se el se ferma a valutare el valore de le pìcole robe che 'l ga, se el sente la nostalgia de quando el jera toseto, ingenuo e cruo, magari anca poareto ma col cuore gonfio de maraveja... Se, insoma, co la scusa del Nadale, ghe càpita robe de sto gènere, alora podemo dire che sarìa ben festejare Nadale tuto l'ano, parché Banbin Gesù, presepio, pastori, stela cometa..., come pure giorni de ferie, cravata o dopobarba in regalo, pranzo in fameja... i ga fato 'ncora na volta chel pìcolo miràcolo che canbia la vita.
Se po' moltiplichemo sto fato par qualche milion o miliardo de persone, se pol sperare de salvare el mondo, lassando pèrdare le prevision nefaste che profetiza par el 2012 la distruzion de la Tera o la trasformazion del gènere umano. Ma noantri savemo cossa de bon pol fare la tera: par questo pensemo che sarìa ben... somenare el Nadale: par far nàssare in tanti la voja de bontà, de lealtà, de sacralità e de rispeto.
La nostra vita la tira 'vanti a testa bassa, la se inventa tuti i giorni travestimenti de còmodo: eco 'lora che el Nadale pol darghe na man a alzare la testa e a métarse indosso l'abito de la responsabilità: verso se stesso e verso i altri, volendo par tuti, e a tuti i costi, giustizia, stima, benevolenza e conprension.
Naturalmente, se sa che: "Tra el dire e el fare, ghe xe de mezo el mare." Ma on antico proverbio cinese el dise: "I buoi sono lenti, ma la terra è paziente." Eco: se acetemo pazientemente el stile de vita sugerìo dal Nadale, slonghemo, "a tempo indeterminato", el so beneficio. E proprio savendo come che semo fati, se se lassaremo riscaldare da i sentimenti del Nadale e iluminare da la luce de la fede, rivaremo a na longa stajon de l'amore.
Ne pare popio el caso de provare a... somenar Nadale!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Somenar Nadale
Un sogno, che forse no se realizarà mai, ma nissun ne inpedisse de provare, come insegna l'esperienza de i nostri contadini, professionisti de la tera
de Mario Klein
Da Belun
An novo pont su la Piave
de Luigina Tavi
Da Verona
Come una de vint'ani
de Giacinta Dall'Ora
|
