|
Editoriale
La xe propio na vergogna
Montagne de scoaze sòfega na region. Quatro teste calde (67 professori su 4.500) e na sbrancà de studenti scalmanà ghe inpedisse al Papa de parlare a l'Università "La Sapienza" de Roma. Che vergogna!
 |
| De sicuro, Galileo Galilei no'l gavarìa mai fato la scoperta de na pancianada come quela de l'Università romana. |
L'ano bisesto, ano senza sèsto se ga fato sentire fin da i so primi dì de vita. Stemo tanto male a védare in che condizion che 'l xe costreto a vìvare on pòpolo, quelo de la Canpania, par colpa soratuto de na cativa gestion del problema rifiuti: tonelate de scoaze mucià drio le strade de la grande metròpoli napoletana e de la so periferia.
Come vèneti no ghemo fato bela figura nel precipitarse a dire che el Vèneto no 'l xe disposto a fare la so parte de solidarietà. El vecio deto prima de parlar, tasi, el xe 'ncora de atualità. Anca parché calcossa come 50 mila tonelate de "umido" le continua a rivare da la Campania ne la nostra region (precisamente a Padova) da na vita. Tante volte le parole le xe pèzo de i fati!
Va ben che la publicità la xe l'ànima del comercio, ma la proposta de publicizare el slogan "Il Veneto non è la Campania" opure "Non siamo come Napoli", anca se questo xe vèro, a demo l'inpression de èssare pitosto spudorati. Se podarìa dire la stessa roba co la frase, valida par tuti i tenpi e in qualsiasi circostanza, "Il Veneto è un'altra cosa!", senza bisogno de scontrarse con chi ghe n'à za na supa par conto soo. E po' no stemo desmentegare la facenda de i "rifiuti tossici" de aziende vènete, finìi in discàriche abusive del teritorio canpano.
No sarìa stà mejo salvare la facia, acetando la quantità de racolta de na giornata (come pare sia stà prospetà) e poder cussì dire che se ga fato quelo che se ga podesto? Poco o manco de poco, xe senpre de pi de gnente!
Continuando a parlare de "rifiuti", salta fora anca quelo rivolto al Papa, a metà genaro, meténdolo in condizion de no 'ndare a parlare a l'Università "La Sapienza" de Roma (fondà sete sècoli fà propio da on papa...), parché se ghea paura de la parola del teologo. Cussì, quatro sapientoni, anziché scoltare la so parola, discùtare e confrontarse, i ga preferìo mostrare quelo che el sìndaco de Venezia, Massimo Cacciari, ga definìo "esempio di cretinismo e ignoranza laicista". Se trata de un fato gravìssimo, in un Paese democràtico e lìbero come el nostro.
Rivà a sto punto, vien da domandarse in nome de quala sienza, de quala libertà e civiltà, se ghe sara le porte in facia a on papa, quando le stesse porte le xe restà verte par far parlare uno che ga fato parte de le Brigate Rosse. Alora, questa, xela sienza o ignoranza viliaca? Xelo laicismo o paura de la parola lìbera? Le xe robe degne de l'oscurantismo medievale! Davero se ghe ga fato sto afronto a Benedetto XVI, "uomo di fede e di ragione", parché el rapresenta la Cesa che quatro sècoli fà ga condanà Galileo Galilei? Ben, alora sarìa come inpedirghe al Presidente francese Sarkozy de vegnere in luna de miele in Italia, parché el ne ricorda chel tal Napoleone che qua el ghe n'à conbinà de tuti i colori!
Robe de l'altro mondo, indegne de na Università e, soratuto, segnale de na toleranza che xe drio pèrdarse.
Riussirala l'Università de Padova, invitàndolo par le celebrazion de Galileo del 2009, a farghe desmentegare al Papa l'afronto del rifiuto romano? Speremo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La xe propio na vergogna
Montagne de scoaze sòfega na region. Quatro teste calde (67 professori su 4.500) e na sbrancà de studenti scalmanà ghe inpedisse al Papa de parlare a l'Università "La Sapienza" de Roma. Che vergogna!
de Mario Klein
Robe de Ciòsa
I zoghi de i bambini de 'na volta...
a cura de Angelo Padoan
Ciàcoe Visentine
I "Santi" de Quinto Visentin
La Beata Eurosia Fabris, ciamà Mamma Rosa, e don Ottorino Zanon, che ga fondà l'Istituto San Gaetan, xe nati o i ga vissùo in sto paese vissin Vicensa
de Giordano Dellai
Da Verona
"Ci vol védar so mama..."
de Wanda Girardi Castellani
|
